Read Ntcham Sagesse 3 Bible Online

Sagesse 3 - Ntcham bible

Sagesse 3

¹Deedeedambi nammu kā Unimbɔti ŋaan ní, falaa ubɔ pée gíti kpá kí gbēē-bi.

²Bigbaambi bíǹ ceeyee, bi dàkafī yii bi kpíì ní, ní bi-yīkitam duulinya nee poonee sá kii asaluuee,

³ní bi-kpátam ti-kansikinee sá katanjoolii. Ama ní bíǹ bí ŋgbansɔŋfin.

⁴Bi nìn máká Unimbɔti pu yii u làá tīī-bi dimaŋfal din kaa kúntée, ama binib bíǹ nìn dàkafī yii bi-kpitii pu ní bi jíń falaa.

⁵Bi jíń falaa fiii, ama bi làá dāá jī nnaam min sá ŋkpaamee[8]. Di sá yii Unimbɔti cɔ́ŋkì-bi ní ki ká yii bi máaǹ kí nīn sá u-yab.

⁶U nìn cɔ́ŋkì-bi ki ŋá-bi circir kii bi nín cɔ́ŋkí sindaariya ŋŋmin puee[9], ki fōō-bi kii saraawɔkaa ní bi ŋá nsaraafan puee.

⁷Unimbɔti bɔsooŋyi dalee, bi làá dāá nīn jìl̀ ní, bi làá dāá nīn bí kii iŋmiyatiyaal nín fòol̄ kumoou kú wà pu niin niinee ní.

⁸Bi làá dāá sòoǹ atimbun[10] bɔti ní kí dāá jī anibul pu dibeel, ní ti-Dindaan ń dāá nīn sá bi-bɔtiu kí nīn cá jaanjaan.

⁹Bin máká ti-Dindaan puee làá dāá béé ibaamɔn. Bin yúl̀ nì u deedeeyee làá dāá nīn bí u-cee dineendi poon. Di sá yii ti-Dindaan dàkà bin u lútèe u-laŋŋaŋfitiiku nì u-poommɔŋŋu.

¹⁰Binikpitib bíǹ làá dāá fōō bi-landɔkɔi nín máaǹ ditafadaaldi diŋyee ní. Di sá yii bi kpēē deedeedambi fám ní ki dū ti-Dindaan ki fá.

¹¹Bin kaa dū Iciin nì i-dakaŋ ki yíiń tibee gbí falaa. Baa pée máká tiba pu, ní bi-pɔ́ɔǹtam sá fám, ní bi-tuuŋŋi kaa làá pée kèetī-bi tiba poon.

¹²Bi-nimpoobi kaa nyí tiba, bi-biyaamu sá bitɔŋfitiibi ní mbusu làá jēetí bi-naantiibi pu.

¹³Unimpu un sá uŋmaŋŋmanti, kaa kpáfì nì uninja ŋkpāfitam min kòó ki kɔ́ tijɔkɔndinee bí mmɔnneeee! Ibɔsoon dalee, u làá dāá fōō tipaal.

¹⁴Ufaal un mun kaa ŋá tikpitil ní kaa dākafì ti-Dindaan pu ilandɔkɔkpitee bí mmɔnneeee! U nín yúl̀ nì Unimbɔti deedee puee, u làá dāá fōō tipaal tin nyáń ti-bee, ní kí kàl̄ tinyool paaŋŋu pu ti-Dindaan diikun[11].

¹⁵Di sá yii un túń atunnyaanee làá fōō tinyool paati ní. Iciin bí kii busubu bun nyaaŋyi kaa kúùyee ní.

¹⁶Ama an kaa bútí bilaakpaadambi biyaamu, ní mbiyaamu mun bi màl̄ ŋkpāfitam min kòóyee poonee làá wāŋkì.

¹⁷Báà bi yaa kāl̀ ki yúntì, baa làá kàaǹ-bi kí kūtì binib pu, ní bi yaa púĺee, bi làá nīn kpèé ki sìŋkīǹ-bi áli bi-kúm dal.

¹⁸Bi yaa tí kpíì malaayaaa, baa làá nīn cáá dimákalaaa, kaa làá ká diŋmeendi ibɔsoon dal.

¹⁹Di sá yii kun dɔ̄ ki cí unikpitee dāa pɔ̄ɔ̄.