Read Ntcham Ecclésiaste 9 Bible Online

Ecclésiaste 9 - Ntcham bible

Ecclésiaste 9

¹M dākafì tin bí nee kɔkɔ pu ní tin m kée sèé: deedeedambi nì biciŋfitiibi nì bi-tuuŋŋi kɔkɔ kā Unimbɔti ŋaan ní. Binib kaa kpáàa nyí bi yaa làá ká dineendi àá kináŋ. Baa nyí kun dɔ̄ ki cí-bee.

²Tibɔbaantiilee di dɔ̄ ki cí báà ŋma. Tin làá bàń deedeedaanee, tíǹ di làá bàń ukpitiŋal. Tin làá bàń unimɔntee, tíǹ di làá bàń unikpiti. Tin làá bàń circirdaanee, tíǹ di làá bàń un kaa bí circiree. Tin làá bàń un ŋáań saraabee, tíǹ di làá bàń un kaa ŋáańee. Digàntil diba kaa bí unimɔnti nì unikpiti kansikin, un pòontí Unimbɔti ipoonee nì un fàŋkí kí pòon̄ee.

³Tibɔbaantiil di bàń báà ŋma, ní tin an cāabìńee kaa ŋān̄ kitiŋ pu doo. An di yì-tì ní ikpiti gbí binib pɔbiliŋin ní bi tūǹ agbaantuun, ní boonee bí kpú.

⁴Ama unil un bí dimaŋfalinee ŋūǹ kí nīn cáá dimákal, kun puee kibɔkɔ kin bí dimaŋfalinee sɔ́ǹ gbikinti un kpíìyee.

⁵Binifoobi di nyí yii bi bí ki làá kpú ŋwindal, ama bitaŋkpiibi bíǹ kaa ti nyí báà tiba pu. Baa ti cí kí fōō tipaal tiba, kun puee bi súntì bi-pu.

⁶Tin bi nìn néeńee nì tin bi nìn née nì bi-poompooŋyi kɔkɔ wáŋkì. Baa ti pée bí kí kūtì tin bí ki jītí kitiŋ pu dooyee poon.

⁷An puee jī a-jinti nì mmɔn, kí nyɔ̀ a-daam nì dipɔɔpindi, di sá yii a-tuuŋŋi fáatiǹ Unimbɔti dooooyee.

⁸Á nīn pée pèentí ajiŋaabɔkuti, kí taa súntí kí yàaǹ a-yil pu talaalu.

⁹Sii nì unimpu un a néeńee ń jī mmɔn a-maŋfal wiiŋyi in kaa náaǹ Unimbɔti tīī-si á dūú kàl̄ kitiŋ nee puee. Tiŋman, a-maŋfal wiiŋyi kaa náaǹ ní ditundi din a túń kitiŋ nee puee paati dee[18].

¹⁰Ditundi din kamaa a pée ŋūǹ kí tɔ̄ee, tɔ̄-dì nì a-pɔŋŋu kɔkɔ. Di sá yii ditaŋkpiilin laakin a cée, aa ŋūǹ kí tɔ̄ dibaaa, kaa ŋūǹ kí dàkafàaa, dinyil kpáaa, iciin mun kpá.

¹¹M gíti dáań ki ká kitiŋ pu doo nee tiba. An kaa sá ŋyunti kamaa ní bin yáb̀ee sáń kí jī ditaatandi kpaŋkpakantikuu. Bibaatandambi kaa tí jáà ki jīǹ ŋyunti kamaa. Biciŋfitiibi kaa tí kāntí ki jīǹ sɔkɔmii. Binyiliibi kaa tí sá bin cáá tigaajati ki jítiǹ bin kíǹee. Bin yiliŋ poon tūǹ ditundi tikpilee kaa tí sá bin ní bi tìì jilmee. Di sá yii bi-kɔkɔ kāntí nnaam nì nnaabu.

¹²Tiŋman, unil kaa nyí tin làá bàń-uee. Kii kulaaŋŋu nín sàtī ijɔm pu, àá kii bi nín pīil̀ kí sàl̄ unoon puee, míǹ ní unil kā ní nnaabu ń dāá túuǹ-u.

¹³M gíti dáań ki ká tiba kitiŋ nee pu ní an yāntì m gíti dākafì iciin pu.

¹⁴Kitimbilii kiba di bí ní ki-nib kaa náaǹ báà fiii. Ní ubɔtikpaan ubɔ dɔ́miń kí já nì kì. U nìn píĺ píĺ kujaau talinti ki māntìi tú-kì.

¹⁵Unandaan ubɔ nìn kóò kitimbiliiyee poon ki sá uciŋfiti. U bàà nìn ŋūǹ kí dū u-ciiŋyi kí fīī kitimbiliiyee, ama ní báà ubɔ kaa nìn téetì u-pu.

¹⁶An pu ní man lī yii iciin sɔ́ǹ mpɔn, ama uciŋfiti yaa sá unandaanee, binib ŋèeǹ nì u ní, kaa pílifí tin u sòoǹee.

¹⁷Bi pílifí uciŋfiti un sòoǹ sooooyee nyɔɔbuŋŋi ki jítiǹ ubɔti un tìì bigbaambi marab ki tátée.

¹⁸Iciin sɔ́ǹ tijanjawan, ama ní ukpitiŋal ubaanti bíiĺ tiwammɔntiil tikpil.