Read Ntcham Siracide 14 Bible Online

Siracide 14 - Ntcham bible

Siracide 14

¹Unil un kaa sòon̄ ki yīntì, ní kaa cáá yii ú yāliŋkì u-kpitii puee bí mmɔnneeee[72]!

²Unil un kaa cáá yii u-pɔbil máfí tiba pu, ní ki ká tin u mákée puee bí mmɔnni!

³Tigaajati kaa máaǹ ukummunti. A yaa cáá animbil ní kaa jīǹ-ŋee, a cáá-ŋi ba pu?

⁴Unil un ŋmìntī u-ba, ki kōontí tigaajawan ki yōontée, udaan kōontí ki yōontí ubɔ ní. Tigaajati gbanti ní biba dāa ŋúb́ ki jīǹ pùsi pusi[73].

⁵Mana ní unil un ŋmìntī u-bee kíikí kí pɔ̄ ubɔ? Waa pée jīǹ u-gaajati pu gba.

⁶Unikpiti ubɔ kaa bí ki bàn̄ un di sàantí u-bee, ditafadaaldi din u cáá kí fōō u-toom puee dee.

⁷Báà u yaa ŋá tiŋanaaa, u nyí kun pu u ŋée. Kí dāá kúntée, see ú dāá lēē u-toom kí dàkà.

⁸Unil un kpèé tiwan nì nnimbitaataamee sá unikpiti ní. U ŋáań kii waa wāĺ báà ubɔee ní ki kpèé binib fám.

⁹Nnimbitaataam daan kaa fáatí tin u cááyee, nnimbineel yàntī unil naŋki ń kpā ní.

¹⁰Ukummunti kaa pūǹ u-jikaati, baa kpáàa kāntí tijin u-diikun. A-maŋfal poonee, a yaa cáá á jī

¹¹M-biki, a yaa cáá ŋŋmamee, á nīn bɔ́ntí a-ba tiŋan, ní kí ŋá ti-Dindaan saraabi bin máaǹ-uee.

¹²Téetí yii ŋkúm kaa làá tàan̄ kí bàń, aa nyí ŋwiin ŋun ŋu lēē ki síiǹee.

¹³Kí wàatī á kpúee, á ŋá a-bɔɔ tiŋan, pɔ́ɔǹ a-ba kí ŋá-u tiniti kí nóó nì a-ŋmam.

¹⁴Taa ŋmìntī a-ba ŋwiin ŋubɔ naam, an yaa pú-si diyimɔɔl á jī mmɔnee, jī[74].

¹⁵A nín pɔ́ɔǹ ki túń ditundi ki ká tiŋyee, a làá dāá yàntī-tì kí tīī ubɔ fám ní. Bin làá dāá jī a-fakalee làá dāá tɔ̄ kasi ní kí yàkatī-tì.

¹⁶Pɔ̄ àá fōō tin bi pú-see, kí jī mmɔn. Di sá yii ditaŋkpiilinee, ubɔ kaa ŋūǹ kí nyàab̀ kí ká mmɔn.

¹⁷Unil wunti kúù kii tiwampeeŋkaalee ní. «A bí ki làá kpú[75]», an sá mara un bí ki cá jaanjaanee ní.

¹⁸Busubu bun pu tifaal múkú ki sɔ̀m̀ee, tiba gbátí ní tipɔn ń túkú. Míǹ mbaantiim ní binib naantitɔntɔkɔŋ sá: Biba kúù ní bi màal̀ biba.

¹⁹Tin kamaa ní unil náańee bí ki làá wāŋkì, un náań-tèe nì tin u náańee làá dāá wāŋkì. Unil un bíi nyàab̀ iciinee

²⁰Unil un néeń iciin bɔti, ní ki dàkafì ki sòoǹ dinyil poonee bí mmɔnni!

²¹U dàkafī u-pɔbilin iciin sàmbiyaamu pu, ní ki pɔ̄ɔntí ki dàkafī i-bɔɔŋŋi pu.

²²U sáń ki jì iciin boon kii ukpan nín ŋáań puee, ki náká i-saŋyi pu ki cí-i.

²³U gbōontí ki kpèé u-tɔkɔlau poon, u nākantí i-punyɔkɔpu ki pílifí i-bɔti.

²⁴U kóò ki kɔ́l̀ iciin dumpu, ní ki cōontí u-tantiu i-guŋŋi pu.

²⁵U cōontí u-tantiu ki pìl̀ iciin, ní ki kóò nnaam paaŋŋu pu.

²⁶U kàantí u-biyaamu iciin cee, ní ki kóò i-paŋŋi taapu.

²⁷U kóò i-booŋŋu taapu kutuntuŋu yuntiŋu ní ki bí i-nyootin.