Read Ntcham Siracide 17 Bible Online

Siracide 17 - Ntcham bible

Siracide 17

¹Tin binib máaǹ kí ŋá kí tīī Unimbɔtee Ti-Dindaan dū ntam ní ki máń unil, ní ki làá yàntī ú fàtīí gítí ntamin[93].

²U tīī binib iwiin in nyɔkɔm nì ŋyunti ŋun bi làá dūú kàl̄ kitiŋ puee. U tīī-bi mpɔn kitiŋ wanti kɔkɔ pu.

³U náań-bi ki nántiǹ úǹ u-ba[94], ní ki gbéeǹ-bi mpɔn kii úǹ u-bee.

⁴U yāntì tin kɔkɔ u náańee fàŋkí-bi. Niinee bi ŋūǹ kí nīn cáá ipeel nì inoon pu mpɔn.

⁶U tīī-bi ibɔsoon nì dilimbil nì animbil nì atafal, nì dipɔbil bí nīn cáa dàkafī.

⁷U gbéeǹ-bi dinyil nì nlandɔkɔ, ní ki dàkā-bi bí béé kí gàntī tiŋan nì tikpitil[95].

⁸U yāntì bi fàŋkí-u bi-pɔbiliŋ poon, kí dàkà-bi u-tuuŋŋi nín sá akpaan puee.

¹⁰Bi làá dāá gāā ilan kí nyɔ̄ŋkì u-circir yindi, kí māafì u-tuuŋŋi nín sá akpaan puee. Dipoondi nì mara

¹¹Kí kūtèe, ti-Dindaan tīī-bi dinyil, ní ki tīī-bi dimaŋfal marau.

¹²U nì bi pūtì ki pōoǹ tɔb kí nīn cá jaanjaan, ní u dū marab ki dàkā-bi.

¹³Bi-nimbil ká u-nyooti kpaanti, ní bi-tafal gbìl̄ u-neen nyooti.

¹⁴U tùkū-bi yii: «Ní nīn nyíǹ ni-ba kí taa ŋá tin kaa sá deedeeyee.» Ní ki tīī-bi marab bin làá tūtuǹ báà ŋma bí nīn bí dicilpuee[96]. Tiba kaa bí Unimbɔti kaa nyí

¹⁵Ti-Dindaan wāĺ tin kɔkɔ binib ŋáańee. Tiba kaa bí ki bál̀ u-nimbiin waa wāĺ.

¹⁷Ti-Dindaan lēē ubɔti ki tīī dinibul kamaa, ama Isirayeel nibul díǹ sá u-jandi ní[97].

¹⁹Tin kɔkɔ binib ŋáańee dɔ̄ u-nimbiin kii ŋwìińee ní, u-nimbikpeeŋu pée cɔ́ bi-bimbim pu ní.

²⁰Tin kɔkɔ bin ŋáań an kaa ŋān̄ee kaa bál̀ u-cee, bi-yìntitam kɔkɔ pée dɔ̄ u-nimbiin ní[98].

²²Unil yaa ŋá u-juti tiŋanee, an sá kii kijalii kin bi cáa nyìitēe ní ki tīī udaan. Tiŋan gbanti cáá kudapɔɔu kii dinimbibulee ní.

²³Ŋwiinee, ti-Dindaan làá dāá pà unil kamaa u-tuuŋŋi paati. U làá dū báà ŋma paati kí túń u-yil pu ní.

²⁴Ama bin yaa kpántì bi-bee, u pūǹ-bi diyimɔɔl bí fàtīí gítiń u-cee, ní ki tìì bin wunti yɔ̄tèe kunyannyaau. Ní fàtīí gítiń Unimbɔti cee

²⁵Fàtīí gítiń ti-Dindaan cee kí fá a-kpitii, a yaa bíi mèé-uee, a bíi bàtī a-yìntitam pu dee.

²⁶Fàtīí gítiń Yilpu Fɔ́ŋŋŋ yɔu cee kí fá ikpiti, nín̄ ná tin sá ntimbiil bɔtee nì a-pɔbil kɔkɔ[99].

²⁷Ŋma di làá nyɔ̄ŋkì ti-Dindaan ditaŋkpiilin? An sá binib bin dáá bí dimaŋfalinee di jáaḿ-u.

²⁸Unifoo un cáá ŋgbampɔnee di ŋūǹ kí nyɔ̄ŋkì ti-Dindaan. U yaa kpíìyee, waa ti bí dee, ní waa ti ŋūǹ kí jāam̀-u[100].

²⁹Ti-Dindaan poon mɔ̄ tikpilku, ní ki pūǹ bin fàtī u-watil púee kpitii.

³⁰Di sá yii unil kaa ŋūǹ kí nīn cáá tikɔkɔ, kun puee nisaal kaa bí kí nīn cá jaanjaan.

³¹Ba di pée gíti bí ki wāĺ ki bàn̄ ŋwìiń? Ama ŋu jēetí ní ŋu-walifiŋu kaa ti ŋmíntí. Míǹ mbaantiim ní unil un dàkafī kí ŋá tikpitilee bí.

³²Unimbɔti di kpèé iŋmalbijaa in bí kutaa puee, ama binib kɔkɔ pée sá ntam nì ŋfantam ní[101].