Read Ntcham Sagesse 9 Bible Online

Sagesse 9 - Ntcham bible

Sagesse 9

¹«M-naanjab Nimbɔtiu nì ti-Dindaan un poon mɔ̄ee, sii di dū a-nyɔɔbundi ki náań duulinya.

²A dū a-ciiŋyi ní ki náań unil ú jī a-wannaaŋkaati kɔkɔ pu dinyandi[22].

³A bí yii unil ń kpòotī duulinya nì a-lammi nì a-deedeeu poon, ní kí nīn sòoǹ tibɔti nì mbaamɔn.

⁴Tīī-mi a-ciiŋyi in di bí ki kɔ́ĺ a-beejalee ní kí taa jà-mi kí nyāntí a-biyaamu kansikin.

⁵Kpèè, m sá a-tɔntɔnliu nì a-nimputɔntɔnliu jipɔɔn ní[23], unil un pɔ̀fì ní u-maŋfal wiiŋyi kaa náaǹee. Maa pée nyí bi nín sòoǹ tibɔti puee, kaa ŋūǹ kí gbìl̄ a-marab taapu.

⁶Unil yaa sá unimɔnti binib kansikin ní kaa cáá Iciin in nyánní a-ceeyee, waa pée bí tiban.

⁷«Sii di lēē-mi ḿ nīn sá a-nibul bɔtiu, kí nīn sòoǹ a-jipɔmbi nì a-bisalib bɔti.

⁸A bí-mi yii ḿ mā a-diiku a-circir jool pu, ní kí mā nsaraafan kitiŋ kin poon a kóòyee, kí nóó nì a-circir kɔŋkooŋŋu ŋun nìn pée bí[24] doooo ŋkilkaaminee nín bí puee.

⁹«Sii cee ní Iciin in nyí a-tuuŋŋee bí. I nìn bí[25] ŋyunti ŋun ní a náań duulinyee. I nyí tin fáatiǹ-see, nì tin nóó nì a-marabee.

¹⁰Yàntī í nyānní a-circir taakun kí kpákatiń. Tɔ̄ń-i doooo a-nyooti beejal cee í dāá tūtuǹ-mi m-tuuŋŋi poon, ní kí yàntī ḿ béé tin fáatiǹ-see.

¹¹Íǹ di nyí tikɔkɔ ní ki gbìl̀ tikɔkɔ taapu. I làá dū dinyil kí kpòotī-mi m-tuuŋŋi poon ní kí dū i-nyooti kí wúń m-pu.

¹²Mimmee m-tuuŋŋi làá fáatíǹ-si. Niinee ní ḿ sòoǹ a-nibul bɔti nì mbaamɔn ní kí nīn kítì kí ŋmā kí kàl̄ m-baa beejal pu.»

¹³«Unil ulɔu di ŋūǹ kí béé Unimbɔti lammi? Ŋma di ŋūǹ kí dàkafì kí béé ti-Dindaan landɔkɔi?

¹⁴Nisaal landɔkɔi kaa cáá dimákal, ní ti nín dàkafī puee kaa pɔ̄ɔ̄.

¹⁵Di sá yii ti-wunti tin làá sūūyee nyìm̀ ti-pu. Ntam gbaŋŋu nee sá diwaŋgul ní ki tīī ti-fam ní ki tìì-ŋu ilandɔkɔ tikpil.

¹⁶Kpèè an pɔ̄ɔ̄ ki tīī-ti tí ŋmā kí béé tin di bí kitiŋ puee, ki kpáaǹ gba tin di dɔ̄ ki kɔ́ĺ-tee, an pɔ̄ɔ̄ ki tīī-ti tí ká. Too, ŋma di nín ŋūǹ kí béé tin bí yilpuee?

¹⁷Ŋma di ŋūǹ kí béé a-lammi, an yaa kaa sá un ní a tīī Iciin, ki dū a-Fam min bí yilpuee ki tú udaan ceeyee?

¹⁸Míǹ ní bin bí kitiŋ puee fātìi gítìń nsan ŋun tèen̄ee pu, binib bífì ki béè tin nín fáatiǹ-see ní Iciin fīī-bi.»