Read Ntcham Siracide 10 Bible Online

Siracide 10 - Ntcham bible

Siracide 10

¹Uyidaan un sá uciŋfitee dàkà u-nibul ní, u-nyil di tìì-u mpɔn.

²Uyidaan nín bí puee, míǹ ní u-kàliŋkpilib mun bí. Unil un kpòotī kitiŋee nín bí puee, míǹ ní binib bin u kpòotēe mun bí.

³Ubɔti un kaa nyí tibee nàantí u-nibul ní, ama an bútí abɔtibil ŋin cáá dinyilee tiŋki ní[51].

⁴Duulinya gɔminau kā ti-Dindaan ŋaan ní[52]. Ŋyunti yaa ŋmāntèe, u lèekī ubɔti un máaǹee ní kí kàan̄.

⁵Án bútí unilee, an nyánní ti-Dindaan cee ní, úǹ di tìì umarayóonli tinyool. Dilambil nì tipɔmbɔti

⁶A-juti yaa yīntiǹ-see, á taa dū-u kí ŋá a-poon, kí taa pée ŋá tiba tipɔmbɔti poon[53].

⁷Ti-Dindaan nì biniyaŋyambi ná dilambil ní. Ti-Dindaan nì binib ceeyee, inaamuul sá diyìntil ní.

⁸Tipɔmbɔti nì dilambil nì tigaajati di yì-tì ní dibeel ń nyā dinibul diba ŋaan kí kɔ́ din kíǹee ŋaan.

⁹Unil pée sá titan nì ŋfantam ní. Kin ba pu ní u lámintí? U nín bí dimaŋfalinee, tisuundi di kā ki gbí u-nayin.

¹⁰Ŋween ŋun pɔ̄ɔ̄yee bèel̄ unyɔɔdaan gba ní. Unil un sá ubɔti díǹee, foolee, u fu kpíì dee.

¹¹Unil yaa gíti dáá kpíìyee, kun kíǹ-uee di sá ijiliŋkpaam nì ipeel nì akoosibil.

¹²Unil nín kífí pu kí kpántí ulambidaanee di sá ú fàtī u-boon kí tīī ti-Dindaan, ní kí súntí un náań-uee pu.

¹³Ikpiti di sá dilambil kíltam. Un ŋáań ikpitee tūǹ titumbilindi kɔkɔ nì ti-bulifi ní. An pu ní ti-Dindaan yāntì bi-naabuŋu sá ŋkpaan ní ki nāaǹ-bi kɔkɔ pílpil[54].

¹⁴Ti-Dindaan téé bibɔtiibi ki kpákatì bi-beejaliŋ pu ní ki dū bin sīntiǹ bi-ba taapuee ki kāaǹ bi-paaŋŋu[55].

¹⁵Ti-Dindaan lēē bilambidambi ki dū bin sīntiǹ bi-ba taapuee ki síiǹ bi-paaŋŋu.

¹⁶Ti-Dindaan nāaǹ anibul ŋin kíǹee timmu, u nàn̄-mu dúsi dusi ki tin bàn̄ kitiŋ nyeel.

¹⁷U yāntì mu wáŋkì ki nāaǹ-mu, ní ubɔ kaa ti téetí mu-pu dalba dalba.

¹⁸Ti-Dindaan kaa náań unil ú nīn sá ulambidaan. Baa tí màal̀ ubɔ kí dū-u kí líiǹ diŋuul.

¹⁹Kunibuluu kulɔkɔ di máaǹ jilma ní? An sá binib. Kunibuluu kulɔkɔ di máaǹ jilma ní? Bin fàŋkí ti-Dindaanee. Kunibuluu kulɔkɔ di kaa máaǹ jilma ní? An sá binib. Kunibuluu kulɔkɔ di kaa máaǹ jilma ní? Binib bin kaa tɔ́ marabee.

²⁰Ubɔti nabiyaamu kansikin ní u kāntí tinyool. Ama úǹ u-ba tìì bin fàŋkí ti-Dindaanee ní tinyool.

²²Kun mɔ̄ǹ ugaaja nì unicaan nì usoodaanee di sá bi nín fàŋkí ti-Dindaanee.

²³An kaa kítì bí kpèè usoodaan un cáá iciinee fám, ní kí nīn tìì unikpiti jilma[56].

²⁴Bi tìì unikpaan nì ubɔsoonli nì bikpootiliibi tinyool, ama bi-kansikin báà ubɔ kaa jítiǹ bin fàŋkí ti-Dindaanee.

²⁵Uyumbu un sá uciŋfitee làá dāá nīn cáá bin tɔ́ bi-bee u-tundin. Binib bin cáá nlandɔkɔee kaa làá dāá yāliŋkì. Dibasintil nì ibaamɔn

²⁶A yaa bíi tūǹ a-tundee, á taa nín̄ ŋáań kii a sá uciŋfitee, kí taa nín̄ dàkà a-ba ŋyunti ŋun ní tiba páb́-see.

²⁷An sɔ́ á tɔ̄ ditundi kí nīn cáá tiwan tikpil ki jítiǹ á nīn gà a-bindi kaa cáá kí jī[57].

²⁸M-jipɔɔn, tīī a-ba tinyool nì dibasintil poon, kí taa pàkà a-ba kí lákatí mara pu.

²⁹Ŋma kíikí kí pɔ̀ unil un ŋáań u-ba tikpitilee? Ŋma di ŋūǹ kí pàkà un fá u-jilmau úǹ u-ba yìntitam puee?

³⁰Bi ŋūǹ kí tīī usoodaan jilma u-nyil pu, ama ní kí tīī ugaaja tinyool u-gaajati pu.

³¹Bi yaa tìì usoodaan tinyool, kin u yaa kpántì ugaaja fáà! Unil yaa sá ugaaja ní bi kpèé-u fámee, kin u yaa kpántì usoodaan fáà!