Read Ntcham Sagesse 18 Bible Online

Sagesse 18 - Ntcham bible

Sagesse 18

¹Ama ŋwalifikpaan nìn bí ki ŋmíntí bin sá a-yabee. Bi-nannanliibi nìn gbìl̀ bi-neeŋyi pu, ama ní kaa wāĺ-bi. Bi nìn bí-bi yii bi bí mmɔnni, kun puee baa bíi jīǹ falaa kii bimbee[68].

²Bi nìn bíi jáaḿ-bi yii bí taa tɔ̀ falaa un bi yāntì bi jíńee pɔntooŋyi, ní ki nìn gbàam̄-bi bí dū bi nín jáń nì bi puee kpitii kí pɔ̄-bi.

³Ama dibɔmbɔndi paaŋŋu puee, a nìn tīī bin sá a-yabee ntagbanloon ŋun sá ŋŋmee ŋú kpòotī-bi nsan ŋun baa nyée poon. Ŋu nìn bí kii ŋwìiń ŋun mɔ̄ee ní ki nìn céeǹ-bi bi-saŋkindi din nìn sá tinyool yalee poon[69].

⁴Ama bi-nannanliibee, an nìn kítì yii bí taa nín̄ cáá ŋwalifi ní dibɔmbɔndi ń cúú-bi kí pìin̄ sarka. Di sá yii bi nìn cúú a-biyaamu kuyuŋu. Too, bíǹ mun pu ní duulinya bàà làá dī kí ká a-marab walifiŋu ŋun kaa kúù jaanjaanee.

⁵Bi nìn lēē yii bi làá kpɔ̀ bin sá a-yabee bipɔmmu, ní kibiki kibaba nìn ká difiil kaa kpíì. Kí dáaĺ bi-tafalee, a nìn yōoǹ bi-biyaamu tikpil ní ki nāaǹ mu-kɔkɔ dicilpu nnyiŋkpaam poon[70].

⁶A nìn sòon̄[71] nì ti-baabi kunyeeu gbanti pu bí nīn fàal̀ nì dibatɔl. Di sá yii bi nìn nyí ipoon in bi nìn fōō ki kííyee nín pɔ̄ɔ̄ miŋyee.

⁷A-nibul nìn kā ki cí kunyeeu gbanti ń nīn sá difiil ki tīī deedeedambi, ní kí nīn sá dinàandi ki tīī binannanliibi.

⁸Tiŋman, kun a nìn dūu dáaĺ binannanliibi tafalee nìn kpántì tinyool wanti ní ki tīī-ti, di sá yii a nìn yíiń-ti a-cee.

⁹Dibalinee, bin tɔ́-see naantiibi bin bí deedeeyee nìn ŋá saraabi. Bi nìn kpáfì kinyɔkɔ kí nīn tɔ́ a-marau, an dàkà yii bin sá circirdambee ń yàkatī tiwammɔntiil[72] nì dinimbinaamandi. Bi nìn gà inyɔŋki laŋyi in nyánní ti-naanjab ceeyee.

¹⁰Binannanliibi biilii di nìn kíikí-bi. Bi nìn gbìl̀ ndan binib nín yáliŋkí ki sūǹ bi-biyaamu puee.

¹¹Uyumbu nì un tɔ́ u-bee nìn fōō ditafadaabaantiil, biniyaŋyambi nì ubɔti nìn bí ki jīǹ falaabaanti.

¹²Bi-kɔkɔ dicilpuee, bi nìn kúù ŋkúmbaantiim ní. Bi nìn cáá anikpil an kaa bí ŋkaan. Binifoobi kaa nìn ŋūǹ kí síb́-bi, di sá yii bi-biyaamu mun cáá kudapɔɔuee kpíì dicilpu dicilpu.

¹³Bi nìn ŋá mpɔɔgbifin bi-kpaŋkpantiibi tuuŋŋi pu, ama bi nín dāa ká bi-biseebiyaamu nninjabiyaamu kpíìyee ní bi nín béè yii dinibul nee sá Unimbɔti biyaamu[73].

¹⁴Diŋmiŋŋmil nì ŋgbansɔŋfi nìn bí an kɔkɔ pu, ní kunyeeu mun nìn cōom̀ ku-saŋkindi ki bàn̄ kansikin nì kansikin.

¹⁵Niinee a-nyɔɔbundi din pɔ̄ɔ̄yee yíkìń yilpu dibeejal pu. Di yùkū ki jéetì mbusu tiŋki nee pu kii ujanjal un kaa sūǹ isaayee.

¹⁶Dì nìn ŋúbiń a-bɔkpaal kii kitàataajiki kin jītí pámpamee[74]. Dì nìn tūū kutagbɔŋu, ama ní ki nìn còom̄ kitiŋ pu. Dì nìn kíĺ ditundi ní ki kūū binib ki bíl̀ an kɔkɔ fìlfilfil.

¹⁷Kpalaayee, bi dámintì tidamintiil tin fàantí-bee, ní dinyoondi kɔ́-bi.

¹⁸Bi nìn lítì ki dɔ̄ an kɔkɔ pu kaa kpíìyaaa, kaa wāĺ mun, ní ki nìn lì kun pu ní bi bíi kúùyee.

¹⁹Di sá tidamintiil tin nìn fàantí-bee nìn tùkū-bi ki síiǹ, án nín làá ŋá pu bí taa kpú kaa nyí kun pu bi kpíìyee.

²⁰Deedeedambi mun dáká ŋkúm cɔŋkii ki ká ní an pɔ̀n̄ binib tikpil kuteeun, ama ti-Dindaan, a-ŋuul kaa nìn yúntì[75].

²¹Di sá yii unil un pu baa kāntí tikpitilee nìn ŋá malaa ki wúń bi-pu. U nìn yōoǹ u-saraaŋatundi janjawanti, an dàkà yii ŋwimmeem nì talaalutuukaa un yàntī bí ká ikpiti pɔ̄tamee. U nìn yúl̀ ki bíitiǹ a-ŋuul ní nnaabu gbēeǹ. U ŋá míǹ ki dàkā yii u sá a-tɔntɔnliu.

²²Waa jáń ki pɔ́ɔkiǹ a-ŋuul nì dikpabil àá tijanjawan tin pɔ̄ɔ̄yee. Nì dinyɔɔbundi ní u nìn dūu jíń un a nìn yāntì u bíi dátí binib tafalee pu dinyandi. U nìn téetì a nín nìn pūtì ki pōoǹ ti-naanjab ipoon iŋyee pu.

²³Ŋyunti gbantee, binib pée kpíì ki nyìkī tɔb pu. Niinee ní u cūtìi yúl̀ ŋkúm nì samaa kansikin ki cúú mì nín wúliń puee ki síiǹ, ní ki pīiǹ nsan ŋun cá binifoobi ceeyee.

²⁴Duulinya kɔkɔ nìn bí u-saraaŋabɔkutikpaandi pu. Bi nìn ŋmàn̄ Isirayeel yab naanjab yiŋŋi ŋin cáá tinyoolee ataŋkpamɔnti kuulii inaa pu, ní a nín sá ukpaan puee daaŋku nìn náká ŋŋaabu ŋun nìn fìn̄ u-yilee[76].

²⁵Unàanli[77] nín ká mimmee ní u fāŋkì ní ki túlifì u-boon. Tiŋman, a-nibul nìn dáká a-ŋuul ki ká ní an nìn ŋmāntiǹ-bi.