Read Ntcham Sagesse 16 Bible Online

Sagesse 16 - Ntcham bible

Sagesse 16

¹An pu ní tiwaŋkuti tiba mun dáaĺ bin jáaḿ-tèe tafal kii an nín máaǹ puee, ní tiwaŋkuti tikpil yāntì bi jíń falaa.

²Ama ti-Dindaan, an nín bàà sá á dáaĺ a-nibul tafalee, kulaŋŋaŋfitiiu ní a dàkā-bi. A nìn bɔ́ntì njikpacimamu[59] ki tīī-bi bi jíń, tijin tin mɔ̄ ki kù ŋkùmee.

³Bi-nannanliibi bin ŋkùm nìn cáá bi nyàab̀ tijin kí jēe, ŋyunti ŋun a dū tiwaŋkuti tin cáá titantanee ki tɔ́ bi-puee, ŋkùm nìn kpíì bi-poon. Ama a-nibul din ŋkùm nìn cúú ŋyunti fiii poonee dāa ká tijin tin mɔ̄ee ki jíń.

⁴An nìn sá yii bin nìn sàantí-bee, ŋkùm ń cúú-bi ŋkpitim pu, ama ní a-nib ń nīn bí ki kpèé bi-nannanliibi nín jīǹ falaa puee.

⁵Báà nì min kamaa a nìn dū tiwaŋkuti tin cáá tiloolee ki tɔ́ a-nibul pu ní ikoobu in fù i-biŋŋi puee júntì ki kūū-bee, a-ŋuul kaa nìn cūtì ndan ki kūū ki nāaǹ-bi.

⁶A nìn là kí kpāafì-bi ní ki yāntì bi fāŋkì ŋyunti fiii poon. Míǹ boonee, a nìn tīī-bi difiil daaŋku kí ŋmā kí téetí-bi a-marau bɔkpaafikaati.

⁷Un yaa nìn fātì u-ba ki túĺ kudaaŋŋuee nìn kāntí difiil, ní an kaa nìn sá tiwan tin bi nìn kpèéyee di nìn yì-tì ní bi kāntí difiil, ama sii ti-kɔkɔ fiiliu pu ní bi nìn kāntí difiil.

⁸Míǹ ní a nìn ŋá ní ki dàkā ti-nannanliibi yii sii di fìil̄ unil ki nyāntí tibɔkpitil kɔkɔn.

⁹Bimbee, isii nì inaakitoon di nìn júntì ki kūū-bi, ní baa nìn ŋúń ki ká nnyɔkɔ ki fīī-bi, di sá an nìn máaǹ yii tiwaŋkuti gbanti ń dáaĺ bi-tafal míǹ[60].

¹⁰Ama a-biyaamuee, ikoobu in cáá tiloolee nyiŋŋi kaa ŋúń ki kūū ki céetì-bi di sá yii a-poommɔŋŋu poonee, a jòoń-bi ki cáaǹ-bi.

¹¹Ikoobu in nìn júntì-bee nìn téetí-bi a-bɔkpaaŋi, ama a nìn fīī-bi malaa, án nín làá ŋá pu bí taa súntí tikɔkɔ pu, ama kí nīn gbíntìi nìkì ki fòol̄ a-ŋantee.

¹²An kaa sá tifaapibiti àá ŋkpam di nìn cáaǹ-bi, ama a-nyɔɔbundi din cāantí tikɔkɔee[61] di nìn cáaǹ-bi, ti-Dindaan.

¹³Di sá sii di cáá dimaŋfal nì ŋkúm pu mpɔn. A yàntī binib ń sìntī ditaŋkpiilin ní kí fàtīí yàntī bí jɔ̄mìń[62].

¹⁴Unil ŋūǹ kí dū ntoonam kí kpɔ̀ u-juti, ama waa ŋūǹ kí gíiǹní kufoou kun nyánnée, ní kaa tí ŋūǹ kí fīī kinaŋ kin pīī ditaŋkpiilinee.

¹⁵Ubɔ kpá ki ŋūǹ kí sāǹ kí ŋmátí a-ŋaan.

¹⁶A dū a-ŋal ŋun cáá mpɔnee ki gbáń binikpitib bin kaa nìn là kí béé-see. Utaakpaan nì ataanyiŋkumbil[63] ŋin nyáń ŋi-bee nì utaa un cáá kubuŋkpaaŋŋuee nyáń bi-pu, ní ŋŋmi wùn̄ ki céetì-bi.

¹⁷Kun gíti sá atulim bɔtee di sá nnyim min gbíntí tikɔkɔee, ŋŋmi bí ŋu-poon ki mɔ̀tīi fòol̄ bìlbil. Di sá yii duulinya jáà ki kútí deedeedambi pu ní.

¹⁸Iyunti iba poonee, aŋmilimbilee bàtī kí taa wà kí céetí tiwaŋkuti tin a dūu tɔ́ a-nannanliibi puee, ama bi yaa ká mimmee bí béé yii Unimbɔti bɔsooŋyi di bíi jì-bi.

¹⁹Iyunti iba mun poonee, ŋŋmee nìn fòol̄ nnyim kansikin nì mpɔn, kí ŋmā kí wà kí céetí kitiŋ kin kaa bí deedeeyee wanti tin kì lòon̄ee.

²⁰Ama a nìn tīī a-nibul ituun jinti. A nìn tīiń-bi doooo yilpu tijin tin bɔ́ntì[64] baa ŋá ti-pu báà digìńdee. Tijin gbanti nìn ŋān̄ ki sɔ́fì ki nìn mɔ̄ ki tīī báà ŋma.

²¹Tijin tin nìn nyēeń a-cee gbantee nìn dàkà a nín mɔ̄ ki tīī a-biyaamu puee, ama tì nìn mɔ̄ ki tīī un kamaa jīǹ-tèe ní ki kpántí báà ŋma nín là puee.

²²Tì nìn bí kii ntaayim àá dinyintaŋkpalee[65] ní. Nì míǹ kɔkɔee, ŋŋmi kaa nìn ŋáań-tì tiba ní taa nìn dùntī mun. A nìn ŋá míǹ kí dàkà a-nibul yii ŋŋmi ŋun nìn fòol̄ ataanyiŋkumbil kansikin ki tòó itaaŋmɔŋmɔ utaa poonee làá wà kí céetí binannanliibi kpaajinti.

²³Ama ŋŋmi gbanti mbaanti nìn súntí mpɔn ŋun ŋu cááyee pu kí ŋmā kí yàntī deedeedambi ń ká kí jī.

²⁴Tiwan tin a náańee bɔ́ntì kí tɔ̄ ditundi kí tīī sii ti-náanliu. Tì dàntī kii butɔbuee kí dáaĺ binikpitib tafal, ama ní ki pɔ̀fintí ti-ba kí ŋá bin máká a-puee tiŋan.

²⁵An pu ní tì ŋūǹ kí fōō dikpántil kɔkɔ nì di-bulifi. Tì nìn bí a-ŋanti tin nìn kpántí tijinee taapu, ki nóó nì bin nìn bàlifēe nín là puee.

²⁶Ti-Dindaan, míǹ ní a-biyaamu mun a néeńee làá bīfì kí béé yii an kaa sá tikpaajin di kpīintí unil, ama a-nyɔɔbundi di yàntī bin fōō-si ki kííyee bí dimaŋfalin[66].

²⁷Tijin tin ŋŋmi kaa nìn wùn̄ ki bíil̀ee, ŋwìiń tuntuŋku fiii yéè di nìn dùntī-tì.

²⁸A là kí dàkà-ti yii ti máaǹ kí jāam̀-si kí wàatī ní ŋwìiń ń nín nyā, ní kí mèè-si kí wàatī ní kutaa ń nín wúntí.

²⁹Ama un kaa nyí tiŋanee mákal làá dùntī kii nsɔnsɔm yuntiŋu pɔ̀ńdee ní, ní kí pùub̀ kí búntí kii nnyim min kaa ti kèetēe.