Read Ntcham Siracide 16 Bible Online

Siracide 16 - Ntcham bible

Siracide 16

¹Unimbɔti ŋān̄ ní ki cáá ntoom Taa nyàab̀ kí nīn cáá mbiyaamu tikpil ŋyunti ŋun muaa bí tibanee. A yaa tí cáá mbiyaamu ní muaa dū ti-Dindaan ki yíiń tibee, á taa nín̄ fàal̀ mu-pu.

²Taa nín̄ fàal̀ yii a cáá mbiyaamu tikpil, ŋyunti ŋun ní muaa fàŋkí ti-Dindaanee.

³Taa nín̄ máká mu-pu yii mu làá nīn cáá mmaŋfafɔkɔn, kí taa nín̄ kā ki cɔ́tí mu-wíiŋŋu pu. An sɔ́ á nīn cáá kibibaabilii ki jítiǹ á nīn cáá-mu kutuku. An sɔ́ á kpú kaa màl̄ kibiki ki jítiǹ á nīn cáá mbiyaamu muaa fàŋkí ti-Dindaan[81].

⁴Uciŋfiti ubambaanti di yaa bí kitiŋinee, binib gbéè-kì ní, ama binikpitib dikitil ŋūǹ kí yàntī kí nàan̄.

⁵M ká nì m-nimbiliŋ tibɔti tikpil jítì kii míǹ, ní ki gbìl̄ nì m-tafaliŋ tin jítiǹ tineeyee.

⁶Ti-Dindaan ŋmiŋu fōō bikpitiŋaliibi kitil kansikin, u-ŋuul fòol̄ lìblib kii ŋŋmee bin jáà nì uee pu[82].

⁷Waa nìn dū cannaaku jawɔkati kpitii ki pú-bi, bíǹ bin nìn cɔ́tí bi-pɔŋŋu pu ki jáń nì uee[83].

⁸Waa nìn tāaǹ kitiŋ kin poon Looti nìn kóòyee, di sá yii u-nimbil kaa nìn là kí wāl̀ kitiŋ gbanti nib lambil[84].

⁹Waa nìn súń Kanaan yab bin wáŋkèe saai, u nìn kúntì-bi bi-kpitii pu[85].

¹⁰Waa nìn súń Isirayeel yab binib kutukub alaataa aluu saai. Bi nìn kpíì kun puee bi nín jáń nì ti-Dindaan[86].

¹¹Báà unibaanti di yaa jáà nì ti-Dindaan, án làá nīn cáá maamaaci yii u yāntì udaan kaa dáaĺ u-tafal. Di sá yii disaasɔl nì diŋuul bí ti-Dindaan cee ní. U ŋūǹ kí pɔ̄ ikpiti nì tiniti poon, ama u dàkà u-ŋuul mun ní.

¹²U-poon nín mɔ̄ puee, míǹ mbaantiim ní u sòoǹ ki kù binib bɔti. U sòoǹ binib bɔti ki nóó nì bi-tuuŋŋi ní[87].

¹³Ukpitiŋal kaa làá ŋmā kí sāǹ kí kpáaǹ tin u fìkēe, deedeedaan yaa jíń kimɔtiiyee, icoo kpá kí jī-u.

¹⁴Unil yaa dàkā kulaŋŋaŋfitiiuee, ti-Dindaan kaa làá súntí u-pu, di sá yii u làá sòoǹ báà ŋma bɔti kí nóó nì u-tuuŋŋi ní. Unimbɔti làá pée pà báà ŋma ní

¹⁷Á taa lì yii: «M làá sāǹ kí báĺ ti-Dindaan. Ŋma di bí yilpu ki làá téetí m-pu? Diniwukpaandi nee poonee, ubɔ kaa nyí-mi. Tiwannáaŋkaal tin wīikí nee kansikinee, m bí uŋa?

¹⁸Kpèè, kutagbɔŋu nì yilpu fɔ́ŋŋŋ, kitiŋ nì tiŋkub taapu taapu cīŋkì ŋyunti ŋun ti-Dindaan dɔ́miń ki māntì bi-puee.

¹⁹Ajoon nì kitiŋ nyeel cìŋkī ní ŋyunti ŋun u yaa fātìi kpēē-ŋee[88].

²⁰Ama báà ubɔ kaa dàkafī tíǹ kɔkɔ pu. Ŋma di fātìi tɔ́ tin ti-Dindaan ŋée?

²¹Kii kubuŋkpaaŋŋu nín jītí baa wāĺ-ku puee, míǹ ní ti-Dindaan tuuŋŋi kɔkɔ bí dibalin.

²²Deedee tuuŋŋi gbanti kɔkɔee, ŋma di làá sòoǹ ŋi-pu, ŋma di làá kàl̄ kí cīití-ŋi? Ti-Dindaan poondi dá láá dátìń.»

²³Unil un ciiŋyi pátèe di dàkafī míǹ. Ugbaan un wáŋkèe di dàkafī ŋgbaaŋyaamin míǹ[89]. DIDÀKAL BƆTI DIKITILILIITIIL Unimbɔti nín náań tiwan an dī dī tɔb pu puee

²⁴Pīlifiǹ-mi, m-biki, ní kí ká dinyil. Dū a-pɔbil kɔkɔ kí tīī m-nyɔɔbuŋŋi.

²⁵M làá dàkà-si didàkal din sá dimɔntiilee, m làá dū m-nyil kí dàkà-si min ní an máaǹee.

²⁶Ŋkilkaamin ti-Dindaan nín nìn náań tiwanee, u nìn dū-tì ki kāaǹ ti-paaŋŋu ti-paaŋŋu ní[90].

²⁷U nìn yóoǹ u-tuuŋŋi marab bin làá nīn bí kí nīn cá jaanjaanee, u yóoǹ-tì marab bin tì làá nīn nóó kí yòon̄ ŋkilkaamin kí tin cáá kátí-kùee. Ŋkùm kaa cútí-tàaa, tàa gàaa, tàa fàtī ti-boon kí tīī ditundi din pu bi náań-tèe[91].

²⁸An kaa pée cáá yii tiba kpéetí tin kíǹ, ní tì kpá kí yìntīǹ ti-Dindaan marab dalba dalba.

²⁹Míǹ boonee ní ti-Dindaan kpēē kitiŋ, ní ki dū u-ŋanti ki gbéeǹ-kì.

³⁰U gbéeǹ-kì ipeel kɔkɔ nì i-buluku i-buluku[92], ní i yaa kpíìyee í fàtīí gítí kitiŋ.