Read Ntcham Sagesse 7 Bible Online

Sagesse 7 - Ntcham bible

Sagesse 7

¹Ma mun sá unil un làá kpú kii báà ŋmee ní. Ma mun pée nyáń unipeekaa un bi dū ntam ki máńee ni ní. Unimpu ubɔ poon ní bi dū-mi ki kpántì tiwunnan.

²Iŋmal saalaa ní u-fatikuu tīī-mi mpɔn. Uninja ninjati nì ŋgeem mɔŋŋu poon ní m kpántì unil.

³Bi nín màl̄-mee, ma mun fōotì kubuŋu kun sá ti-kɔkɔ yɔkuee ní ki lítì kitiŋ kin pu báà ŋma pée jīǹ falaa nee. Kii báà ŋma nín pée ŋá puee, m-biiliŋu mpeekaa nìn sá nsiim ní.

⁴Bi nìn dū satab ki bóob́-mi, ní ki kpēē-mi tiŋan.

⁵Ubɔti ubɔ kaa kíĺ u-maŋfal wiiŋyi mbamin.

⁶Unil kamaa pée dì nsambaanti ní kí kɔ́nní duulinyan ní kí tí dī nsambaanti kí nyā u-ni.

⁷An pu ní m mēē ní Unimbɔti tīī-mi dinyil. M gbāam̀-u ní Iciin fam kɔ́nní m-ni[19].

⁸M nìn néeń-i ki jítiǹ dibeejal àá mbɔtikpandɔ. Man ceeyee, tigaajati kaa cá Iciin cee.

⁹Maa dū-i ki ŋmāntiǹ ŋwimmeem min cáá kudapɔɔuee, di sá yii duulinya nee gaajati kɔkɔ bí kii dibul fiiiyee ní i-cee, ní animbil bí kii tikpatee i-nimbiin[20].

¹⁰M néeń Iciin ki jítiǹ ŋgbampɔn nì kunyaaŋŋu, ní m lēē-i í nīn sá-mi ŋwalifi, di sá yii i-walfiŋu kaa kúù jaanjaan.

¹¹Ama i tīī-mi tiwammɔntiil kɔkɔ dicilpu. I nìn ŋúb́ i-ŋaan tigaajati tin kaa bí ŋkaanee.

¹²M dáká Iciin wammɔntiiti kɔkɔ, di sá yii íǹ di cáań-mi tíǹ gbanti kɔkɔ. Ama maa nìn pée nyí yii íǹ di yì-tì ní m ká tíǹ gbanti.

¹³Kun ní m bífì sɔkɔmii i-ceeyee, nì dipɔbil diba ní m làá dūú yàkatī kí tīī, maa làá dū i-gaajati kí báĺ.

¹⁴Di sá yii Iciin sá tigaajakpaandi tin kaa dóotée ní ki tīī binib. Bin di dū-i ki túń ditundee kpántì Unimbɔti bɔɔbi, ní didàkal ŋanti tin nyánní i-ceeyee fáatiǹ-u.

¹⁵Unimbɔti ń pɔ̄-mi dinyil ḿ sòoǹ, ní kí ŋmā kí dàkafì kí nóó nì apɔl ŋin m fōōyee nín máaǹ puee, di sá yii úǹ di kpòotī Iciin ní ki kpòotī biciŋfitiibi mun.

¹⁶Timbi ti-ba nì ti-nyɔɔbuŋŋi kā u-ŋaan, ki kpáaǹ dinyil kɔkɔ nì ŋŋmam kɔkɔ.

¹⁷An pu ní u pú-mi ḿ ŋmā kí béé tin kɔkɔ pée bée. U dàkā-mi tin bi dūu náań duulinyee nì tiwan tin bée tuuŋŋi[21].

¹⁸U dàkā-mi ŋyunti kíltam nì ti-kansikin nì ti-kúntitam mun, nì ŋwìiń nín còom̄ puee nì iyunti nín kpántí puee,

¹⁹nì abin nín dòoń ki kpántí puee nì iŋmalbi paaŋyi,

²⁰nì tiwaŋkuti bítam nì ipeel bimbim, nì ŋfaŋkpitim pɔŋyi nì binib landɔkɔi, nì isufi nì i-buluku nì i-nyaaŋyi nín cáá mpɔn ŋun bi cáa cāantée.

²¹M nyí tin binib wāĺee nì tin baa wāĺee, di sá yii Iciin in di náań tíǹ kɔkɔee dàkā-mi-tì

²²Iciin cáá ŋfam min cáá dinyil ki bí circiree. I bí i-baba ní ki tūǹ ditundi isan cutimaanyi poon. I wálifì ní ki yáb̀. Iaa cáá tijɔkɔndi ní ki wāĺ kílkil ní ki gbìl̀ tikɔkɔ taapu. Tikpitil kaa ŋūǹ kí gbēē-i, ní i néeń tiŋan, ki nyí tin bí ki dòońee.

²³I bí i-ba pu ní, ki ŋáań tiŋan, ki sá binib bɔɔ, ki pɔ̄ɔ̄, ki máká i-ba pu, ki bí soooo, ki ŋūǹ tikɔkɔ, ki kpèé tikɔkɔ, ki kóò ŋfam min cáá dinyil, ki bí circir ki wálifèe ni.

²⁴Di sá yii Iciin yáb̀ ki jítiǹ tin kɔkɔ còom̄ee. I nín bí circiree puee, i ŋūǹ kí jītí tikɔkɔ poon kí kɔ́ tikɔkɔn.

²⁵I sá Unimbɔti pɔŋŋu fooku ní, ní ki nyánní Mpɔŋkɔdaan nyootin táb. An pu ní báà tijɔkɔndi kaa kóò i-ni.

²⁶A yaa ká-iee, a ká jaanjaan walifiŋu dee. I sá Unimbɔti tundi gitil din pu tiba kaa tákée nì u-laŋŋaŋfitiiku naŋku ní.

²⁷I nín bí i-babee puee, i ŋūǹ tikɔkɔ. Iaa kpántí jaanjaan, ní ki pɔ̀ntī tikɔkɔ. Abin abin, i kóò circirdambin kí bɔ́ntí Unimbɔti bɔɔbi nì bibɔnaatiliibi.

²⁸Di sá yii Unimbɔti néeń bin nì Iciin cáá mpèéyee ní.

²⁹Iciin ŋān̄ ki jítiǹ ŋwìiń ní ki wāĺ ki jítiǹ iŋmalbi kɔkɔ. Bi yaa dū-i ki ŋmāntiǹ ŋwalifee, i jítiǹ-ŋu,

³⁰di sá yii kunyeeu di fòol̄ ŋwalifi paaŋŋu, ama tikpitil kaa ŋūǹ kí fōō Iciin paaŋŋu.