Read Ntcham Ecclésiaste 7 Bible Online

Ecclésiaste 7 - Ntcham bible

Ecclésiaste 7

¹Diyimmɔntiil sɔ́ǹ talaalumɔnti[12], ní unil kúm dal sɔ́ǹ ŋwiin ŋun bi màl̄-uee.

²Á kɔ́ dikpɔcindin sɔ́ǹ á kɔ́ dicindi din poon binib bí ki jīǹ jiŋaalee. Di sá yii unil sá kamaa kúntilaŋki di sá ŋkúm, ní an ŋān̄ yii unifoo kamaa ń nīn téetí an pu.

³Kunimbaau sɔ́ǹ tilaal, di sá yii binib ŋūǹ kí nīn wāĺ yii a bí kunimbaaun, ama ní a-pɔbil bí mmɔnni.

⁴Dikpɔcindin ní a kāntí uciŋfiti, ama ugbaan úǹ néeń dijiŋaacindin ní.

⁵Á kíí uciŋfiti ń wòoǹ-si sɔ́ǹ á nīn bí ki pílifí ugbaan gà ilan ki nyɔ́ŋkí-si.

⁶Di sá yii ugbaan laati sá kii idɔ in bí dikumbool taapu ki pòol̄ee ní. An mun sá kii bi nín jì kubuŋu puee ní.

⁷Uciŋfiti un cáá mpɔn ki wɔ́b̀ binibee ŋūǹ kí kpántí ugbaan, ní dinyɔɔŋeebil jim ŋūǹ kí yàntī u-pɔbil ń gáatí.

⁸Tiwan kúntitam sɔ́ǹ ti-kíltam. An sɔ́ á nīn cáá kimɔtii ki jítiǹ á nīn cáá dibayoondi.

⁹Taa nín̄ gífí diŋuul malaa malaa, di sá yii ugbaan di kaa pɔ̄ɔ̄ diŋuul digiil.

¹⁰Taa lì yii: «Ba ŋá ní dooooyee nìn ŋān̄ ki jítiǹ kɔŋkɔnnee?» Un bàlifī mimmee kaa sá uciŋfiti.

¹¹Iciin cáá kudapɔɔu kii difakalee ní, i kèetī báà ŋma ní[13].

¹²Iciin wúǹ unil pu kii animbilee ní. Bin cáá-iee kàal̀ kitiŋ pu kí yúntí ní. An pu ní an páb́ yii unil ń béé-i[14].

¹³Kpèè ditundi din Unimbɔti túńee kɔkɔ. Ŋma di ŋūǹ kí tàntī tiwan tin u nyīī ki pɔ́ĺee?

¹⁴Tikɔkɔ yaa còom̄ nì si tiŋanee, nín̄ bí dipɔɔpindin. An yaa kaa ti ŋān̄ee, á dàkafì. Unimbɔti di yàntī nnaam nì nnaabu dòoń, mimmee taa làá béé tin làá dāan̄ee.

¹⁵M-maŋfal din kaa bí tiban nee poonee, m ká tikɔkɔ. M dáań ki ká yii deedeedaan kúù u-deedeeu pu, ní ukpitiŋal bí dimaŋfalin u-kpitii pu.

¹⁶Taa nín̄ dàkafī yii a sá deedeedaan tikpil, kí taa nín̄ yíì a-ba uciŋfiti. Ba pu ní a là kí bīil̀ a-ba?

¹⁷Taa dū a-ba kí líiǹ ikpiti diŋál, kí taa nín̄ sá ugbaan. Ba pu ní a là kí kpú kaa bàn̄ a-wiiŋŋu?

¹⁸An ŋān̄ á nīn ŋúb́ isaŋki gbanti liitil, di sá yii unil un fàŋkí Unimbɔtee di ŋūǹ kí ŋá tibɔti gbanti liitil.

¹⁹Iciin yàntī uciŋfiti cáá mpɔn ki jítiǹ gɔminab saalaa bin kpáfì ki kpòotī kitimbaantiiyee.

²⁰Deedeedaan ubɔ pée kpá kitiŋ pu doo kí lì yii úǹ ŋūǹ kí ŋá tiŋan kí taa yìntī[15].

²¹Taa nín̄ pílifí tin kɔkɔ binib sòoǹee. Mimmee aa dāa gbìl̀ a-tɔntɔnliu sòoǹ ki bíiĺ-si.

²²Sii a-ba mun pée nyí yii iyunti iba poonee, a sòon̄ ki bíil̀ biba.

²³Tin bí nee kɔkɔee, m dū iciin ki mākaǹ ki kpēē. M lī yii: «M làá nīn cáá iciin», ama ní i dáá gbíntìi dátiǹ-mi.

²⁴Ŋma di ŋūǹ kí gbìl̄ tin nyáń ki bée taapu? An dátiǹ-ti ní ki nyóò lúkú luku.

²⁵Niinee m dū m-ba ki tīī kí nyàab̀ kí béé kun di sá iciinee. M nyàab̄ kí gbìl̄ kun pu ní tiwan dòoń ki jītée. M bífì ki béè mun yii ntoom nì digbaandi kɔkɔ sá kuwaatiiu ní.

²⁶M dáań ki ká tin bí nee: unimpu un sàtī bininjabee cāabìń ntuntun kii ŋkúmee ní. U-neendi sá kii kutaliŋŋuee ní, ní u-ŋalii sá kii ikusakee. Unil un bɔti fáatiǹ Unimbɔtee ŋmátí kí nyā u-ŋaan, ama un yaa sá unikpitee, asee ú ŋmā udaan[16].

²⁷Uciŋfiti lī yii: M cɔ́ŋkì ki kpēē tiwan kɔkɔ kubɔ kubɔ kí béé ti-taapu.

²⁸M nyàab̄ ki tin gīī kaa ŋúń ki béè. Bininjab kutuku poonee, m ká yii ubɔbɔ di pée sá uŋman. Ama binimpoobi kɔkɔ poonee, maa ká báà ubɔ.

²⁹Tin man dáań ki kée di sá yii Unimbɔti náań unil u bí deedee, ama ní unil nyàab̄ agìń tikpil ki tɔ́ u-ba pu.