Read Ntcham Ecclésiaste 8 Bible Online

Ecclésiaste 8 - Ntcham bible

Ecclésiaste 8

¹Ubɔ kaa sá uciŋfiti, ubɔ kaa nyí kí lēē tin dòońee taapu kí lì. Ama unil ciiŋyi yàntī u-nimbiin ń bútí ní u-nimbiin nín bàà kūń puee ń cúú kpántí.

²Ubɔti yaa lī puee, á ŋá míǹ kii ti nín pūtì ki pōoǹ Unimbɔti nimbiin puee.

³Á taa kàkatī a-ba kí wàatī-u malaa. Taa nín̄ nìkì ki ŋáań tin kaa fáatiǹ-uee, di sá yii u ŋáań u nín là puee ní.

⁴Ubɔti nyɔɔbundi cáá mpɔn, ní ubɔ kaa ŋūǹ kí bàlifì-u yii: «Ba ní a ŋáań nee?».

⁵Un yaa tɔ́ ubɔtee kpá kí kɔ́ tibɔtin. Ama uciŋfiti úǹ nyí tiŋan yii ibɔsoon yuntiŋu bí ki dòoń.

⁶Tiŋman, ŋwindal bí, Unimbɔti làá dāá sòoǹ unil bɔti kí nóó nì atuun ŋin u túńee, ama nnaabukpaan dɔ̄ ki cí unil.

⁷Unil kaa nyí tin bí ki dòońee, kaa nyí ŋyunti ŋun tì làá dāan̄ee.

⁸Unil kaa yì u-maŋfal kí cúú-dì kí taa kpú. Ubɔ kaa tí cáá mpɔn kí sútí u-kúm wiiŋŋu. Kujaau yaa nyáńee, kuaa gàntī ubɔ, ní inikpiti kaa fìil̄ ukpitiŋal.

⁹M ká tíǹ gbanti kɔkɔ: m kpēē tin kɔkɔ pée bí ki jītí kitiŋ pu dooyee tiŋan. An sá laakin ní binib tɔ́kɔ́ bi-jutiibi pu ki ŋáań-bi tikpitilee.

¹⁰M ká binikpitib kpíì bi bíi ŋáań bi-kpool. Binib gbanti nìn cáà kunimbɔtidiin múlmul. Bi nìn súntì Jeerusaleem tiŋkin atuŋkpiti ŋin kɔkɔ bi ŋée. Tíǹ mun pée tí sá kii bi nín jì kubuŋu puee ní.

¹¹Unil yaa ŋá ikpitee, waa fòol̄ ditafadaaldi dicilpu niin. An pu ní binib néeń ki tūǹ atuŋkpiti tikpil.

¹²Unikpiti ŋūǹ kí ŋá ikpiti ŋfunyɔm dilaataal pu, ama ní kí kàl̄ kitiŋ pu kí yúntí. Ama m gíti nyí mun yii bin fàŋkí Unimbɔtee bí mmɔnni, kun puee bi cáá Unimbɔti faaŋku.

¹³Unikpiti kaa làá nīn bí nnaamin. U làá jītí malaa kii mboonee, u-maŋfal wiiŋyi kaa làá nīn náaǹ, kun puee waa cáá Unimbɔti faaŋku[17].

¹⁴Tiba gíti bí kitiŋ pu doo kaa cáá taapu. Binib bí ki sá deedeedambi, ki fòol̄ binikpitib paati. Ní binikpitib bí ki fòol̄ deedeedambi nín máaǹ tipaal tiŋyee. M lī ki gíti bíi bùsī ki lì yii tíǹ sá kii bi nín jì kubuŋu puee ní.

¹⁵An puee m tìì kunyannyaau kí jī mmɔn. Di sá yii kun pée ŋūǹ kí nīn sá nnaam ki tīī unil kitiŋ nee puee di sá ú jī, kí nyɔ̀ kí gbìl̄ mmɔn. Tíǹ di ŋūǹ kí céeǹ unil u-tundi poon iwiin in Unimbɔti tīī-u ú dūú kàl̄ kitiŋ pu dooyee.

¹⁶M lēē m-pɔbil poon yii m làá nyàab̀ kí béé iciin, ní kí kpèè atuun ŋin kɔkɔ binib tūǹ kitiŋ pu doo kaa gèeǹ ŋwiimpu nì kunyeeuee soooo.

¹⁷Niinee ní m ká Unimbɔti tuuŋŋi kɔkɔ. Unil kaa ŋūǹ kí nyàab̀ kí ká atuun ŋin bi tūǹ kitiŋ pu dooyee kɔkɔ. Min kamaa unil gì ki nyàab̀ee, u pée kpá kí ká. Baa gba uciŋfiti yaa bí yii u nyí, waa làá ŋmā kí ká.