Read Ntcham Siracide 15 Bible Online

Siracide 15 - Ntcham bible

Siracide 15

¹Unil un fàŋkí ti-Dindaanee nín ŋáań puee dee, un di yaa ŋúb́ mara tiŋanee di kāntí iciin.

²I làá yīkì kí tūŋkìń-u nsan kii ubinaatee, kii usapɔɔn un kaa nyí uninjee nín fòol̄ u-cal puee.

³Tijin tin i làá tīī-u ú jēe di sá dinyil, nnyim min i làá tīī-u ú nyɔ̀ee di sá iciin.

⁴U làá dāá nyīī i-pu ní kí taa cìŋkì, u làá dāá nīn máká i-pu ní icoo ń taa kɔ́-u.

⁵Iciin làá dāá yàntī ú nīn tɔ́kɔ́ u-ŋeenaatɔb pu. Samaa kansikinee, i làá dāá tīī-u tin sá ú sòoǹee.

⁶U làá dāá ká nnaam ní kí nīn bí mmɔŋkpaanni, ní kí nyā diyindi kí nīn cá jaanjaan.

⁷Ama bigbaambi kpá ki làá ká iciin, bikpitiŋaliibi mun kpá kí ká-i.

⁸Iciin kaa sútí kí pìl̄ bilambidambi, binyimɔndambi kaa dàkafī i-pu.

⁹An kaa kítì binikpitib ń gāā ilan kí nyɔ̄ŋkì ti-Dindaan, di sá yii an kaa nyánní ti-Dindaan cee.

¹⁰Tiŋman, Iciin di yàntī unil ń nyɔ̄ŋkì ti-Dindaan, ti-Dindaan di kpòotī-u[76]. Unil tɔ́ u-ba kí ŋá tin u lèe

¹¹Taa lì yii: «Ti-Dindaan di yāntì m fá nsammɔnti.» Di sá yii Unimbɔti kaa ŋáań tin u née.

¹²Taa lì yii: «Úǹ di yāntì ní m gáatì», di sá yii úǹ làá ŋá ba nì unikpiti[77].

¹³Ti-Dindaan ná ntimbiil tuuŋŋi kɔkɔ nì ŋi-bulifi. Míǹ ní bin yú nì u deedeeyee mun bí.

¹⁴Ti-Dindaan u-ba di náań unil ŋkilkaamin, ní ki pú-u nsan ú lēē kí ŋá tin u làá ŋée[78].

¹⁵A yaa là, a ŋūǹ kí nīn nóó ti-Dindaan marab. Á nīn yú nì ti-Dindaan deedeeyee, án làá nyānní a-cee.

¹⁶U dū ŋŋmi nì nnyim ní ki bíl̀ a-nimbiin, án sá sii ní ń tàntī a-ŋal kí lēē kun a lèe.

¹⁷U dū dimaŋfal nì ŋkúm ní ki bíl̀ binib nimbiin. Un yaa là ki lēē kuŋyee ní u kāntí[79].

¹⁸Di sá yii ti-Dindaan ciiŋyi sá ikpaŋkpaan ní. U sá Mpɔŋkɔdaan ní ki wāĺ tikɔkɔ.

¹⁹U-nimbil bá bin fàŋkí-uee pu. Úǹ u-ba nyí binib tuuŋŋi kɔkɔ[80].

²⁰Waa tīī ubɔ mara ú nīn sá unikpiti, waa tí pú ubɔ nsan ú nīn ŋáań ikpiti.