Read Ntcham Sagesse 10 Bible Online

Sagesse 10 - Ntcham bible

Sagesse 10

¹Iciin di wúń duulinya kɔkɔ baa un bi péé péé ki náańee pu, úǹ un nìn bí u-babee. Míǹ boon u nín kɔ́ ikpitinee, íǹ di tí nyántì-u niin[26],

²ní ki tīī-u mpɔn ú nīn tɔ́kɔ́ tikɔkɔ pu.

³Ama unikpiti ubɔ nìn fātì u-boon ki tīī-i u-ŋuul poon ní ki kpíì, kun puee u nìn kūū u-naal u-bum poon[27].

⁴U-puee nnyim gbí ki léeǹ kitiŋ pu, ama Iciin di nìn tí fīī-kì. Íǹ di nìn ŋàal̄ deedeedaan ndɔ meelau poon nnyim pu[28].

⁵Atimbun di nìn ŋá kinyɔɔbaantii kí ŋá tikpitilee, ŋi nìn kɔ́ fikil fikil poon, ama Iciin di nìn ká deedeedaan ki dū-u ki kpáafì bí taa ká u-pu tiba Unimbɔti nimbiin, ní ki nìn tīī-u mpɔn ú nīn tɔ́ Unimbɔti min kamaa u nìn néeń u-bikee[29].

⁶Míǹ mbaantiim ŋyunti ŋun binikpitib nìn bíi kúùyee, i nìn fīī deedeedaan un nìn bíi sáń ŋŋmi ŋun nìn bíi wù ntimu muŋmooyee nimbiinee[30].

⁷Bi-tuŋkpitiŋ daaŋku dáá gbíntìi bí ki dāa sāā díǹ kitiŋ kin kūń ki dáá gbíntìi bíi dùkùee, isufi in lòoǹ abil ŋin kaa bīī jaanjaanee, nì diyanyindi din yú[31] bí nīn cáa téetí unimpu un nìn ŋá mpɔɔgbifinee pu.

⁸Binib bin kaa nìn dū Iciin ki yíiń tibee, an kaa sá tiŋan ŋmaniŋma ní baa ŋúń ki béè, ama bi dū bi-waatiiku ki bíl̀ bi-naantiibi bin làá páań bi-boonee ń nīn cáa téetí bi-pu, án nín làá ŋá pu bi-kpitii poonee, bí taa ŋmā kí báĺ bi-ba puee.

⁹Ama Iciin fīī i-tɔntɔnliibi bi-cɔŋkii poon.

¹⁰Deedeedaan nìn sáǹ u-nabiki diŋuul din kì nìn gíí u-puee pu. Iciin nìn kpōotì-u ki tākaǹ nsàmbiyaamu mun tèen̄ee poon. I nìn dàkā-u Unimbɔti beel ní ki nìn yāntì u béè tiwan tin bí circiree. I nìn yāntì u-tuuŋŋi bútì-u ní ki nìn yāntì u páatì u-pɔ́ɔǹtam pu[32].

¹¹Nnimbineel dambi nìn nyàab̄ kí mùul̀-u, ama i tútuǹ-u ní ki yāntì u kpántì ugaaja.

¹²I nìn wúń u-pu u-nannanliibi nimbiin, ní ki nìn fīī-u ki nyántì bin nìn pīil̀ tikalindee ŋaan. I nìn tīī-u dijajil[33] kujakpaaŋŋu kubɔ poon kí ŋmā kí dàkà-u yii á nīn yú nì Unimbɔti deedeeyee pɔ̄ɔ̄ ki jítiǹ tikɔkɔ.

¹³Iaa nìn dū deedeedaan un bi nìn dūu nyáfèe ki fá, ama i nìn nyántì-u ikpitin[34].

¹⁴I nì u di nìn sīntì dilɔkɔgindin ní kaa nìn dū-u ki fá u-kusakai poon. Ama i nìn tīī-u mbɔtikpandɔ ní ki tīī-u u-kpilib kɔkɔ pu mpɔn. Iciin di yāntì bi béè yii bin nìn túǹ-u dibɔgabilee sá binyimɔndambi ní i tīī-u talku nyooti.

¹⁵Iciin di fīī circir nibul din nib pu baa kāntí tibee ki nyántì-bi ditimbundi din nìn wɔ́b̀-bee ŋaan.

¹⁶I nìn kɔ́ ti-Dindaan tɔntɔnliu ubɔ pɔbilin ní úǹ dū maamaacib nì tidaandi ki jáń nì bibɔtikpaambi[35].

¹⁷I nìn pàn̄ circirdambi bi-tumpɔɔŋi paati, ní ki kpōotì-bi ki dī maamaaci saŋŋu pu. I nìn kpántì kibalilaŋ ní ki tīī-bi ŋwiimpu ní ki nìn sá iŋmalbijaa in ŋmíntí-bee kunyeeu[36].

¹⁸I nìn yāntì bi cōom̀ ki dūtì Tikati mɔɔl, ní ki dū-bi ki jítì nnyiŋkpaam kansikin.

¹⁹Ama i nìn dū bi-nannanliibi ki múĺ nnyimin, ní ki nyántì-bi tiŋku taapu taapu ki tɔ́ digbándi.

²⁰An pu ní deedeedambi nìn fúkúl̀ binikpitib wanti. Bi nìn gāā nlan yii: «Ti-Dindaan, a-yindi sá circir yindi. Bi nìn nyɔ́ŋkì dicilpu a-ŋal ŋun di mɔ́tì bi-puee»[37].

²¹Di sá yii Iciin nìn cúú bimɔɔmiimbi nyɔmmu ki pīitì ní ki nìn yāntì campɔntib ŋúń ki sòon̄ tiŋan[38].