Read Ntcham Cantique des cantiques 6 Bible Online

Cantique des cantiques 6 - Ntcham bible

Cantique des cantiques 6

¹Unimpunyannyaan, un a néeńee bí la ní? La ní u túĺ ní?. Ti làá tūtuǹ-si á nyàab̀-u.

²Un m néeńeee sīntì u-kpaabun, mpumpukum min sɔ́fèe watil. Niin ní u kāntí u-jinti, ki kìtī mpumpukum.

³M sá ki tīī un m néeńee, ní u mun sá ki tīī-mi. Laakin mpumpukum bée, niin ní u kpàá u-waŋkuti.

⁴M-bɔɔn, a ŋān̄ kunyaaŋŋu, kii Tiirsa tiŋkee. A ŋān̄ ki mɔ̄ nnimbikpee kii Jeerusaleem tiŋkee, ama a kɔ̄ntí binib tifaandi kii dijanjakitil di bí dikɔmbool puee.

⁵Fàtī a-nimbiin kí taa ti kpèè-mi, di sá yii a-nimbiliŋ sàtī-mi. A-yikpiti fɔ̀kɔ̀ ki bí kii kuŋɔcaŋkpuŋu di kpákatiń Galaadi jool puee.

⁶A-nyiŋŋi pīiǹ káŋkaŋ kii ipii in bi dáá cáń i-kuti ki fùl̄-iee ní. Dinyindi kamaa cáá di-ŋaliŋu ní, báà dibaba kaa fúkutì.

⁷A yaa dū a-ŋaabiiŋkaaŋu ki bīiǹee, a-taŋkpunti bí kii kpakpaapu un bi búkutì milee poon nín bí puee ní.

⁸Ubɔti ŋūǹ kí nīn cáá binimpoobi imuŋku ita, bibɔntiibi imuŋku inaa, nì bisapɔmbi kupaau.

⁹Man ceeyee, unimpubambaanti di bí. Úǹ di sá man beenanjil, unyaan. U sá u-na bibaabil ní, kibiki kin u nìn néeń tikpilkuee. Bisapɔmbi yaa wál̀-uee, bi pàkà-u[1] ní, ní ubɔti nimpoobi nì u-bɔmbi nyɔ́ŋkí-u ki lì yii:

¹⁰«Batii nimpuu di bí kii kutaawuntuŋu walifiŋu na! U ŋān̄ kii uŋmalee, ki jìl̀ kii ŋwìińee, ki kɔ̄ntí binib tifaandi kii dijanjakitil di bí dikɔmbool puee.»

¹¹M sīntì m-sufii kpaabun. M là kí kpèè asupɔmbil ŋin bí ditantakalinee. Fiinyi sufii púkuḿaaa? Greenaadi mun púkuḿaaa?

¹²Maa tí gbìl̀ taapu, ubɔtiisal, a yāntì maa ti nyí tin poon m bée.