Read Ntcham Cantique des cantiques 4 Bible Online

Cantique des cantiques 4 - Ntcham bible

Cantique des cantiques 4

¹A ŋān̄ kunyaaŋŋu, m-bɔɔn, a ŋān̄ kunyaaŋŋu! A yaa dū a-ŋaabiiŋkaaŋu ki bīiǹee, a-nimbiliŋ ŋān̄ kii dibeenanjilee ní. A-yikpiti nín dɔ̄ puee bí kii kuŋɔcaŋkpuŋu di kpákatiń Galaadi jool puee.

²A-nyiŋŋi pīiǹ káŋkaŋ kii ipii in bi dáá cáń i-kuti ki fùl̄-iee. Dinyindi kamaa cáá di-ŋaliŋu ní, báà dibaba kaa fúkutì.

³A-nyunculiŋ ŋān̄ kii kiŋaamaŋee, ní a-nyɔkɔ cáá kunyaaŋŋu. A yaa dū a-ŋaabiiŋkaaŋu ki bīiǹee, a-taŋkpunti bí kii kpakpaapu un bi búkutì milee poon nín bí puee ní.

⁴A-sil bí kii Daafiidi difɔkɔku kun bi máń ku yú ki pɔ̄ɔ̄ jìbuee ní. Niin ní agbampɔɔ kutuku sàkā. Bibaatandambi kɔkɔ janjawanti dee.

⁵A-biiŋi bí kii aŋɔbil alee, a lì kii ipeeman in bi màl̄ ŋwimbaanti, i yú nsupumpukum kansikin ki jīǹee.

⁶Kí wàatī kutaa ń ŋàatī, ní mboon ń lítí kitiŋ puee, m làá cù miiri jool pu, ní kí cù talaalu tūukaa gbantaŋki pu.

⁷M-bɔɔn, a baasii ŋān̄ kunyaaŋŋu ní, a-laaba kaa pée wɔ̀b̄.

⁸M-bɔɔn, nyānní Leebanɔn jooŋŋi pu kí dāan̄ m-cee, dāan̄ m-cee. Kpákatiń Arimina nì Seeniir nì Eermɔn jooŋŋi pu. Nyā gbikintib kɔŋkooŋyin nì igbii jooŋŋi pu.

⁹A yāntì maa ti yì m-ba m-niisal, m-bɔɔn, a yaa pée fātìi kpēē-mi yéè ní m yaa ká a-leeŋkaati dimbil diba jee, maa ti yì m-ba.

¹⁰A-neendi tìì-mi mmɔn, m-niisal, m-bɔɔn! Dì mɔ̄ m-cee ki jítiǹ ndaam pu gba! A-talaalub sɔ́fì ki jítiǹ talaalumɔntiibi kɔkɔ.

¹¹M-bɔɔn, m yaa móotí a-nyunculiŋee, an mɔ̄ kii tisiilee ní. Tisiil nì nnaabiim bál̀ ki kā a-limbil pu. A-wampeeŋkaati sɔ́fì kii Leebanɔn bambaŋku sɔnsɔfiŋuee ní.

¹²M-niisal, m-bɔɔn, a sá bukpaa bun man baba yèe ní, man baba nyimbulnimbil, nnyimbul ŋun m pīiǹ ki kpàl̄ kpálkpalee.

¹³A sɔ̀m̀ fílfil kii yilpu beel sufii in biliŋ mɔ̄ cɔ́ncɔŋee. Niin ní isufi in sɔ́fèe nyēē. Íǹ di sá eenee nì naar,

¹⁴nì safran nì looriyee nì kanneel nì isufi in kɔkɔ bi cáa ŋáań talaalu tūukaayee, nì miiri nì disaaweendi nì talaalub bin sɔ́fì tiŋan tiŋanee.

¹⁵A sá nnyimbul ŋun dɔ̄ bukpaa kansikinee ní, dinyimbunimbil din nyim wāĺ kílkil ki pùubìń Leebanɔn jooŋŋi puee.

¹⁶Fìntim̄, ŋgan pú buŋku! Dāan̄ malaa ŋgiil pú buŋku! Dāá jītí m-kpaabu pu bú gbìtī bu-sɔnsɔfiŋu! Sii un m néeńee, kɔ́ a-kpaabun kí ŋmɔ́ bu-subimɔntiŋ!