Read Ntcham Sagesse 5 Bible Online

Sagesse 5 - Ntcham bible

Sagesse 5

¹Niinee deedeedaan làá dāá nīn yú nì dimákakpaandi, bin nìn wɔ́b̀-u ki kpèé u-pɔ́ɔǹtam fámee nimbiin.

²Binib gbanti yaa láa ká-uee, dinyoondi làá dāá cúú-bi, ní an ŋá-bi bitii bí ká yii u ká difiil min baa bàà mákée.

³Bi làá dāá nīn yáliŋkí ki nyàab̀ kufoou kaa làá ká, ní ki lì tɔb cee nì kunimbaau yii:

⁴Un ti nìn lāā njamin ki bèel̄ee dee. Ti nìn ŋá digbaandi páaa! Ti nìn dākafì yii u nín bí puee sá kuwaatiiu, ní u-kúm sá ticoobɔti ti-cee.

⁵An ŋá mana ní u dāa kútì Unimbɔti biyaamu nì circirdambi pu ní?

⁶Mimmee ti nìn dū mbaamɔn saŋŋu ki fá deeyaa! Deedee walifiŋu kaa nìn ŋmíntì ti-pu ní ŋwìiń kaa nìn nyáń ti-pu.

⁷Ti nìn dū ti-ba ki múĺ ikpiti sàmbiyaamu mun nàantée poon, ki cōom̀ ki pūntì kuteeu kun kaa cáá nsàmbiyaamuee, ama taa béè ti-Dindaan saŋŋu.

⁸«Ba ní ti-bayoondi kútì-ti? Tigaajati tin pu ti nìn cáá dilambilee kútì-ti ba?

⁹Tíǹ gbanti kɔkɔ wáŋkì kii mboonee, a lì kii tibɔti tin unil sòon̄ kubuŋu yōoǹ ki cáa búntèe.

¹⁰Ti nìn bí kii meela un kóò tinyiŋgban kansikin ní baa ti kāntí u-fuuŋŋu, u-taapu mun kaa yāntì kudaaŋŋu tinyiŋgban puee ní.

¹¹Ti nìn gíti náań nì unoon un ŋàaǹ kutaa puee ní. Unoon yaa ŋàan̄ ki jítèe, baa ti kāntí u-saŋŋu. Di sá yii u cáá u-feeŋyi ki gbáà kubuŋu, ní kí dū u-pɔŋŋu kí cátí nsan, ama míǹ boonee, baa ti kāntí u nín jítì puee tabɔbiliŋ.

¹²Bi yaa màkā tiba ní ki tɔ́ mpiin, kubuŋu kun ŋu cátèe fàtīí gítiń ku-laŋki, ní baa ti kāntí mpiin nín dī laakiŋyee.

¹³Míǹ ní ti mun bí. Bi tin pée màal̀-tee, ti kpáàa wáŋkì. Taa ŋúń ki ŋá tiŋan ki bíl̀ ti-boon bí ká, ti-toonam di ŋmɔ́ ki kūū-ti.»

¹⁴Tiŋman, unikpiti mákal bí kii tifeel tin kubuŋu yòontée ní, a lì kii dipɔ̀ńdi din kubuŋkpaaŋŋu yòontée. Dì wáŋkí kii nnyiim min kubuŋu yòontée, a lì kii bi nín téetí unicaan un kɔ́ u-juti pu ŋwimbaanti puee ní.

¹⁵Ama deedeedambi bíǹ bí ní talku. Ti-Dindaan di pà bíǹ paati, ní Yilpu Fɔ́ŋŋŋ Nimbɔtiu kpèé-bi.

¹⁶An puee, bi làá dāá fōō u-ŋaan kibeefuulii kinyaaŋŋi nì dibeel daaŋku kun cáá tinyoolee. Di sá yii u làá dū u-ŋantil ŋgiil yɔŋu kí wúń bi-pu, ní kí dū u-ŋal kí bìin̄ bi-pu.

¹⁷U làá dāá dū u-faŋgiil din u cáa tɔ̀ ipɔntoonee ní ki ŋá u-janjawanti, ní kí dāá dū u-wannaaŋkaati kí ŋá tijanjawan kí dáaĺ u-nannanliibi tafal.

¹⁸U làá dāá dū u-deedeeu ní kí ŋá dijanjabɔkutil, ní kí dū u nín sòoǹ tibɔti deedee puee kí ŋá kijanjafuulii.

¹⁹U làá dāá dū u-circir bítam min ubɔ kaa ŋūǹ kí já kí pɔ̄ɔkiǹee ní kí ŋá digbampɔɔl,

²⁰ní kí dū u-ŋuul din pɔ̄ɔ̄yee kí ŋá kitàataajiki[12] ní duulinya kɔkɔ ń dāá kūtì u-pu kí jáǹ bigbaambi.

²¹Kii ipiin in bi màkā tiŋan ki dáaĺ butɔbu mun tiŋanee, míǹ ní utaa nín ŋmóò puee làá nyānní atagbanni kí cùú yā kun bi tɔ́ee.

²²Ataanyiŋkumbil làá dāá nīn lítí bi-pu nì diŋuul poon kii ditaŋkpal din bi dū kujaataafuŋ ki tɔ́ee. Tiŋkun nyim làá dāá nīn jáà nì bi nì tininjati, ní amɔɔ nyim ń bìin̄ bi-pu kaa làá sɔ̄ bi-saai.

²³Kubuŋu kun pɔ̄ɔ̄yee làá dāá yīkì bi-pu ní kubuŋkpaaŋŋu kubɔ ń dāá yòon̄-bi. Inikpiti làá dāá yàntī kitiŋ kɔkɔ ń kpántí kii kuteeuee, ní tikpitil diŋál ń dāá cúú abee ŋin pɔ̄ɔ̄yee kí lábití kí cìb̄.