Read Ntcham Siracide 12 Bible Online

Siracide 12 - Ntcham bible

Siracide 12

¹Sii nì bin kpèé Unimbɔti fámee ń taa kpāfì A yaa làá ŋá tiŋanee, á béé un ní a làá ŋée, ní binib ń dāá jāam̀-si a-ŋanti pu.

²Ŋá bin yú nì Unimbɔti deedeeyee tiŋan, bi làá dāá téeǹ-si. Báà bíǹ bi-ba yaa kaa téeǹ-si, Yilpu fɔ́ŋŋŋ Nimbɔtiu làá pà-si.

³Nnaam kaa bí ki tīī unil un ŋáań ikpiti kaa gbèentí, ní kaa pūǹ biwɔfib tibee.

⁴Á pɔ̄ unil un di yú deedee nì Unimbɔtee, ama á taa pée tūtuǹ un sá ukpitiŋalee.

⁵Ŋá unil un sīntiǹ u-ba taapuee tiŋan, ama á taa tīī unikpiti báà tiba. Yíí kí taa tīī-u tijin, di sá yii u ŋūǹ kí dī an pu kí pɔ̄ɔkiǹ-si. U làá dū tikpitil kí pà-si tiŋan tin kɔkɔ a ŋá-uee mili pu.

⁶Yilpu fɔ́ŋŋŋ Nimbɔtiu kaa gèetíǹ bikpitiŋaliibi. U làá dáaĺ binikpitib tafal min di máaǹ-bee[65].

⁷An puee á tīī unil un sá unimɔntee, ama á taa tūtuǹ ukpitiŋal. Ubɔɔti un sá umɔntee nì un kaa sée

⁸A yaa bí digbilinee, aa ŋūǹ kí béé ubɔɔti un sá umɔntee. Ama a yaa kɔ́ dinimbinaamandinee, an kaa pɔ̄ɔ̄ á béé a-nannanliu.

⁹Unil yaa bí mmɔnnee, u-nannanliibi bí kunimbaaun ní. Ama u yaa kɔ́ dinimbinaamandinee, u-bɔɔ gba sáń kí fá-u ní.

¹⁰Taa pée dū a-mákal kí páań a-nannanliu pu, kii tasa kúti nín dámintí puee, míǹ ní u-toom bí.

¹¹Báà u yaa ŋá kii u sīntiǹ u-ba taapu, ki còom̄ ki bōō, á nīn nyíǹ a-ba nì u. Á nīn bí kii unil un jɔ̀lifī digitilee u-cee. Á béé yii u nín dámintì puee kaa làá nīn pée bīī u-pu.

¹²Taa kàan̄-u kí kɔ́ĺ nì a-ba, yaa sá fám, u ŋūǹ kí téé-si kí lúkú kí fōō a-paaŋŋu. Á taa kàan̄-u a-ŋaŋgiil pú tinyool paaŋŋu pu, yaa sá fám, u làá nyàab̀ kí jà-si kí kàl̄ a-jal pu. Di sá yii kí dāá kúntée, a làá dāá tīī-mi mbaamɔn, ní kí dāá téetí anyɔɔbun ŋin m sòon̄ee pu kí yāliŋkì.

¹³Ŋma sūǹ ukòocuul un ukoobu júee pu, àá bin sútí ki pìl̀ ipeecuncuti ní i cúú-bee pu?

¹⁴Míǹ ní baa sūǹ un bɔ́ɔtí ukpitiŋal, ní ki mun kíǹ ki ŋáań ikpitee pu.

¹⁵Unannanli làá kàl̄ a-cee ŋyunti ŋubɔ poon. Ama a yaa gbéetì ki lítèe, u fá-si dee.

¹⁶Unannanli cáá nyɔɔmálmal ní, ama u-pɔbilinee, u nyàab̀ min ní u làá ŋá ní kí téé-si kí tɔ̄ mbòó poonee ní. Unannanli ŋūǹ kí nīn kā nnyinnyim bàtifī, ama u yaan ŋūǹ, a-fatikuu kaa bà ú nyɔ̀[66].

¹⁷Nnaabu tin lì yii ŋu jēetí a-puee, u kpáàa bāań. U làá mɔ̄ntì yii u bíi tútúǹ-si, ama u là kí kàtī a-taal ní.

¹⁸U làá gbākafì diyil, ki kpáafí u-ŋalii, ní ki sòoǹ ki bíiĺ-si kí dàkà dinicil din ní u baasii sée[67].