Read Ntcham Sagesse 2 Bible Online

Sagesse 2 - Ntcham bible

Sagesse 2

¹Di sá yii baa dàkafī tiŋan ní ki lì tɔb cee yii: «Ti-maŋfal kaa fɔ̀kɔ̀ ní ki gbí kunimbaau. Unil wiiŋŋu yaa sāāyee, nnyɔkɔ gíti kpá, ní taa tí ká ubɔ mun nyánní ditaŋkpiilin ki gítìń.

²Bi pée màl̄-ti yìkíl̄ yikil ní, ní míǹ boonee án làá nīn bí kii taa pée kāl̀ kitiŋ pu doo ki kée. Kufoou kun nyēē ti-maŋfataabuŋyinee sá kii nnyiimee ní, nlandɔkɔ sá kii ŋŋmiyatiyaal ŋun nyēē ŋyunti ŋun ti-pɔbiliŋ bíi tūǹ ditundee ní.

³Ŋu yaa kpíìyee ní tiwun ń kpántí kii ŋfantamee, ní kufoou ń wāŋkì kii kubuŋu kun baa ŋūǹ kí cúúyee.

⁴Ŋyunti pée bée ní bí dāá súntí ti-yindi pu ní ubɔ kaa ti làá téetí ti-tuuŋŋi pu[4]. Ditagbandi yaa jítèe, baa ti kāntí kudaaŋŋu, míǹ ní ti-maŋfal bí. Dì làá wāŋkì kii dipɔ̀ńdi din ŋwìiń jìn̄ ní kutuntuŋu yāntì dì wáŋkèe ní.

⁵Tiŋman, ti-maŋfal wiiŋyi jītí kii mboon nín jītí puee ní. Baa ŋūǹ kí kpántí ti-kúm wiiŋŋu, di sá yii bi pée síiǹ-ŋu dibaba pu ní ní ubɔ kaa ti ŋūǹ kí gítí u-boon.

⁶An puee tí jīmaan tiwammɔntiil tin bée kí fàal̀maan, tí dū difaŋgiil kí jī tiwannáaŋkaal pu kii ti-naacimpɔntinee.

⁷Tí nyɔ̀maan ndamɔntiim, kí yàam̀maan talaalumɔntiibi. Tí taa súntí kí kìtī nsupumpukum min péé ki nyánnée.

⁸Tí dūmaan kibeefuulii kin bi dū nsupumpukum ki ŋée kí cíkiń kí wàatī mí nín fáaḿ.

⁹Ubɔ ń taa kàkatī u-ba kí wàatī ti-jiŋaalib nee, tí yàntī ti-pɔɔpindi daanti an kɔkɔ. Di sá yii ti cáá nsan kí ŋá míǹ, ti mun jandi dee.

¹⁰Tí sàam̀maan bin sá bisoodambi ki sá deedeedambee. Tí taa sɔ̄ bikpiipoobi saai, kí taa tīī bitikpilib bin yikpiti píil̀ee disíndi.

¹¹Timbi ceeyee, un pɔ̄ɔ̄yee di cáá mbaamɔn di sá yii iwɔsɔfi kaa kèetī.

¹²Tí píĺ kí cīití deedeedaan, u páb́-ti, ki pìkil̄-ti tin ti ŋáańee poon, ki wòoǹ-ti ti nín yìntīǹ maree pu, ní ki kɔ́kɔĺ-ti ti nín kaa yú deedee nì didàkal din ti fōōyee pu.

¹³U sòoǹ yii úǹ nyí Unimbɔti ní ki yíì u-ba ti-Dindaan biki.

¹⁴U kpākantí-ti ti-landɔkɔi kɔkɔ poon, ní ti yaa ká-uee, an kpántí diwaŋgul ki tīī-ti.

¹⁵Di sá yii waa bí kii bin béeyee nín bí puee ní u-bimbim pée nyáń mi-ba.

¹⁶Ti bí u-cee kii tiwan tin bíil̀ee ní ní u sáń ti-saŋyi kii titampummoolee. U sòoǹ yii nnaam di dɔ̄ ki cí deedeedambi, ní u gà u-bindi ki lì yii Unimbɔti sá u-baa.

¹⁷Tí kpèè tin u lèe yaa sá mbaamɔn! Tí cɔ̄ŋkì kí kpèè án nín làá dāá kúntíǹ-u puee.

¹⁸Deedeedaan yaa lafun sá Unimbɔti bikee, mimmee Unimbɔti di làá jòoń-u ní kí fīī-u u-nannanliibi ŋaan[5].

¹⁹Tí dū asiibil nì disàandi kí cɔ̄ŋkì-u kí kpèè. Niinee ti làá béé u-baamɔŋyi ní kí kpèè u nín cáá kimɔtii puee.

²⁰Tí sòoǹ kí kpɔ̀ u-bɔti yii u máaǹ icoo kúm, di sá yii u pée néeń ki lì yii Unimbɔti làá fīī-u.»

²¹Bi nín dàkafī puee dee, ama bi bí ki mɔ́ntí bi-ba ní. Di sá yii bi-kpitii yāntì baa ti wāĺ.

²²Baa nyí Unimbɔti landɔkɔi in bál̀ee, kaa máká ipaati in dɔ̄ ki cí circirdaanee pu. Baa fōō ki kíí yii tinyool dɔ̄ ki cí bin nammu kaa cáá tijɔkɔndee.

²³Unimbɔti náań unil ú taa kpú ní, ní ki náań-u ki nántiǹ úǹ u-ba nín bí puee[6].

²⁴Ama Sitaan poompooŋyi pu ní ŋkúm kɔ́nní duulinyan[7] ní bin bí u-jandi púee máaǹ kí kpú.