Read Ntcham Siracide 18 Bible Online

Siracide 18 - Ntcham bible

Siracide 18

¹Ti-Dindaan di sá ukpaan Ti-Dindaan un bí kí nīn cá jaanjaanee di náań tikɔkɔ kaa kíǹ tiba.

²Ti-Dindaan baba ní bi làá yíiń deedeedaan.

⁴Waa tīī ubɔ mpɔn udaan ń bāakì tin u làá ŋée. Tiŋman, ŋma di ŋūǹ kí béé u-maamaaci tuuŋŋi?

⁵Ŋma di ŋūǹ kí ŋmàntī u-pɔŋkpaaŋŋu? Ŋma di ŋūǹ kí māafì u-ŋanti tin u ŋáańee?

⁶Taa ŋūǹ kí bàtī tiba an pu, kaa ti ŋūǹ kí kūtì tiba an pu. Unil kaa ŋūǹ kí béé ti-Dindaan maamaaci tuuŋŋi taapu[102].

⁷Unil yaa dākafì yii u dóòyee, ŋyunti gbantee, u nín kíĺ dee. U yaa tí dūu gbēeǹee, waa ti nyí laakin u bée[103]. Unil sá ba?

⁸Unil sá ba ní? Ba ní u kèetī ní? Tiŋan nì tikpitil tin u ŋáańee taapu sá yii ba ní[104]?

⁹Unil yaa tin bàn̄ abin dilaataalee, mimmee u yúntì tikpilku dee[105].

¹⁰Kí dūú ŋmàntī nì iyunti in làá nīn bí kí nīn cá talkuee, abin gbanti sá kii nnyim nín jòotī dibaba tiŋku nyimin puee ní, àá dibul nín dɔ̄ puee poon kibiliiyee ní.

¹¹An pu ní ti-Dindaan jīǹ kimɔtii binib pu, ní ki cáá u-laŋŋaŋfitiiku ki sìtī bi-pu.

¹²U wāĺ ní ki nyí bi nín làá kúntí nì falaa puee, an pu ní u cáá bi-kpitii ki pūǹ-bi kaa gbèentí.

¹³Unil sūǹ u-nabiki baba saai ní, ama ti-Dindaan úǹ sūǹ unil kamaa saai ní. U kpòotī unil kamaa, ki dátí u-tafal, ki dàkà-u ní ki fàtīi gīintiń un wáŋkèe u-cee, kii upikpaal nín gīintiń u-piii in wáŋkèe puee[106].

¹⁴U sūǹ binib bin di kíikí bi dàkà-bee saai, nì bin pɔ̄ɔntí kí nīn tɔ́ tin u sòon̄ ki síiǹee. Unil nín máaǹ kí nīn pūǹ puee

¹⁵M-jipɔɔn, a yaa ŋá unil tiŋanee, á taa wòoǹ-u. A yaa pú unil tiwanee, á taa sòoǹ-u tibɔti án wà-u.

¹⁶Dimalindi kaa sɔ̀ŋkī kutuntuŋuaaa? Míǹ ní dinyɔɔbummɔɔl jítiǹ tiwampɔkaal.

¹⁷Tiŋman, dinyɔɔbummɔɔl sɔ́ǹ tiwampɔkaal timɔntiil. Un sá ulaŋŋaŋfitee pūǹ ní ki cáá dinyɔɔbummɔɔl.

¹⁸Ugbaan kaa nyí bi nín wòoǹ unil iciin poon puee. Nnimbitaataam daan wampɔkaati yàntī unil ń sɔ̄ nnyinnyim ní. Uciŋfiti nín nyí nì u-ba puee

¹⁹Kí wàatī á sòoǹee, á bàlifì kí béé tiŋan. Cáaǹ a-ba kí nín būŋkì.

²⁰Cɔ̄ŋkì a-ba kí wàatī Unimbɔti ń nín sòoǹ a-bɔti, ní an yaa láa bàn̄ á sòoǹ a-nyɔkɔpu yayee, á ká a-kpitii pɔ̄tam[107].

²¹Taa nín̄ kā ki cí kí būŋkì kí wàatī kí nín béé a-yìntitam. A yaa pée ŋá ikpitee, á dàkà yii an wù-si.

²²A yaa pōoǹ ipoonee, á ŋá kii a nín pōoǹ puee ŋyunti ŋun a síiǹee. Taa nín̄ cí a-kúm dal kí nín pà a-pɔndi.

²³Kí wàatī á pòon̄ ipoonee, á dàkafì tiŋan. Taa nín̄ bí kii unil un cɔ́ŋkí ti-Dindaanee[108].

²⁴Téetí yii u ŋūǹ kí gíí a-pu diŋuul a-winjoolkaai dal, ní u ŋūǹ kí dāá fàtī u-boon kí tīī-si kí dáaĺ a-tafal.

²⁵A yaa bí digbilinee, á dàkafì ŋkùm yuntiŋu pu. A yaa kpántì ugaajee, dàkafì yii a ŋūǹ kí dāá kpántí usoodaan nì unandaan.

²⁶Kí yòon̄ kutaafaau kí dāá jóotí-kùee, tikɔkɔ ŋūǹ kí kpántí. Di sá yii ti-Dindaan tūǹ u-tundi malaa malaa ní.

²⁷Tin kamaa poonee, uciŋfiti úǹ nyí nì u-ba ní. Ikpiti yaa túuǹ-uee, waa jēetí i-poon.

²⁸Unil un kamaa cáá dinyilee béetí iciin ní. Udaan pàkà un ká-iee ní.

²⁹Binib bin sòoǹ tibɔti nì dinyilee dàkà yii bíǹ bi-ba sá biciŋfitiibi. Kii utaa nín nì ki yàantí puee, míǹ ní bi sòoǹ tibɔti nì alaŋkpan ŋin cáá taapuee. Unil ń ŋmā kí cúú u-ba

³⁰Taa yàntī a-kpɔkɔsib ń nīn kpòotī-si, kí taa pɔ̄ a-nimbitaataam mpaan.

³¹A yaa ŋá ki nóó nì a-kpɔkɔsibee, a-nannanliibi làá dāá lā-si.

³²Taa nín̄ bí ki jīǹ mmɔn ki fàal̀, yaa sá fám, a làá dāá fōō an paati.

³³Taa nín̄ pìntí animbil ki jīǹ jiŋaakpaambi ŋyunti ŋun aa cáá tiba kuloounee, yaa sá fám a làá dāá kpántí usoodaan.