Read Ntcham Sagesse 13 Bible Online

Sagesse 13 - Ntcham bible

Sagesse 13

¹Binib bin kɔkɔ kaa nyí Unimbɔtee sá bigbaambi ní. Baa ŋúń ki kpēē tiwammɔntiil tin bi wāĺee kí béé un di sá úŋ̀wuee, kaa tí ŋúń ki dū uwannaanli wanti tin u náańee pu ki béè-u[52].

²Ama ŋŋmi nì kubuŋu nì kubuŋkpaaŋŋu, nì iŋmalbi nì nnyim min pɔ̄ɔ̄yee nì ŋwìiń nì uŋmal ní bi dūu yíiń inimbɔti in kpòotī duulinyee.

³An yaa yíì tiwan gbanti nyaaŋku pu ní bi dū-tì ki yíiń inimbɔti. Ama bi máaǹ kí béé yii tiwan gbanti kɔkɔ kpiliu jítiǹ-tì, di sá yii un di náań-tèe di sá kunyaaŋŋu nyeel.

⁴An yaa yíì tiwan gbanti pɔŋŋu nì ti-tuuŋŋi di ŋáań-bi bitii, ama bi máaǹ kí kpèè tiwan gbanti nín bí puee kí bàà béé yii un náań-tèe cáá mpɔn.

⁵Di sá yii ti yaa kpēē tiwannáaŋkaal kpaanti nì ti-nyaaŋkuee, ti ŋūǹ kí dūú ŋmàntī ní kí béé un ní Unáanli baasii sée.

⁶Ama taa ŋūǹ kí wòoǹ binib gbanti tikpil. An yaa yíì bi nín bíi nyàab̀ Unimbɔti puee, nì bi nín là kí ká-uee di yāntì bi wáŋkì.

⁷Bi bí u-tuuŋŋi kansikin ní ki bíi nyàab̀ ní kí yàntī tin bi wāĺee ń ŋmàtiǹ-bi, di sá yii tiwan tin bi wāĺee ŋān̄ ní.

⁸Nì míǹ kɔkɔee bi mun kaa cáá nnaakpal.

⁹Bi yaa lafun kpántì biciŋfitiibi, ki bífì ki béè duulinya bɔɔŋŋi, kin mana ní baa ŋúń ki ká un di sá tiwan kɔkɔ kpiliuee?

¹⁰Bin dū bi-mákal ki páaǹ tiwan tin kaa cáá dimaŋfalee puee gbí falaa. Tiwan tin bi dū bi-ŋalii ki kpítèe ní bi cáa yíì inimbɔti. Tiwan tin bi kpítì ki dū sindaariya nì animbil ki nyūntèe, nì tin bi kpítì ki nántiǹ tiwaŋkuti nì ipeelee, àá ataŋkpee ŋin kaa ti kèetī ubɔ kpítì an yúntèe[53].

¹¹Tí dūú ŋmàntī udɔgaal di sēekì ndɔ ní an kaa ti pɔ̄ɔ̄ ditúndi. Ní u dū dinyil ki nákatì disupɔkɔl, ní ki túń di-pu ditundi kii an nín máaǹ puee ní ki dūu ŋá disambil din bi ŋūǹ kí dūú ŋá tibee.

¹²U nín kpítì ndɔ ndɔgimu mun kíǹee, u dūu kpāā ŋŋmi ki ŋá tijin ki jíń ki díkí.

¹³Ndɔgimu gbanti poonee, kidɔgiŋ kiba bí kaa ti pée kèetī tiba poon, di sá yii an sá kidɔgiŋ kin pɔ́ĺ ki cáá akpinee. Udɔgaalee yōoǹ kidɔgiŋee ki kpítì ki kɔ̄ntì u-nimbiliŋ. U kpítì kidɔgiŋee soooo nì dinyil poon ní ki dūu kpítì ki nántiǹ unil

¹⁴àá kuwaŋkuluu kun kaa pée bí tibanee. Míǹ boonee u nyàab̄ galuulaman ki gbáń ki bīiǹ laakin cáá cáá aliki alikee.

¹⁵U nyàab̄ ŋkɔŋkoon ŋun máaǹee ki tīī-dì, ki dū-dì ki dīntì digundi ní ki nyàab̄ mpiin ki kpáá-dì ki nákáǹ.

¹⁶U pée ŋá u nín ŋūǹ puee kidɔgiŋee ń taa lítí, kun puee u nyí kì nín kaa ŋūǹ kí tūtuǹ ki-bee, di sá yii an sá tiwaŋkpítikaal, ní an bàlifī bí tūtuǹ-tì.

¹⁷Ama u yaa làá mèè kí nyàab̀ tigaajawan àá u-nimpuu pu àá u-biyaamu puee, waa cáá icoo kí sòoǹ nì tiwan tin kaa cáá dimaŋfal gbantee. U mèé tin kaa cáá mpɔnee tí tīī-u ŋgbampɔn,

¹⁸ní ki mèé tin kpíìyee ń tīī-u dimaŋfal, ní ki gbàam̄ tin kaa pée ŋūǹ kí tūtuǹee tí wúń u-pu, ní ki mèé tin kaa ŋūǹ kí còom̀ee, tí céeǹ-u u-saŋkindi poon.

¹⁹Ú ŋmā kí ká kí jī, kí ŋmā kí tɔ̄ u-tundi ní u-ŋal pu tundi ń bútí-uee, u mèé iŋal in di kaa cáá mpɔnee ń tīī-u mpɔn.