Read Ntcham Sagesse 1 Bible Online

Sagesse 1 - Ntcham bible

Sagesse 1

¹Nimbi bin di kpòotī kitiŋee, nín̄ néeḿmaan tin bí deedeeyee. Ní nīn cáá ti-Dindaan pu ilandɔkɔmɔnti, ní kí nyàab̀-u nì dipɔbil diba.

²Di sá yii u yàntī bin kaa cɔ́ŋkí-uee kāntí-u ní. U lèekī u-ba ki dàkà bin fòol̄-u ki kíikí kaa gùgufēe.

³Ilandɔkɔkpiti kàkatī unil ki wàatī Unimbɔti ní. Bigbaambi yaa cɔ́ŋkì-uee, u-pɔŋŋu kɔ̄ntí-bi icoo.

⁴Dipɔɔkpitil poonee, Iciin[1] kaa kóò. Iaa kàal̀ un ni ní ikpiti jíń dinyandee.

⁵Di sá yii circir Fam min dàkà binibee sáń inyimɔn ní, mì sáń ki wàatī igbàánlandɔkɔ. Mì ná un ŋáań tin kaa ŋān̄ee.

⁶Iciin sá ŋfam min di néeń binibee, ama iaa làá yàntī un sòoǹ ki bíiĺ Unimbɔtee fám kaa dáaĺ u-tafal. Di sá yii Unimbɔti wāĺ tin kā unil pɔbil poon poon kábuee, u nyí tin u dàkafēe kɔkɔ, ki gbìl̀ tin u sòoǹee kɔkɔ mun.

⁷Tiŋman, ti-Dindaan Fam gbí kitiŋ kɔkɔ. Míǹ di ŋúb́ duulinya kɔkɔ, an pu ní mì nyí dinyɔɔbundi din kamaa unil sòon̄ee.

⁸An puee un sòoǹ ntoonam bɔtee kaa bāal̀ u-ba pu, ní u kpá kí lóó ditafadaaldi din u máaǹee.

⁹Bi làá dāá nyàab̀ kí béé unikpiti landɔkɔi. Tin u sòoǹee làá bà ti-Dindaan cee, ní án dāá nīn sá u-tuŋkpitiŋ daaŋku.

¹⁰Unimbɔti tafal pílifí tikɔkɔ ní, ki kpáaǹ tin bi lɔ́kɔfí sooooyee kóò u-tafalin.

¹¹An puee ní taa nín̄ lɔ́kɔfí an kaa cáá taapu. Ní ŋúb́maan ni-limbiliŋ kí taa kūŋfì ni-jutiibi boon, di sá dinyɔɔbundi din nyáń dibalinee cáá tipaal ní, ní un kúŋfí u-juti boonee bíi kù kinaŋ ní.

¹²Ní taa nín̄ cáá ni-maŋfal ki ŋáań ni nín là puee kí dáaĺ ŋkúm kí tɔ̄ ni-ba pu, ní taa dū ni-tuŋkpitiŋ kí nàan̄ ni-ba.

¹³An kaa sá Unimbɔti di ŋá ŋkúm, ní unifoo kúm kaa tìì-u mmɔn[2].

¹⁴Di sá yii u náań unil kamaa ú nīn bí ní. Tin kɔkɔ u yāntì an bí duulinyanee tìì dimaŋfal ní. Ndabiim min tìì ŋkúmee kaa bí tin u náańee poon. Ŋkúm kaa jíń kitiŋ pu dinyandi,

¹⁵di sá yii tin bí deedeeyee kaa kúù.

¹⁶Ama binikpitib cáá bi-tuuŋŋi nì bi-nyɔɔbuŋŋi ki yíì ŋkúm. Bi dàkafī yii ŋu sá bi-bɔɔ ní. Bi dū difaŋgiil ki nyàab̄-ŋu, ní bi nì ŋu ŋá mpèé[3]. Tiŋman, an máaǹ-bi bí nīn bí ŋu-jandi pú.