Read Ntcham Sagesse 15 Bible Online

Sagesse 15 - Ntcham bible

Sagesse 15

¹Ama sii ti-Nimbɔtiuee, a ŋān̄ ní ki bí deedee. A cáá kimɔtii ní ki kpòotī tikɔkɔ nì a-poommɔŋŋu poon[54].

²Báà ti yaa ŋá ikpiti, ti sá ki tīī-si ní, di sá yii ti nyí a-pɔŋŋu. Ama taa làá ŋá ikpiti, kun puee ti nyí a nín nyí ti-pu yii ti sá a-yabee.

³Tiŋman, unil yaa nyí-see, see ú nīn bí deedee, ní un yaa nyí a-pɔŋŋuee cáá dimákal yii u làá nīn bí talku.

⁴Unil nín náań tiwaŋkpitil tiŋyee kaa yāntì ti gáatì, kaa ti yāntì bin mɔ́ntí bi-ba ki lèekī tiwan tin kaa kèetī, àá ki cáá inyiŋfi nín bí pu i-ba i-ba ki lèekī footab biŋyee mɔ́ntì-ti.

⁵Bigbaambi yaa ká tin bi ŋée, an nyàatī-bi ní kunaŋu kun kaa cáá dimaŋfal ki yú jìninee dátí-bi.

⁶Bin kpítí awaa gbanti nì bin néeń-ŋi ki jáaḿ-ŋee néeń ki ŋáań ikpiti, ní ki máaǹ kí fōō dimákakulindi paati tin dɔ̄ ki cí-bee.

⁷Uyɔɔmaati dù difaŋgiil ní kí búuń kí tāā kuyɔkɔu ní kí mā asambil ŋin ti cáa ŋáań tiwan baabadalee. Kuyɔkɔbaantiiuee ní u tí dūú mā asambil ŋin bi làá dūú ŋá tiwammɔntiilee nì ŋin báà ŋma pée ŋūǹ kí nīn cáa ŋáań min u lèe. Ama uyɔɔmaati di lèekī bi nín làá nīn cáá kun u bíi māāyee ki ŋáań kuŋyee[55].

⁸Míǹ boonee ní ú dū kuyɔkɔbaantiiuee kí mā diwaal din kaa bée ní kí gīī fám. Too, ntam gbantin ní u nyánní ní an kaa làá yúntí u làá fàtīí gítí ntam min poon u nyánnée, ŋyunti ŋun ní Unimbɔti làá dāá fàtīí fōō kinaŋ kin u nìn dūu pīnnì-uee[56].

⁹An nín bàà sá ú dàkafì ŋkúm min u làá kpú ŋwindal nì u-maŋfal nín kaa fɔ̀kɔ̀ee puee, ní u là kí ŋá kii bin tūǹ sindaariya nì animbil tundee, ní ki cáá u-ba ki túŋkíǹ bin dùntī tasa kútee. U dàkafī yii u yaa bíi mɔ́ɔ̀ tin kaa sá tiŋmanee, u làá ká tinyool ní.

¹⁰U-pɔbil pée sá kii ŋfantamee ní. Ntam sɔ́ǹ kun pu u mákée ní u-maŋfal kaa cáá kudapɔɔu ki bàn̄ kuyɔkɔu.

¹¹Di sá yii waa nyí un di máń-uee. Too, úǹ di púfì kinaŋ kin tūǹ ditundi nee nì ŋfam min yàntī unil bí dimaŋfalinee ki ŋá u-ni[57].

¹²Úǹ dàkafī yii ti-maŋfal sá kii abiyaagbiilee ní, ní ti-bítam bí kii kinyɔŋ kin poon ní ti ŋūǹ kí ká animbil tikpilee. U lì yii unil máaǹ kí ká an kɔkɔ pu ipaati, báà kí dī isaŋkpiti pu.

¹³Unil gbanti baasii nyí ki jítiǹ báà ŋma yii u bíi ŋáań ikpiti, ŋyunti ŋun u cáá kuyɔkɔbaantiiu ki māā asambil ŋin pɔ̀fèe nì awaayee.

¹⁴Ti-Dindaan, a-nibul nannanliibi nì bin nìn wɔ́b̀-bee sá bigbaambi ní, mbiyaamu gba nyíǹ-bi.

¹⁵Bi dū atimbun kɔkɔ waaŋi ki ŋá inimbɔti. Awaa gbanti cáá animbil ama ní kaa wāĺ, ŋi cáá imaŋfataabun ama ní kaa fòotī, ŋi cáá atafal ama ní kaa gbìl̀, ŋi-ŋalii cáá ŋŋambiyaamu ama ní kaa ŋūǹ kí gbēē tiba, ŋi cáá ataa ama ní kaa ŋūǹ kí còom̀[58].

¹⁶Awaa gbantee, nisaaleen di máń-ŋi. Un máń-ŋee mun fōō kufoou kun bi dūu pīnnì-uee ní. Too báà unil kaa ŋūǹ kí mɔ́ɔ́ diwaal din làá nīn náań nì uee.

¹⁷Unil sá un kúùyee ní, ní tin u pée ŋūǹ kí dū u-ŋalii in ŋáań ikpitee kí náańee làá nīn sá tiwan tin mun kaa bí dimaŋfalinee ní. Úǹ u-ba sɔ́ǹ tiwan tin u jáaḿee: úǹ fōō dimaŋfal, ama tiwan gbanti pée kpá kí nīn bí dimaŋfalin.

¹⁸Bi jáaḿ tiwaŋkuti tin cáá titantanee. Tiwaŋkuti tin lóò dinyil tin kɔkɔ kíǹee kansikinee.

¹⁹Tiwaŋkuti gbanti kaa ŋān̄ nnimbikpee kí ŋmā kí dáaĺ unil kii tin kíǹee. Ŋyunti ŋun Unimbɔti nìn bíi pàkà ki bìintí u-wannaaŋkaati puee, u nìn súntì tíǹ pu.