Read Ntcham Sagesse 11 Bible Online

Sagesse 11 - Ntcham bible

Sagesse 11

¹Iciin nìn yāntì an bútì bi-tuuŋŋi circir bɔnaatiliu[39] ubɔ pu.

²Bi nìn cōom̀ ki jítì kuteeu kun pu ubɔ kaa kóòyee, ní ki cóoǹ bi-tantib laakin unil taal kaa tāā ki kée.

³Bi nìn jáń nì bi-nannanliibi ní ki jìn̄ bi-pulincɔntiibi.

⁴Nnyinnyoo nìn cúú-bi ní bi kúuǹ ki yíiń-si. Niinee ditaŋkpal din nyɔkɔ cɔ́m̀ee tīī-bi nnyim, ditaŋkpal din pɔ̄ɔ̄yee kūū bi-nyinnyooŋu[40].

⁵Míǹ puee, nnyim min bi nìn dūu dáaĺ bi-nannanliibi tafalee di kpántì tiŋan ki tīī-bi bi-nimbinaamandin.

⁶A nìn dū tikpati tin ŋmàl̄ fatikuee ki gbātì[41] bi-mɔɔl nyim min nìn pùub̀ kaa gbèentée.

⁷Di sá yii binannanliibi nìn tīī mara bí kpɔ̀ mbipɔmu[42], ní a dáaĺ bi-tafal. Ama bin sá a-yabee, a nìn tīī-bi nnyim tikpil min pu baa nìn túkúee.

⁸A nìn dī nnyinnyoo ŋun nìn cúú-bee gbanti pu ní ki dàkā-bi a nín nìn dáaĺ bi-nannanliibi tafal puee.

⁹Tiŋman, a nìn cɔ́ŋkì-bi, ní ki dáaĺ bi-tafal a-laŋŋaŋfitiiku poon, bí ŋmā kí béé falaa un ní binikpitib jīǹ ŋyunti ŋun ní a yaa bíi sòoǹ bi-bɔti nì diŋuul poonee.

¹⁰A-yabee, a nìn cɔ́ŋkì-bi kii ubaati nín wòoǹ u-biyaamu puee ní. Ama bi-nannanliibee, a nìn sòon̄ bi-bɔti kii ubɔti un di dátí binib tafal kaa sūǹ isaayee ní.

¹¹A-yab nannanliibi yaa nìn pìlīǹ-baaa, bi yaa nìn dátiǹ-baaa, bi nìn jīǹ falaa mbaantiim ní.

¹²Tiwan tili di nìn kɔ̄ntí-bi kunimbaau. Mpeekaamee, bi yaa téetì inaabu in jítèe puee, bi yáliŋkí ní.

¹³Míǹ boonee bi yaa nìn gbìl̄ yii inaabu in bi dūu dáaĺ bi-tafalee kpántì tiŋan ki tīī bin kíǹeeyee, ní bí gbìl̄ bi-ban yii sii ti-Dindaan di ŋá míǹ.

¹⁴Un bi nìn dūu fá njamin ŋkúm ń dāá yòon̄-uee, un bi nìn jìn̄ nì ibeelee[43], an dāa kúntèe, úǹ bɔti di ŋá-bi maamaaci, di sá yii nnyinnyoo ŋun cúú-bee nyáń ŋu-ba nì ŋun cúú deedeedambee.

¹⁵Bi-gbaanlandɔkɔi nì bi-landɔkɔkpitii in yàntī bi wáŋkée puee, bi jáam̀ ikoobu in kaa cáá nlandɔkɔ nì tiwaŋkuti tin kaa pée bí tibanee. A nìn dū tiwaŋkuti tin kaa cáá dinyilee ki tɔ́ bi-pu kí dáaĺ bi-tafal[44],

¹⁶án nín làá ŋá pu bí béé yii laakin unil ŋá ikpitee, niin ní u fòol̄ u-tafadaaldee.

¹⁷A-ŋal ŋun cáá mpɔnee di dū tiwan tin kaa cáá dikílee ki náań duulinya kaa gbìl̄ digìńdi báà diba pu. An puee a bàà nìn ŋūǹ kí dū agbiŋgbil nì gbikintib bin cáá ntoom tikpil tikpilee kí tɔ̄ bi-pu,

¹⁸àá tipeebilindi tin baa nyí a dáá pée náań mpɔmin, i cáá mbum ní ki ŋūǹ kí nyāntí ŋŋmi ti-nyɔmmunee kí tɔ̄ bi-pu, àá kí dū nnyiim min cáá kuwoouee kí kpátí, àá kí yàntī itaaŋmɔŋmɔ ń nyā bi-nimbiliŋin.

¹⁹An kaa sá tipeebilindee toom ŋmaniŋma di bàà làá kpɔ̀ binib gbanti, ama bi yaa bàà pée wál̀-tèe, dinyoondi di bàà kù-bi.

²⁰Báà an yaa kaa sá tipeebilindi gbanti, a pée ŋūǹ kí púfí dibaba ní bí lábití kí lítí, kí dū a-deedeeu kí jà-bi, ní kí dū a-fooku kun cáá mpɔnee kí yàaǹ-bi. Ama a pée ŋmāntì tikɔkɔ ní ki bɔ́ntì dicɔ́til nì nnyiŋfi poon[45].

²¹A-pɔŋkpaaŋŋuee làá nīn pée bí a-cee ní á dūú tɔ̄ ditundi, ní ubɔ kaa ŋūǹ kí jáǹ-ŋu.

²²Tiŋman, sii ceeyee, duulinya kɔkɔ bí kii nnyiŋfi fiii ŋun bi dūu páaǹ saniya puee ní, a lì kii ditaafaamalindi nín jòotī kitiŋ pu puee[46].

²³Ama a sūǹ tikɔkɔ saai kun puee a ŋūǹ tikɔkɔ, ní ki fàtī a-boon ki tìì bi-kpitii kí ŋmā kí pɔ̄-bi ŋyunti bí kpántí bi-ba.

²⁴A néeń tin kɔkɔ pée bée, ní kaa ná tiwan tin a náańee báà kubɔbɔ. A yaa bàà ná ti-kansikin kubɔbɔee, aa bàà nāantí-kù.

²⁵Mana ní sii yaa kaa là yii tiba ń nīn bí kí yúntée, tì làá nīn bí kí yúntí? Mana ní tiba ŋūǹ kí nīn bí sii yaa kaa bí yii tí nīn bí?

²⁶A yàntī tiwan kɔkɔ bí dimaŋfalin, kun puee tì sá a-yati, ti-Dindaan, sii un di néeń dimaŋfalee.