Read Ntcham Sagesse 8 Bible Online

Sagesse 8 - Ntcham bible

Sagesse 8

¹I kpátì i-pɔŋŋu kitiŋ kúntinyɔkɔ kiba ki cáa sāā kin kíǹee, ní ki kpòotī tikɔkɔ i-ŋanti poon.

²Iciin ní m néeń ní ki nyàab̄-i doooo m-naacimpɔntin. M nyàab̄ kí dū-i kí ŋá m-nimpuu ní ki kpántì i-nyaaŋku bɔɔn.

³I dàkà bi nín màl̄-i tinyool poon puee, di sá yii i nì Unimbɔti di yàkatī dimaŋfal, ní duulinya kɔkɔ Dindaan néeń-i.

⁴Unimbɔti u-ba di lēē u-ciiŋyi ki dàkā-i, ní i lēē i nín làá nīn tūǹ atuun puee.

⁵Tigaajati ní unil fèefī ki nyàab̀ dimaŋfal nee poon. Ama ba di gíti cáá kudapɔɔu ki bàn̄ Iciin, íǹ in náań tikɔkɔee?

⁶Ti-nyil yaa pɔ̄ɔ̄, Iciin in náań tin kɔkɔ bée kaa pɔ̄ɔ̄ ki jítiǹ-dàaa?

⁷Ni néeń tin tèen̄eeee? Too, Iciin di sá mbimbimɔntiim nyeel, di sá yii i dàkà dibacuul nì ibɔsoon in sá ibaamɔnee, nì tin bí deedeeyee nì dipɔbil, ní duulinyanee, tiba kaa bí ki kèetī binib kii tin bí nee.

⁸Ni là kí gíti kàl̄ duulinya nee poon kí yúntáaa? Iciin nyí tin jítèe ní ki dàkafī tin bí ki dòońee pu. I nyí kí lēē tibɔti tin pɔ̄ɔ̄yee taapu ní kí lēē ipɔɔn taapu kí bíĺ mpaampiin pu. I nyí tidaandi nì maamaacib ki síiǹ ní an nín bàń, ní ki nyí iyunti nín pée bí bí puee mun.

⁹An pu ní m lēē Iciin í nīn sá m-ŋàliŋu, di sá yii i làá nīn sáŋkí-mi ḿ nīn ŋáań tiŋan, ní kí nīn tìì-mi kunyannyaau iyunti in pɔ̄ɔ̄yee nì kunimbaau poon.

¹⁰M lī m-ban yii, i-puee m làá ká tinyool binib kansikin, ní min kamaa m dáá pɔ̀ɔǹee, binicikitikaabi làá nīn tɔ́-mi.

¹¹M yaa sòon̄ unil bɔtee, bi làá ká m-bɔsooŋyi nín nyóò puee, ní an ŋá binikpaambi bitii.

¹²M yaa ŋmíl̀, bi làá cīití-mi, m yaa tí bíi sòoǹ, bi làá kàl̄ soooo kí pīlifì. M yaa tí sòon̄ an yúntì, bi làá dū bi-ŋalii kí bìin̄ bi-nyɔmmu pu.

¹³Iciin puee, m làá kpántí un kaa ti kúùyee ní bin bínní m-boon ki dòońee làá nīn téetí m-pu talku.

¹⁴M làá jī anibul pu dibeel, atimbun làá nīn bí m-taapu.

¹⁵Bibɔtikpaambi yaa láa gbìl̄ bi sòoǹ m-puee, bi làá dāá fàŋkì ní. M làá dāá dàkà m-nibul kulaŋŋaŋfitiiu ní kí nīn cáá dipɔbil kujaaun.

¹⁶M yaa fātìi gítìń m-dumpuee, ní ḿ dòon̄ kí kɔ́ĺ Iciin, di sá yii si nì i yaa tááyee, ntuntun kpá. Si nì i yaa bée, kunimbaau kpá, ama mmɔn nì dipɔɔpindi di bí.

¹⁷M kɔ́ m-ban ki dākafì ní ki dáań ki ká yii unil yaa ŋá mpèé nì Iciinee, waa ti kúù.

¹⁸U nì i yaa píí kubɔɔtiiuee, u kāntí mmɔŋkpaan. I yaa túń u-ni ditundee, u kāntí tigaajati tin kaa kúntée. U yaa cá i-cee múlmulee, u kpántí uciŋfiti. U nì i yaa sòoǹee, u nyēē diyindi. Ŋyunti gbantee ní m kíǹ ki cá an kɔkɔ pu ki nyàab̀ m nín làá ŋá pu kí cáá-iee.

¹⁹Tiŋman, bi nín màl̄-mee, m nìn ŋān̄, ní ki nìn fōō kinaŋ kin sá kimɔntiiyee,

²⁰àá tí lì yii m nín sá unimɔntee puee, m kɔ́ tiwun tin kaa cáá tijɔkɔndee poon.

²¹Ama m nìn béè yii Unimbɔti yaa kaa tīī-mi Iciin, maa làá ŋmā kí ká-i. Á béé un di tìì tiwammɔntiilee dàkà yii a cáá Iciin. An pu ní m fātì m-ba ki túĺ ti-Dindaan ní ki mēē-u nì m-pɔbil kɔkɔ ki lī yii: