Read Ntcham Cantique des cantiques 2 Bible Online

Cantique des cantiques 2 - Ntcham bible

Cantique des cantiques 2

¹Man sá Sarɔn timpiliŋki supumpukum ní, nsupumpukum min yú atantakanee.

²Kii nsupumpukum min ŋān̄ ki yú ikuŋkum kansikinee, míǹ ní m-bɔɔn bí bisapɔmbi kansikin.

³Kii pɔɔmi subu nín yú kubambaŋŋu sufii kansikin puee, míǹ ní m-bɔɔn bí binaacimpɔmbi kansikin. M yaa kā u-booŋŋu taapuee an mɔ̄ǹ-mi, u-biliŋ mɔ̄ m-nyɔkɔn.

⁴U cáá-mi ki kɔ́ǹ jiŋaal diikun. Bi ŋmàn̄ m nín kā puee yilpu yii <Dineendi>.

⁵«Cáaḿmaan-mi fiinyi subiliŋ kalaau malaa ḿ ŋmɔ́ kí ká mpɔn, kí tīī-mi pɔɔmi subiliŋ ḿ ŋmɔ́ m-pɔbil ń sɔ̀ŋkì. Di sá yii m būǹ dineendi weeŋŋu ní.»

⁶U-ŋaŋgan tíkí m-yil, ní u-ŋaŋgiil pá m-caŋ pu.

⁷Jeerusaleem sapɔmbi, m dū ipeeman nì ikɔnii ki gbāam̀-ni, ní taa fìntī m-neendi kí taa páb́-dì kí nīn cí ŋyunti ŋun dì yaa lèe.

⁸M gbìl̄ un m néeńee pu. Kpèè úǹ di dòońee. Úǹ di yùkufī ajoon nì ŋgbantamu yilpuee.

⁹Un m néeńee bí kii upeeman àá dikɔniipɔmbilee ní. Kpèè u bāań ki yúl̀ ti-diiku boon. U lɔ́kɔtí ki kpèé tɔkɔla watil pú, u gbōontí tɔkɔla laaŋkin ki kpèé.

¹⁰U bí-mi yii: «Yīkìm̄, m-bɔɔn unyaan kí dāan̄.

¹¹Kuseeu jítì, utaa yúl̀ kutaa kɔ́ ndan.

¹²Ti ká ti-satin mpumpukum bíi màtī. Ilan yuntiŋu bāań. Ti gbìl̄ nnanjimamu siim pu ti-satin.

¹³Fiigi subipeepeekaaŋi bíi mántí. Fiinyi pumpukum gbītì mi-sɔnsɔfiŋu. Yīkìń, m-bɔɔn unyaan kí dāan̄.

¹⁴Man beenanjil din páaǹ di-diiku ntaŋkpalɔkɔnee, ki bál̀ ntaŋkpafaŋfakaminee, yàntī ḿ wāl̀ a-nimbiin, yàntī ḿ gbìl̄ a-neen pu di sá yii a-neen sɔ̀m̀ ki mɔ̄, ní a-nimbiin ŋān̄.»

¹⁵Ní cúúmaan-ti iŋɔkɔ nee, ŋŋɔkɔbiyaamu mun bí ki ŋmóò ki bíiĺ fiinyibee. Di sá yii ti-fiinyib bàà púkuḿ dee!

¹⁶Un m néeńee bí ki tīī-mi, ní ma mun bí ki tīī-u. U kpàá u-picaŋkpuŋku mpumpukum kansikin ní.

¹⁷Kí wàatī kutaa ń ŋàatī, ní ibóon ń wāŋkèe, fàtīí gítiń, sii un man néeńee. Sāǹní kii upeemanee, kii ukɔnii biki di sánní ajoon ŋin yākatèe pu puee.