Read Ntcham Cantique des cantiques 7 Bible Online

Cantique des cantiques 7 - Ntcham bible

Cantique des cantiques 7

¹Gítiń, gítiń usulamiitinimpu, gítiń tí ŋmā kí kpèè-si. Ba pu ní ni kpèé usulamiitinimpu un bí akiti ali kansikin ki ŋōōyee?

²Bɔtiisal, anaataka ŋin a tákée ŋān̄ ki máaǹ-si! A-caŋ gíí ki ŋān̄ kii tiwanléeŋkaal tin bi mɔ́ɔ́yee.

³A-puluul sá kii kɔɔpu un poon ndaam min sɔ́fèe kaa lóotée ní. A-pool sá kii dibileekpukul, ní mpumpukum yú ki māntìi túee.

⁴A-biiŋi liitil bí kii ŋŋɔjamu mulee, a lì kii upeeman jaasibee.

⁵A-sil bí kii dikuntinyindi difɔkɔkuee. A-nimbiliŋ bí kii a yaa nyēē Eesbɔn tiŋkpaaŋkin anyimbɔbil ŋin bí niinee. A-maŋfal tɔ́kɔ́ kii Leebanɔn sintil difɔkɔku kun bí ki túĺ Damaasee.

⁶A-yil tɔ́kɔ́ a-wunti pu jìb̀ kii Kaarmeel joolee, ní a-yikpiti fɔ̀kɔ̀ ki máǹ wúŋwuŋ, ní tì nín gɔ́liḿ gɔ́liḿ puee sàl̄ ubɔti ubɔ.

⁷A ŋān̄ ki bí gbàlgbal. M-neeŋkaau, sii di sá man pɔɔpindi.

⁸A fɔ̀kɔ̀ càb̀ kii bubabuee ní a-biiŋi sá bu-sakaŋ.

⁹M lī yii: «M làá jɔ̄m̀ bubabu nee kí gāā bu-sakaŋ!» A-biiŋi ń nīn sá ki tīī-mi kii fiinyi sakaŋee. A-fooku sɔnsɔfiŋu ń nīn náań nì asubil sɔnsɔfiŋu!

¹⁰A-nyɔkɔ ń nīn mɔ̄ kii ndamɔntiimee! Tiŋman, ndamɔntiim min m kpáafì ki yóoǹ un m néeńee, còol̀ ti-nyunculiŋ pu ti-geem yuntiŋu.

¹¹M bí ki tīī un m néeńee, man ní u baasii là.

¹²Sii un m néeńee, dāan̄ tí nyā! Tí cù kitimbiliiyin kí dòon̄.

¹³Kù yaa wúntì kutaafaau pɔ̀lpɔlee, ti làá cù fiinyi kpaaŋŋin kí kpèè yii an púkuḿaaa, an mātì. Ti làá kpèè yii greenaadi mun yaa púkuḿ. Niin ní m làá ŋmāliŋkì-si.

¹⁴Dineendi subiliŋ gbītì ŋi-sɔnsɔfiŋu. Ti cáá asubil ŋin mɔ̄ee kɔkɔ nì ŋi-bulifi ti-punyɔkɔpu, akpiki nì apɔɔn kɔkɔ. Sii un m néeńee, sii ní m kpáafì ki yóoǹ.