Read Ntcham Sagesse 4 Bible Online

Sagesse 4 - Ntcham bible

Sagesse 4

¹An sɔ́ á taa nín̄ cáá mbiyaamu kí nīn ŋáań tiŋan. Bi kpá kí súntí bin ŋáań tiŋanee pu jaanjaan, di sá yii Unimbɔti nì binib làá lēē bi-pu mmɔ́ɔn.

²Bi-maŋfal wiiŋyi poonee, bi làá nīn sá ŋabika. Bi yaa kaa bée, an wù binib ní. Talku duulinyau un bí ki dòońee poonee, bi làá dāá dū dijajil beefuuliiki kí cíkiń-bi, di sá yii bi jáń tipaal tin kaa bíiĺee jaaku ki jíń dinyandi.

³Ama bin kaa dū Unimbɔti ki yíiń tibee biyaamu kaa bí tiban, báà mu yaa wīikí. Mu bí kii kumooun sufiiyee ní, i-nyaaŋyi kaa kóò kitiŋ poon ní kaa cáá dinyeel din sá dimɔntiilee.

⁴Báà ŋyunti ŋubɔ poon fiii i yaa tɔ́ apanaaa, iaa pɔ̄ɔ̄. Kubuŋu yaa pée fáá-i fiiiyee, i làá cìŋkì ní. Kubuŋkpaaŋŋu yaa jítèe ní í kpìkitī kí lítí.

⁵I-pambiyaamu kaa láá pɔ́ɔkì ní kí kɔ̄fì. I-biliŋ kaa làá nīn kèetī, di sá yii ŋi làá nīn sá agaan ní ubɔ kaa làá ŋmā kí ŋmɔ́-ŋi.

⁶Ibɔsoon dalee, mbiyaamu mun bi màl̄ ŋkpāfitam min kòóyee poonee làá dāá nīn sá kii mu-baabi bimbikpitim seerauee ní.

⁷Báà deedeedaan yaa kaa bàn̄ u-wiiŋyi ní ki kpíì, u làá ká diŋuŋfil.

⁸Bi tìì utikpil disíndi, ama an kaa nín sá u-puti àá abin ŋin nyɔkɔm u ŋée pu.

⁹Iciin ŋūǹ kí fōō tiyikpipin paaŋŋu, ní dimaŋfal din pu baa kāntí tikpitilee ŋūǹ kí fōō tiputi paaŋŋu.

¹⁰Tí dūú ŋmàntī kii kinaacimpɔmbiki di bí ki fáatiǹ Unimbɔti, ní Unimbɔti néeń-u, ní u nín kóò binikpitib kansikinee puee, Unimbɔti yōoǹ-u.

¹¹U yōoǹ-u míǹ ikpiti ń taa gátí u-landɔkɔi inyimɔn ń taa ŋmàtiǹ-u.

¹²Tiŋman, ikpiti dátí binib ní baa ti wāĺ tiŋan. Unil nín là tiŋyee pɔŋŋu ŋūǹ kí yàntī deedeedaan ń gáatí.

¹³An kaa súŋkì ní kinaacimpɔmbiki nee kpántì umɔnti, a lì kii unil un kāl̀ ki yúntèe.

¹⁴U-naŋki fáatiǹ ti-Dindaan, an pu ní u yōoǹ-u duulinyakpiti nee poon. Binib ká míǹ ní kaa gbìl̄ taapu, ní kaa dū abɔɔn gbanti ki ŋá bi-taalin.

¹⁵Unimbɔti dàkà bin u lútèe u-ŋanti nì u-poommɔŋŋu, ní ki wúǹ bin bí circiree pu.

¹⁶Báà deedeedaan yaa kpíì, u kù binikpitib bin dáá gbíntìi bí dimaŋfalinee bɔti ní. Unipɔɔn un kpántì umɔnti tantaasee mun kɔ́kɔĺ bin kāl̀ ki yúntì ki dáá gbíntìi sá binikpitibee ní.

¹⁷Binib kāntí uciŋfiti kúm. Ama baa gbìl̀ kun ti-Dindaan là kí tīī-uee taapuɔɔɔ, kaa ti nyí kun pu ní u dū-u ki síiǹ laakin tiba kaa ti làá ŋmā kí ŋá-uee taapu.

¹⁸Bi làá ká míǹ ní ki kpèé fám, ama ní ti-Dindaan bí ki lāā-bi.

¹⁹Bi yaa kpíìyee, binib kaa làá fàtīí nīn tɔ́ bi-wunti. Ditaŋkpiilinee, icoo di làá nīn gbíntìi dī-bi. Unimbɔti làá lēē-bi bi-paaŋŋu pu ní kí dū-bi kí lúkú kitiŋ bi-yil ń cɔ̀b̄, baa cáá tiba kí lì. U làá cúú-bi kí cìŋkì áli bi-nyeeŋŋi ní bí kpántí ŋwɔsɔfimu áli bi-kúm dal. Bi làá nīn bí iween poon míǹ, ní ubɔ kaa ti làá téetí bi-pu jaanjaan.

²⁰Bi yaa láa bíi sòoǹ binikpitib kpitii bɔtee, bi dāa sútí kí pìl̄ ní bi-wunti gbáà kpàkpakpa, ní bi-kpitii ń dāá nyā bi-pu ki kɔ́kɔĺ-bi.