Read Ntcham Cantique des cantiques 5 Bible Online

Cantique des cantiques 5 - Ntcham bible

Cantique des cantiques 5

¹M kɔ́ m-kpaabun m-niisal, m-bɔɔn. M kītì m-subu bun bi yíì miiree nì talaalu sufii iba mun. M ŋmɔ́ m-sigbandi nì m-siiti, ki nyùn̄ m-daam nì m-naabiim. «M-bɔɔbi, jī kí nyɔ̀maan kí gbímaan dineendi.

²M dɔ̄ ki gèeǹ, ama m-pɔbil kaa gèeǹ. M gbìl̄ kuwoou kubɔ pu, an sá un m néeńee di bíi fátí kipunyɔkɔ. Pìitī-mi, m-niisal, m-bɔɔn, m-beenanjil, unyaan. Dimalindi tɔ́ ki sɔ̄ŋkì m-yil gbàtii, ní kunyeeu sɔnsɔm sɔ̄ŋkì m-yikpiti.

³M pēetì m-bɔkutil, maa là kí gíiǹ-dì kí pèen̄! M fíntì m-taaŋi, maa là kí kɔ́ǹ-ŋi tijɔkɔndi.»

⁴Un m néeńee dū u-ŋal ki bɔ́ dikampiil buŋŋun ní m-pɔbil máĺ.

⁵M yíkì kí pìitī-u. Talaalu kpam min bi yíì miiree nìn gbí m-ŋaan ní ŋkpamee mèetī m-ŋambiyaamu pu ki tōontí dikampiil kpàlkaati pu.

⁶M pīitì un m néeńee, ama ní u fātì u-boon ki tīī-mi, ki búntì. M nyáń kí nyàab̀-u. M nyàab̄-u ama kaa ká-u, ki yíiń-u ama waa kíí-mi.

⁷Ama m tú bijanjaliibi bin cí kitiŋ ki màntī ki kpèé-kèe kitiŋ gundi pu. Bi cúú-mi ki gbáń ki ŋá-mi tiweendi, bi cúú ŋŋaabu ŋun pá m-gbigbil puee ki fōō.

⁸Jeerusaleem sapɔmbi m gbāam̀-ni: ni yaa ká un m néeńee, ni làá tùkù-u yii ba dee? Ní tùkù-u yii m būǹ dineendi weeŋŋu.

⁹Sii unimpunyaan, ba pu ní a bàlifī-ti tin bí nee? Un a néeńee, ba ní u cáá ki jítiǹ bin kíǹee ní? Ba ní u baasii cáá ki jítiǹ-bi ní?

¹⁰Un m néeńee yaa sáká bininjab kutukub saalaa kansikin, bi béetí-u ní. Di sá yii u-wunti máǹ ní ki jìl̀.

¹¹U-yikpiti bí kii sindaariyee ní, ní ki gɔ́liḿ gɔ́liḿ kii tikpakpatee, ní ki bɔ̀ǹ kii kunaambɔŋŋuee.

¹²U-nimbiliŋ jìl̀ kii dibeenanjil di bí mbun caŋinee. Di tɔ́kɔ́ kusampeeu nyɔɔgbandi ki fùul̀ nnaabiim poon.

¹³U-taŋkpuŋŋi bí kii talaalu sufii kpaabuee ní. U-nyunculiŋ bí kii nsupumpukum min pu miiri kpam còol̀ee ní.

¹⁴U-ŋalii bí kii sindaariya bɔmbiliŋ ŋin bi dū ataŋkpanyaan ki nyáantèe. U-wunti jɔ̀m̀ pɔ́lpɔl kii dikuntinyindi ní bi dū ataŋkpanyaan ki nákáǹee.

¹⁵U-taaŋi bí kii jaantalkub bin bi dū ataŋkpee ŋin jɔ̀m̀ pɔ́lpɔl ki nákáǹ an tɔ́kɔ́ sindaariya nyeel puee. Un m néeńee ŋān̄ kii Leebanɔn jooŋŋee ní, waa cáá juti kii seedir subuee.

¹⁶U-nyɔkɔ mɔ̄ dimootil, ní u-wunti kɔkɔ nín bí puee kóò-mi. Jeerusaleem sapɔmbi, un m néeńee nín bí puee dee! M-bɔɔ nín bí puee dee!