Read Ntcham Sagesse 17 Bible Online

Sagesse 17 - Ntcham bible

Sagesse 17

¹A nín sòoǹ tibɔti puee nyóò ní ki pɔ̄ɔ̄ unil ń ŋmā kí gbìl̄ taapu. An pu ní binib bin lóò Iciinee wáŋkì.

²Binikpitib gbanti nìn là kí jī a-circir nibul pu dinyandi. Bi kpántì dibɔmbɔndi sarkadambi nì kunyeeu kun yúntèe yumbui. Bi nìn pīī bi-diiŋŋin, ní ki lántì a-neendi din bí talkuee.

³Bi nìn dākafì yii bi làá ŋmā kí báĺ bi-kpitii in bí dibalinee nlansum ŋaabuŋu ŋun gbìfèe boon. Ama bi nìn sáǹ ki yàl̄ ní ki kɔ́ dinyoondi dikpaandin, ní tin bi nìn kāntée nìn fàantí-bi.

⁴Laakin bi nìn sáń ki bāal̀ee kaa nìn yàntī bí taa fàŋkì. Kuwoou kun nìn pɔ̄ɔ̄ kaŋkaŋee nìn māntìi tú-bi ní bi kāntí ifaŋfanti in nìn yɔ̀l̄ i-nimbiiŋyi gbí kunimbaauee.

⁵Ŋŋmi ŋun nìn pɔ̄ɔ̄yee kaa nìn ŋūǹ kí ŋmíntí-bi ní iŋmalbijaa in wāĺ tiŋanee kaa nìn kíí kí ŋmíntí kunyawambiiu gbanti.

⁶Kun bi nìn pée wāĺee di sá ŋŋmi ŋubɔ di pée fòol̄ ŋu-baba ní ki fàantí-bi. Ŋŋmi gbanti yaa nìn wáŋkèe, bi nìn fàŋkí ní bi yaa nìn wāĺ-ŋuee, an gíti fàantí-bi ki lákatì.

⁷Bikpaŋkpantiibi nyimɔntuuŋŋi kaa nìn gíti cáá mpɔn. Bi nìn dàkafī yii bi cáá Iciin, ama ní ki nìn fòol̄ icoo[67].

⁸Bin nìn bí yii bi pɔ̄ɔ̄ ki jì bibunliibi pu tifaandi nì kun ŋáań-bi yári yaree, kufaaŋŋu nìn yāntì bíǹ bi-ba búŋkì ní an nìn mɔ̄ tilaal.

⁹Báà tiba yaa kaa nìn bí kí fàaǹ-baaa, ipeel nín jītí puee nì ikoobu nín sūǹ puee nìn fàantí-bi.

¹⁰Bi nìn kúù kufaaŋŋu, ní ki nìn yíití kí ŋúbití bi-nimbiliŋ kí kpèè dibɔmbɔndi din poon bi nìn bí kaa ŋūǹ kí sāǹ kí ŋmátée.

¹¹Di sá binikpitib dàkà yii baa cáá dipɔbil ní ki kù bíǹ bi-ba bɔti. Bi-landɔkɔjaatiŋu kɔ́kɔĺ-bi ní agìń mɔ̀tīi kútí.

¹²Di sá yii un fàŋkée sá un di kaa là u-landɔkɔŋu ń tūtuǹ-uee.

¹³Ti-nee, ti yaa kaa máká ditutundi gbanti puee, taa béetí kun pu ti bí ki jīǹ falaayee ní falaa mɔ̀tīi kútí.

¹⁴Kunyeeu gbanti kaa nìn cáá báà mpɔn. Ku nìn nyáń ditaŋkpiil din mun kaa cáá mpɔnee taapu taapu ní. Binib gbanti mun kaa nìn ká ŋgeemmɔntiim ki gèen̄.

¹⁵Ifaŋfanti di nìn jì-bi ní bi-wunti dūu kpíì baa ti cáá mpɔn kí ŋá tiba, di sá yii kufaaŋŋu kun pu baa túkúee cúú-bi dicilpu dicilpu.

¹⁶Míǹ mbaantiim ní un kamaa nìn bí niinee nìn lítí kitiŋ, ní ki nìn pīī sarka un kaa cáá kipunyɔkɔee poon.

¹⁷Ukpaaleeee, uwaŋkpaaleeee, utɔntɔnli un gbāā kuteeu pu ki tūǹ ditundi din pɔ̄ɔ̄yeeyeeee, nnaabu gbanti nìn túuǹ báà ŋma ní baa nìn gíti ŋūǹ kí ŋá tiba.

¹⁸Di sá yii dibɔmbɔmbaantiilee di nìn bóob́ bi-kɔkɔ kii ikusakee. Kubuŋu nín jītí puee, inoon in tɔ́kɔ́ asupan ŋin cáá tifaal pu ki gà ilan in mɔ̄ee, nnyim min pùub̀ múlmul nì mpɔnee,

¹⁹ataŋkpee ŋin lítée wooku, tiwaŋkuti tin sáń baa wāĺ-tèe nín yùkufī puee, ipeecuncuti nín sūǹ puee, àá kuwoou kun nyēeń njoofaŋfakaminee, tíǹ gbanti kɔkɔ nìn fàantí-bi ní bi-wunti kúù.

²⁰Laan kɔkɔ nìn kíǹee, ŋwalifikpaan di nìn ŋmíntí duulinya ní báà ŋma nìn nìkì u-tundi an kaa cáá digìńdi.

²¹Bíǹ baba pu ní kunyeeu kun nìn nyìm̀ gbantee nìn dàn̄, kunyeeu kun di sá dibɔmbɔŋkpaandi kun làá dāá màntīí tū-bi bi-kúm dalee naŋkuee. Ama bíǹ bi-ba nìn gíti sá diwaŋgul din nyìm̀ ki jítiǹ dibɔmbɔndee.