Read Ntcham Siracide 11 Bible Online

Siracide 11 - Ntcham bible

Siracide 11

¹Unil un sīntiǹ u-ba taapuee ciiŋyi pu ní u còom̄ u-yil gáań, ní ki ŋūǹ kí kàl̄ binikpaambi kansikin[58]. Baa sòoǹ unil bɔti dinimbil pu

²Taa pàkà unil u-nyaaŋku pu, kí taa nín̄ ná unil min ní u bée pu.

³Tin ŋàaǹee kansikinee, unaŋgbansii di sá kiwaai, ama u-siiti mɔ̄ ki jítiǹ tikɔkɔ duulinyan.

⁴Taa nín̄ dàkà a-ba tiwan tin a pēēyee pu, bi yaa tí bíi pàkà-see, á taa yòon̄ a-ba yilpu. Di sá yii ti-Dindaan di tūǹ maamaaci tuuŋŋi, tì bál̀ binib cee.

⁵Bibɔtiibi tikpil kpákatì bi-beejaliŋ pu ki kāl̀ kitiŋ ní binib bin pu baa nìn nyée kāl̀ dibeel.

⁶Biyidambi tikpil fá bi-jilimau kpataaa, ní binib bin nyáń diyindee kpántì iyumbu.

⁷Taa kɔ̄kɔl̀ unil kaa bālifì ki béè, dàkafì kí wàatī ní kí nín wòoǹ unil.

⁸Pīlifì tibɔti kí wàatī ní kí nín kíí-tì, unil yaa bíi sòoǹee, á taa gíí u-nyɔkɔpu.

⁹Taa dū a-nyɔkɔ kí bɔ̄ tibɔti tin kaa sá a-yatee poon, taa dū a-nyɔkɔ kí cèeǹ binikpitib jaakun. Tigaajati nì disool bɔti

¹⁰M-jipɔɔn, taa kpàb̄ atuun tikpil dicilpu, a yaa kpàb̄ atuun tikpilee, aa làá ŋmā kí nyā. Báà a yaa bíi sáń, aa làá ŋmā kí bà. A yaa là tina ki là tinee, an kaa làá nyā nnyim.

¹¹Unil ubɔ bí ki bìǹ ki gì, ki jìkì ditundi pu, ama nì míǹ kɔkɔee ní an púntí-u[59].

¹²Biba bí ki sɔ̀m̀ ditundi pu ní an bàlifī yii bí nīn pée tútúǹ-bi ŋma ní. Baa cáá tiba ní ki sá bisoodambi. Ama ní ti-Dindaan ń dàkà-bi u-laŋŋaŋfitiiku, ní kí nyāntí-bi bi-falaau poon.

¹³Ti-Dindaan yāntì udaan yil kíǹ ki gáań, ní án bākatiǹ binib.

¹⁴Tiŋan nì tikpitil, dimaŋfal nì ŋkúm, disool nì tigaajatee, tíǹ kɔkɔ nyēeń ti-Dindaan cee ní[60].

¹⁷Ti-Dindaan wampɔkaati sá ki tīī bin yú nì u deedeeyee ní. U-ŋanti làá nīn kpòotī-bi ní baabadal kí tàkan̄ nsan ŋun tèen̄ee pu.

¹⁸Binib biba kpántí bigaajab, di sá yii bi kpáafí bi-nimbiliŋ nì bi-gaajati. Ama kpèèmaan tin dɔ̄ ki cí-bee:

¹⁹Ŋwiin ŋun bi dāa lì bi-ban yii: «M ŋūǹ kí ŋùŋfì kɔŋkɔnnee, m ŋūǹ kí jī m-gaajati puee», baa nyí iwiin in kíǹ-bi bí dūú kàl̄ kitiŋ puee. Bi làá kpú ní kí yàntī bi-gaajawanti ní ubɔ fám ń dāá yòon̄[61]. Ti-Dindaan ŋūǹ kí cúú tibɔti kí lábití

²⁰Dū a-ba ki tīiǹ a-tundi, tɔ̄-dì nì a-pɔŋŋu kɔkɔ, kí nīn bí ditundi gbantin áli a-kúm dal.

²¹Taa nín̄ kpèé ki nyóosí binikpitib tuuŋŋi. Sii dee, nín̄ pée máká ti-Dindaan pu, kí nīn pɔ̄ɔntí a-tundin. Di sá yii an kaa pée pɔ̄ɔ̄ ti-Dindaan cee ú yàntī usoodaan ń kpántí ugaaja dibɔbil pu.

²²Deedeedambi paati di sá ti-Dindaan biindi. An dáá yì tantaasee, u ŋá tin kɔkɔ bi lèe ki tīī-bi.

²³Taa lì yii: «Ba di gíti páb́-mi? Ba ní m gíti máaǹ kí nīn cáá?»

²⁴Taa tí lì mun yii: «M cáá tikɔkɔ nì tikɔkɔ, dinimbinaamandi dilal di gíti ŋūǹ kí bàń-mi[62]?»

²⁵Nnaam wiiŋŋu dalee, bi súntí nnaabu pu ní, Nnaabu wiiŋŋu dalee, bi súntí nnaam pu ní.

²⁶Binib yaa kpíìyee, an kaa pɔ̄ɔ̄ ki tīī ti-Dindaan ú pà báà ŋma u-tundi paati.

²⁷Kukuluu kubɔbɔ nimbinaamandi yàntī unil ń súntí nnaam min kɔkɔ u jíń u-maŋfal wiiŋyi kɔkɔ poonee. Unil yaa kpíìyee ní bi béetí u-tuuŋŋi nyampooku.

²⁸Unil yaa kaa kpíì, á taa lì yii u bí mmɔnni. Di sá yii unil kúm dal ní bi béetí dinicil din u sée. Nín̄ nyí nì a-ba nì binikpitib

²⁹Taa nín̄ kɔ̄ntí un sá kamaa a-diikun, di sá yii ukiildi cáá isan in pu u ŋūǹ kí dī kí ŋmàtiǹ-see.

³⁰Ulambidaan sá kii ujikpal un bi pīiǹ kunɔmbidiin kí dūú sàl̄ u-jutiibee ní. U bí kii ucɔŋkilee ní, u pée kpèé ŋyunti ŋun a làá lítée ní.

³¹U pīil̀ titalindi ní kí dū tiŋan kí kpántí tikpitil[63]. U sòoǹ ki bíiĺ atummɔnti ŋin máaǹ bí pàkèe.

³²Kii bi nín dù ŋŋmiyatiyaal kí kpāā ŋŋmikpaan puee, míǹ ní unikpiti pīil̀ titalindi ki kù binib.

³³Á nīn nyíǹ a-ba nì unikpiti, di sá yii ikpiti diŋál ŋma pu ní u dàkafī. U ŋūǹ kí bīil̀ a-yindi kí nīn cáa cá jaanjaan[64].

³⁴A yaa fōō unicaan a-dumpuee, u ŋūǹ kí cáań agìń kí tɔ̄ a-pu, ní kí lùkutī a-dicaŋkun yab bí jáǹ-si.