Read Ntcham Cantique des cantiques 3 Bible Online

Cantique des cantiques 3 - Ntcham bible

Cantique des cantiques 3

¹Kunyeeu m-dooŋu puee m nyàab̀ un m néeńee, m nyàab̄-u, ama kaa ká-u.

²M làá yīkì kí yìiǹ kitiŋin nì adan pu nì sampaambi pu. M nyàab̀ un m néeńee. M nyàab̄-u, ama kaa ká-u.

³M tūŋkí bijanjaliibi bin màntī ki kpèé kitiŋee ki bàlifī-bi yii: «Ni ká un m néeńeeee?»

⁴M pūtì pée jítì bi-pu kpalaayee ní ki dūu tú un m néeńee. M cúú u-ŋal kaa ti líì-ŋu, see m nín cáá-u ki kɔ́ǹ m-na diikun laakin u cáá m-poolee.

⁵«Jeerusaleem sapɔmbi, m dū ipeeman nì ikɔnii ki gbāam̀-ni. Ní taa fìntī m-neendi kí taa páb́-dì kí nīn cí ŋyunti ŋun dì yaa láa lèe.»

⁶Ŋma di nyánní kuteeun ki dòoń kii ŋŋmi tagbanlooŋŋuee? U sɔ́fìń miiri talaaluu nì bitalaalutuukaabi nì talaalub bin kɔkɔ nyánní laaba nì bi-bulifee.

⁷An sá ubɔti Saloomɔn di pá u-lambaŋki pu. Bijanjaliibi bin cáá dipɔbilee imuŋku ita māntìi tú-u. Isirayeel baatandambi dee.

⁸Bi-kɔkɔ ŋúb́ kitàataajiki ki bɔ́ntì dikɔ̀ndi. Báà ŋma gbìn̄ u-gbajau, kí mɔ̄tì u-ba pu kunyeeu jaaku pu.

⁹Saloomɔn yāntì bi dū Leebanɔn dɔi ki kpáá-u dijakpatikaal.

¹⁰Idɔ in tɔ́kɔ́ di-puee sá animbil kúti ní laakin u dìntēe sá sindaariya, ní ki dū bisatamambi binyannyaambi ki ŋáĺ ki tākaǹ dijalee poon. Jeerusaleem sapɔmbi dū nì dineendi ní ki lùn̄ iŋaabu ki nyáantì di-poon.

¹¹«Jeerusaleem sapɔmbi, nyānnímaan kí dāá kpèè ubɔti Saloomɔn. U cíkí kibeefuulii kin u-na nìn tīī-u u-nimpucaal dalee! Ŋwiin gbantee, u nìn bí dipɔɔpindin ní.»