Read Ntcham Siracide 19 Bible Online

Siracide 19 - Ntcham bible

Siracide 19

¹Utɔntɔnli un nyù ndaam tikpilee pée kpá kí kpántí ugaaja. Unil un ŋèeǹ nì tiwan tin bí fiiiyee kpántí usoodaan ní fiii fiii ki cá.

²Ndaam nì binimpoobi yàntī binyiliibi gáatí ní. Un néeń ki cá nnimpulaakpaamu ceeyee kaa ti yì u-ba.

³An di làá yàntī udaan ń kpú ní akoosibil ń ŋmɔ́ u-wunti. Kubɔcaau paati

⁴Unil un kaa dàkafī ki cá ndanee di fòol̄ tin bi tùkù-uee ki kíikí dicilpu. Unil un ŋáań ikpitee yìntīǹ úǹ u-ba ní.

⁵Unil un néeń ki ŋáań ikpitee kù úǹ u-ba bɔti ní.

⁶Unil un ná dibɔcàfilee sáń ki nyēē tikpitil ŋaan ní.

⁷Taa dū tin ní a gbìl̄ bi sòon̄ee kí cáá māafì, an kaa làá bàtī-si tiba.

⁸Á taa sòoǹ tiba ubɔ pu, á taa sòoǹ a-bɔɔ puɔɔɔ, a-nannanliu pu. An yaa kaa sá yii a-ŋmiŋŋmil làá yàntī á yìntēe, á taa lì tiba.

⁹Di sá yii udaan ŋūǹ kí gbìl̄ tin a lēe. Waa làá nīn gíti cáá a-pu dimákal, ní u yaa ká ŋyuntimɔntee, ú nīn kíǹ ki ná-si.

¹⁰A yaa gbìl̄ bi sòon̄ tibɔti tibee, á dūú ŋá a-taalin kí tin sāā a-kúm dal[109]. Á taa fàŋkì yii a-nyɔkɔ làá ŋmátí-si á sòoǹ.

¹¹Bi sòoǹ tibɔti ní an wù ugbaan kii unimpu di kāl̀ imatiŋween puee.

¹²Tibɔti yaa kā ugbaan pɔbilinee, an bí kii mpiin di túuń u-tapandi puee ní. Cɔ̄ŋkì kí kpèè tin a gbìl̄ bi sòon̄ee

¹³Bàlifì a-bɔɔ tin bi bí yii u ŋée, án yaa yíì waa pée ŋá báà tiba. Báà u yaa pée ŋá-tàaa, waa làá gíti ŋá-tì dalba.

¹⁴Bàlifì a-juti tin bi bí yii u lēe, án yaa yíì waa pée lī tiba. Báà u yaa pée lāaa, waa làá gíti lì-tì dalba.

¹⁵Bàlifì a-bɔɔ tin bi bí yii u ŋée, di sá yii binib sòoǹ ki bíiĺ bi-jutiibi ní. Taa nín fòol̄ tin kɔkɔ bi sòoǹee ki kíikí.

¹⁶Unil ubɔ ŋūǹ kí lì tiba kaa dākafì kulandɔkɔkpiiu[110]. Ŋma kaa láá pée yīntì u-bɔsooŋyi poon ki ká?

¹⁷Bàlifì a-juti tin bi bí yii u ŋée kí wàatī kí nín cùú wòoǹ-u, ní kí yàntī Yilpu Fɔ́ŋŋŋ Nimbɔtiu marau ń tɔ̄ u-tundi. Iciin in sá tiŋman yayee nì in kaa sée

²⁰Iciin kɔkɔ di sá á fàŋkì ti-Dindaan, kí ŋá kí nóó nì u-marab.

²²Ama á nīn nyí tin sá ikpitee kaa dàkà yii a sá uciŋfiti, kí nīn nóó bikpitiŋaliibi saŋkiiyee kaa dàkà yii a sá u-nyil.

²³Ŋŋáaǹtam miba bée ki sá ntimbiil. Unil un di kaa cáá iciinee sá ugbaan ní.

²⁴An sɔ́ unil ń taa nín̄ cáá dinyil tikpil ki fàŋkí ti-Dindaan ki jítiǹ unil ń nīn cáá dinyil tikpil kaa tɔ́ u-marab.

²⁵Nciin ŋáaǹtam miba bí ki cáǹ unil tin kaa bí deedeeyee poon. Biba kíiĺ bi-jutiibi kí ŋmā kí ká tin bi nyàab̀ee.

²⁶Biba bí ki còom̄ bi-yil tīī kii bi kā dikpoolee, ama bi-pɔbiliŋ poonee, biibii bɔti di gbí.

²⁷Bi tìntī bi-yiliŋ ní ki mɔ́ntí yii baa gbìl̀ tiba. Ama ubɔ yaa kaa bíi kpèé-uee, ní ú jī a-pu dinyandi.

²⁸Biba kaa cáá mpɔn kí ŋá tikpitil. Ama diyimɔɔl yaa púee, baa tàantí.

²⁹A pée kāntí ubɔee, a béetí dinicil din u sée ní. A pée kpèé u-nimbiinee a béetí yii u sá ulandɔkɔdaan.

³⁰Unil nín pèentí puee, nì u nín lāā puee, nì u nín còom̄ puee di yàntī ní á béé dinicil din u sée.