Read Ntcham Siracide 1 Bible Online

Siracide 1 - Ntcham bible

Siracide 1

¹Iciin nyeel Iciin kɔkɔ nyēeń ti-Dindaan cee ní, úǹ cee ní i bí kí nīn cá jaanjaan[1].

²Ŋma di ŋūǹ kí kàaǹ tiŋku bul nì utaa nyim nín jòotī puee nyɔkɔm, nì duulinya un kaa cáá dikúntilee wiiŋyi?

³Ŋma di ŋūǹ kí béé kutagbɔŋu nín dátìń puee, kí béé kitiŋ nín wāā puee, nì tiŋku nyim nín nyóò puee?

⁴Unimbɔti náań Iciin ki wāatì ní ki nín náań tiwan kɔkɔ. Dinyil landɔkɔŋu pée bí ní doooo jaanjaan.

⁵Iciin nyeel di sá Unimbɔti nyɔɔbundi din bí yilpuee. I-sàmbiyaamu di sá marab bin bí ki cá talkuee.

⁶Ŋma ní an lēē Iciin nyeel ki dàkā? Ŋma di nyí tin i bɔ́ntì kí ŋá dibalinee?

⁸Ubaanti di sá uciŋfiti ní ki baasii sá kuwambiiu, úǹ di sá ti-Dindaan un kā u-beejal puee.

⁹Ti-Dindaan u-ba di náań Iciin. U ká-i ní ki ŋmāntì i-daaku, ní ki dū-i ki pɔ̀l̄ u-wannaaŋkaati kɔkɔ pu[2].

¹⁰U dū-i ki tīī unifoo kamaa nì tiniti, cilinjee u dū-i ki tīī bin néeń-uee[3]. Ti-Dindaan faaŋku

¹¹A yaa fàŋkí ti-Dindaanee, an sá-si tinyool nì dimɔɔndi, nì mmɔn nì ifaal beefuuliiki ní.

¹²A yaa fàŋkí ti-Dindaanee, a-pɔbil pīiǹ ní a bí mmɔnni nì ifaalin ní ki cáá mmaŋfafɔkɔn.

¹³Un fàŋkí ti-Dindaanee, tikɔkɔ còom̄-u tiŋan ní. U-kúm dalee, u làá dāá fōō dibiindi.

¹⁴Á fàŋkì ti-Dindaanee di sá iciin kílilaŋki. Fookiidambee, doooo bi-na poon ní an tīiń-bi Iciin.

¹⁵I máń i-diiku binib kansikin kí nīn cá jaanjaan, i làá nīn yú deedee nì bi-naantiibi.

¹⁶A yaa fàŋkí ti-Dindaanee, a làá nīn sá uciŋfiti tiŋman pu ní. I tìì binifoobi i-biliŋ tikpilku.

¹⁷I gbēentí bi-cindi tin kɔkɔ bi lèe, ní ki gbēentí bi-cakalaabi tin i lòoǹee.

¹⁸Iciin beefuuliiki di sá ti-Dindaan faaŋku. Iciin yàntī nnaam nì ŋgbampɔn ń púkuḿ.

¹⁹I tìì dinyil nì tibɔti taapu digbilindi, ní ki yàntī bin cáá-iee kāntí tinyool.

²⁰Ti-Dindaan faaŋku di sá Iciin nyeel, ní i-paŋŋi sá mmaŋfafɔkɔn[4]. Kimɔtii nì dibacuul

²²A yaa gíí diŋuul dàa cáá taapuee, baa ŋūǹ kí dūú pɔ̄-si. Di sá yii un yaa gíí diŋuulee làá nàan̄ u-ba ní.

²³Unil un cáá kimɔtiiyee ŋmèé ní kí tin kátí-ku, ama kí dāá kúntée, u làá ká mmɔn.

²⁴Waa làá lì tin u dàkafēe kí cáá sāā ŋyunti ŋun an máaǹee, ní báà ŋma ń lì yii u cáá Iciin. Iciin nì tin bí deedeeyee

²⁵Iciin gaajawanti kansikinee, dinyil laŋkpaŋŋi bí. Ama kí nīn yú nì Unimbɔti deedeeyee, an sá ntimbiil ní ki tīī unikpiti.

²⁶A yaa là iciinee, nín̄ tɔ́ marab tiŋan, ní ti-Dindaan ń tīī-si-i.

²⁷Di sá yii ti-Dindaan faaŋku di sá iciin nì dinyil[5]. Tin fáatiǹ-uee di sá ú nīn yú deedee kí nīn mɔ̄.

²⁸Taa yíí kí fàŋkì ti-Dindaan, kí taa sútí kí pìl̄-u nì mili mili pɔbil.

²⁹Taa nín̄ sá mpɔnnyoondaan binib cee, kí nīn nyí nì a-ba nì tin nyēē a-nyɔkɔnee[6].

³⁰Taa yòon̄ a-ba yilpu, kí taa láa fàtīí lítí taapu kí dáaĺ icoo kí tɔ̄ a-ba pu. Di sá yii ti-Dindaan làá bìitī a-bɔɔŋŋi pu. U làá sìntīǹ-si taapu samaa kansikin. Kun puee saa fāŋkì ti-Dindaan, di sá yii aa dɔ́miń u-cee nì kufaaŋŋu, ama diŋmatindi nyɔɔbuŋŋi gbí a-pɔbilin.