Read Ntcham Sagesse 19 Bible Online

Sagesse 19 - Ntcham bible

Sagesse 19

¹Ama a-ŋuul din kaa sūǹ isaayee nìn nàn̄ binikpitib ki cáa kátì-ku. Di sá yii a nìn nyí kun a làá gíti ŋée.

²Bi nín jìn̄ a-nibul malaa malaa ki yāntì bi búntèe, bi nìn cúú bi-landɔkɔŋu ki kpántì ní ki jìn̄ bi-boon[78].

³Di sá ŋyunti ŋun bi dáá kā dikpool ki kā ki kɔ́ĺ bi-taŋkpiibi kaakuliŋ ki sūǹee, ní bi gíti tí lēē ŋgbaanlandɔkɔ. Binib bin bi nìn gbāam̀ yii bí yīkèe, bi kùl̄ ki páaǹ bi-boon kii binib bin sáǹee.

⁴Bi-winlimbu nín máaǹ kuŋyee di téé-bi ki cūnnì niin, ní bi kpáàa súntì tin jítèe pu, án nín làá ŋá pu bí ŋmā kí fōō ditafadaaldi kí kūtì bi-falaau puee.

⁵Ŋyunti ŋun a-nibul làá còom̀ maamaaci saŋkindee, bíǹ làá ká maamaaci kúm dee.

⁶Di sá yii tiwannáaŋkaal kɔkɔ nì ti-buluku fātìi pɔ̄ntì ki tɔ́ a-marab, án nín làá ŋá pu tikpitil tiba ń taa bàń a-biyaamuee.

⁷Bi nìn ká ditagbandi bīiǹ dinaapaal pu, ní ntaŋkulim nyáń laakin nnyim nìn bée. Tikati mɔɔl nìn kpántì didandi din pu diganlakal kpée, ní tinyiŋgban kpántì kii kitimpiliŋ kin cáá tifaapɔnee[79].

⁸Niin ní a-nibul kɔkɔ jítì, a-ŋal wúń bi-pu ní bi ká a-maamaaci tuuŋŋi.

⁹Bi nìn kpátì ki gbí kii itaamu[80] nín bí kunaakpaapɔɔun puee ní. Bi nìn yùkufī kii apibilee ki nyɔ́ŋkí sii ti-Dindaan un di nìn fīī-bee.

¹⁰Bi gbíntìi téetí tin nìn jítì bi-pu ŋyunti ŋun bi nìn bí kuyuŋunee, min ní an bàà sá kitiŋ ń nyāntí tiwaŋkutee, kì dūu nyántì inaacibee, min ní an bàà sá dimɔɔl ń wùliŋkì ijɔmee, dì dūu wūliŋkì kpaabee[81].

¹¹Míǹ boonee, bi nìn ká inooncaan in pée nyáń i-bee ŋyunti ŋun ní ŋkùm nìn yāntì bi bālifì tijin tin mɔ̄ee puee.

¹²Kí ŋmā kí kpíiǹ-bee, njikpacimamu nìn nyánní tiŋkun ní[82].

¹³Ditafadaaldi nìn jéetì binikpitib pu. Ama kí wàatī míǹ ń bàńee, utaa nìn ŋmɔ́ ki tīī-bi kudaaŋŋu. An nìn máaǹ bí fōō ditafadaaldi din bi nìn fōō bi-toonam puee, di sá yii bi nìn dàkā binicambi pu kináŋ[83] kin gíti lákatì mara puee.

¹⁴Biba[84] nìn yíì kaa nìn fōō binicambi bin nìn túutì bi-puee. Ama bimbee, bi nìn dū binikɔkaabi bin nìn ŋá-bi tiŋanee ki kpántì iyumbu.

¹⁵An kaa dóò. Ditafadaaldi dɔ̄ ki cí bin nìn fōō binicambi kii binannanliibee.

¹⁶Bi nìn jíń jiŋaal nì dipɔɔpindi ki fōō-bi. Bi nìn tīī-bi kun bíǹ bi-ba yèe. Ama ní boonee ki dū atuun ŋin pɔ̄ɔ̄yee[85] ki nyīī-bi ki múĺ.

¹⁷An pu ní bi nìn kpántì bijɔfub, kii bin nìn yú deedeedaan punyɔkɔpuee. Dibɔmbɔŋkpaandi nìn māntìi tú-bi ní báà ŋma nìn kíǹ ki nyàab̀ u-punyɔkɔki.

¹⁸Kubeeu puee, ŋŋmii kamaa cáá ŋu-siim ní. Iŋmiiyee mɔ́ɔkí ki tìì tɔb kí ŋmā kí nóó ilan nín bí pu i-ba i-bee. Míǹ ní tin mun bí duulinyanee dūu kpáfì isan tikpil poon. Kun nìn jítèe ŋūǹ kí yàntī tí wāl̀ míǹ tiŋan.

¹⁹Di sá yii tiwaŋkuti tin còom̄ kitiŋ puee kpántì nnyim poon yati, ní tin bí nnyiminee kíǹ ki còom̄ kitiŋkuliŋŋi pu.

²⁰Ŋŋmi nìn fòol̄ nnyimin nì mpɔn ki jítiǹ mì nín kpààa fòol̄ puee, ní nnyim kaa ti kpáàa ŋūǹ kí gbíntí-ŋu.

²¹Ama aŋmilimbil kaa nìn wù tiwaŋkuti tin pɔ̀fì ki còom̄ nnyiminee. An kaa nìn dūntì tijin tin nyánní Unimbɔti ceeyee, tijin gbanti mun nìn náań nì dinyintaŋkpal din dùntī sɔkɔmiiyee ní.

²²Tiŋman ti-Dindaan, isan tikpil poonee, a yōoǹ a-nibul yilpu ki tīī-dì tinyool. A dū-dì ki fá, ama a pée bí di-cee ní ŋyunti kamaa nì laakin kamaa dì yaa bée.