Read Ntcham Siracide 13 Bible Online

Siracide 13 - Ntcham bible

Siracide 13

¹Kubɔɔtiiu kun cāabìń agìńee A yaa gbēē kunaaluŋuee, án tákaĺ a-ŋal ní, a yaa bɔ́ɔtí ulambidaanee, a dāa fòol̄ udaan bimbim ní.

²Taa túń diwaŋgul din nyìmiǹ-si tikpilee, míǹ mbaantiim á taa tí bɔ́ɔtí un pɔ̄ɔǹ-si, àá un cáá nì si tigaajatee. Mana ní bi ŋūǹ kí dū ditaŋkumbool nì tikúti kumbool kí púkuń tɔb pu? Akumboo liitil yaa fáá tɔbee, ditaŋkumbool làá wīī ní.

³Ugaaja yaa yīntiǹ ubɔee, úǹ ugaaja di gíti gífí un beeyee pu diŋuul. Bi yaa mūul̀ uwɔfee, úǹ di gíti gbàam̄.

⁴A yaa kèetī ugaajee, u mùul̄-si ní, ama a yaa kaa ti cáá tibee, u dù-si kí fá ní.

⁵A yaa cáá tigaajawanee, u làá nīn pée bí a-cee ní, kí jī kí pīil̀-si ní an kaa ká-u.

⁶U yaa nyàab̀-see, u làá nīn kíiĺ-si ní. U làá nīn sòoǹ nì si ki lāā ní ki tìì-si kunyannyaau. U làá nīn pée pàkà-si ní, ní ki bàlifī-si yii: «Ba ní m ŋūǹ kí ŋá kí tīī-si?»

⁷U làá nīn yíì-si u-jiŋaalibin ki kɔ̄ntí-si icoo. A làá bīil̀ a-nimbiliŋ mili kii mita pu kí pà u-jiŋaalib gbanti pɔndi. Án dāa kúntée ní u kíǹ ki bèel̄-si. U yaa ti ká-see ní u kíǹ ki sáń-si ki gbákafí u-yil a-pu.

⁸Á nīn nyíǹ a-ba kí taa yàntī bí kīil̀-si, kí taa yàntī bí kɔ́ǹ-si icoo a-gbaandin. Nín̄ nyí nì a-ba nì binikpaambi

⁹Unikpaan ubɔ yaa yíiń-si njimee, á taa kíí malaa. Niinee, u làá nīn cɔ́ yii á dāan̄.

¹⁰Taa jìkì, yaa sá fám, u làá jà-si. Taa nín̄ bí kudandaŋu mun, yaa sá fám u làá súntí a-pu[68].

¹¹Taa màkan̄ kí nīn sòoǹ nì u kii u sá a-jutee, kí taa tí fōō tin kɔkɔ u sòoǹee kí kíí. Di sá yii u làá dī kubɔcaau pu ní kí màkan̄-si, báà u yaa bíi lāā, u bíi cɔ́ŋkí-si dee.

¹²Unil un kaa ŋūǹ kí kpāafì tibɔti tin a sòon̄ nì uee kaa cáá disaasɔl. U làá yàntī bí gbá-si kí cúú-si kí tɔ̄ sarka.

¹³Cúú a-ba, kí nīn nyíǹ a-ba tiŋan, di sá yii a tàkā nsan ŋun cáǹ-si nsitiminee ní. Bigaajab nì bifalaadambi bɔti

¹⁵Kuwaŋkuluu kamaa néeń ku-buluuku ní, míǹ mbaantiim ní unil mun néeń u-juti.

¹⁶Kuwaŋkuluu kamaa jɔ́ḿ ku-buluuku ní, ní unil mun dù u-ba kí nákań u-juti.

¹⁷Mpèé ŋulɔŋu di bí sinsiŋku nì dipibil kansikin[69]? Míǹ ní unikpiti nì deedeedaan kaa cáá mpèé ŋubɔ.

¹⁸Ŋgbansɔŋfi ŋulɔŋu di ŋūǹ kí nīn bí usaakpan nì kibɔkɔ kansikin? Ŋgbansɔŋfi ŋulɔŋu di ŋūǹ kí nīn bí ugaaja nì usoodaan kansikin?

¹⁹Kumooun mammu di sá gbikintib jinti kupɔɔun. Míǹ mbaantiim ní bigaajab mun jinti sá bisoodambi.

²⁰Ulambidaan ná un sīntiǹ u-ba taapuee, míǹ ní ugaaja mun ná usoodaan.

²¹Ugaaja yaa bíi kpìntī kí lítée, u-bɔɔbi tīkintí-u ní. Ama usoodaan yaa cá kí lítée, u-bɔɔbi dù-u kí fá ní.

²²Ugaaja yaa yīntèe, binib tikpil bīī u-boon ní. Báà u yaa sòon̄ tin kaa cáá taapuee, bi tìì-u mbaamɔn ní. Ama usoodaan yaa yīntèe, bi wòoǹ-u ní. Báà u yaa sòon̄ tibɔti tin cáá taapuee, baa dùú tɔ̄ ditundi.

²³Ugaaja yaa bíi sòoǹee, báà ŋma ŋmīlifí ní fɔ́ŋfɔŋ, ní ki pàkà-u tin u lēe pu. Usoodaan yaa bíi sòoǹee, bi bàlifī yii: «Ŋma dee ní?» U yaa gbéetèe ní bí téé-u ú lítí[70].

²⁴Tigaajati sá tiwammɔntiil ŋyunti ŋun ní bi dī nsammɔnti pu ki ká-tèe. Unikpiti úǹ ceeyee, disool kaa sá tiwammɔntiil.

²⁵Tin kā unil pɔbilinee di yàntī udaan nimbiin ń kpántí, ú sòoǹ tin ŋān̄ee àá tin kaa ŋān̄ee.

²⁶Unil nimbiin yaa bútì u lāāyee, an dàkà yii u bí dipɔɔpindin dee. Ama kí náań dilaŋkpandee, an bàlifī unil ń dàkafì tikpil ní[71].