Read Ntcham Sagesse 6 Bible Online

Sagesse 6 - Ntcham bible

Sagesse 6

¹Nimbi bibɔtiibee, ní pīlifìmaan kí gbìl̄ taapu! Kitiŋ pu kpootiliibi kɔkɔ, yàntīmaan bí dàkà-ni!

²Ní kpòom̄maan ni-tafal, nimbi bin di sá anikiti kpilib, ní an mɔ̄ǹ-ni ní nīn kpòotī atimbun kupaauee.

³Ibaamɔnee, ti-Dindaan di tīī-ni mpɔn, Yilpu fɔ́ŋŋŋ Nimbɔtiu di tīī-ni ni-beel pɔŋŋu[13]. Úǹ di làá dāá cɔ̄ŋkì ni-tuuŋŋi ní kí dāá kpèè ni-landɔkɔi tiŋan.

⁴Nimbi bin di bí u-beel tundinee, naa sòon̄ tibɔti deedee, kaa tɔ́ mara, ní kaa tí ŋá ki nóó nì u nín là puee.

⁵An pu ní u làá dāá cíĺ ni-pu dicilpu dicilpu nì tifaandi poon, di sá yii u làá dāá sòoǹ binikpaambi bɔti an nīn pɔ̄ɔ̄ ní.

⁶Tiŋman bi ŋūǹ kí sɔ̄ bin sīntiǹ bi-ba taapuee saai kí dū bi-kpitii kí pɔ̄-bi. Ama bi làá dāá kpèè bipɔɔbi bɔti nyíki nyiki ní.

⁷Di sá yii un sá tiwan kɔkɔ Dindaanee kaa làá dāá fàŋkì ubɔ, ní kaa làá dāá kpèè yii ŋma sá ukpaan. Úǹ di náań ŋwaamu nì bikpaambi ní ki kpèé bi-kɔkɔ mbaantiim[14].

⁸Ama u làá dāá sòoǹ bin cáá mpɔnee bɔti nyíki nyiki ní.

⁹An puee nimbi bibɔtiibi ní m bíi sòoǹ nì, án nín làá ŋá pu ní bīfì kí nīn cáá Iciin kí taa gáatée.

¹⁰Bin tɔ́ circir marab tiŋanee, bi làá dāá yíiń-bi circirdambi, ní bin yāntì marabee dàkā-bee, bi làá dāá mɔ̄tì bi-pu ibɔsoon dal.

¹¹An puee ní pīlifì m-bɔti, kí nīn néeń-tì nì ni-pɔbil kɔkɔ ní tí dàkà-ni.

¹²Iciin jìl̀ ní i-walfiŋu kaa kúù. I yàntī bin néeń-iee[15] kāntí-i sɔkɔmii, ní ki yàntī bin nyàab̀-iee kāntí-i.

¹³I túŋkí bin là-iee ní, íǹ di péetí kí lēē i-ba kí dàkà.

¹⁴Un yaa yíkì malaa kí nyàab̀-iee kaa làá gīī. Udaan làá ká-i i kā i-punyɔkɔpu.

¹⁵Un di dàkafī i-puee dàkà yii u cáá dinyil. Un di kaa gèeǹ i-puee làá nyā ilandɔkɔn an kaa làá sūŋkì.

¹⁶Di sá yii i yìiǹ an kɔkɔ pu ki nyàab̀ bin di máaǹ-iee ní. I cífiń bi-saŋyi pu nì kulaŋŋaŋfitiiu, ní bi-landɔkɔi kɔkɔ poonee, i túŋkí-bi.

¹⁷Iciin nyeel di sá á nīn baasii là í dàkà-si[16].

¹⁸A yaa là í dàkà-see, see á nīn néeń-i. Kí nīn néeń-iee dàkà yii a ŋúb́ i-marab. Á nīn ŋúb́ i-marabee dàkà yii a cáá dimákal yii a pée gíti kpá kí kpú,

¹⁹ní kí taa kpúee dàkà yii a bí ki kɔ́ĺ Unimbɔti.

²⁰An puee á nīn là Iciinee cáǹ-si dibeel cee ní.

²¹Míǹ puee, nimbi anibul bɔtiibi, ni yaa néeń dibeel nì mbɔtikpandɔee[17], ní nīn tìì Iciin tinyool, mimmee ni làá nīn sá bibɔtiibi kí nīn cá talku.

²²Ama ba di sá Iciin ní? I nyánní la ní? M làá tùkù-ni, kaa làá dū abɔɔn kí báĺ-ni. M làá pée cù i nín kíĺ pu ki bée ní táb. M làá pée dū kun an bàlifī unil ń dūú béé-iee kí bíĺ mpaampiin pu, maa làá kàkatī kí wàatī mbaamɔn.

²³Maa làá tí yàntī nnimbidiki ŋun nàantée ń kpòotī-mi, di sá yii nnimbidiki nì Iciin kaa kpáfí.

²⁴Biciŋfitiibi yaa wīikée, duulinya kāntí difiil ní, ní ubɔti un cáá dinyilee[18] tìì u-nibul nnaam.

²⁵An puee yàntīmaan m-bɔti ń dàkà-ni ní án tūtuǹ-ni.