Read Ntcham Siracide 2 Bible Online

Siracide 2 - Ntcham bible

Siracide 2

¹Deedeedaan nì icɔŋki M-jipɔɔn, a yaa là kí nóó ti-Dindaanee, á bɔ́ntí a-ba kí kɔ́ icɔŋkin[7].

²Ká dipɔbil kí nīn ŋúb́ an píkí. Taa fàŋkì dinimbinaamandi yuntiŋu.

³Dū a-ba kí nákań nì ti-Dindaan, kí taa kàkatī a-ba kí wàatī-u. A làá kúntí a-maŋfal wiiŋyi nì dibútil poon ní.

⁴Tin kamaa di yaa pée bāań-see, á fōō míǹ. A yaa kɔ́ agìń ŋin làá sìntīǹ-si taapuee nee, á jī kimɔtii.

⁵Di sá yii ŋŋmin ní bi cɔ́ŋkí sindaariya. Míǹ mbaantiim falaa ŋmiŋun ní bi cɔ́ŋkí kí béé bin néeń ti-Dindaanee dapɔɔku[8].

⁶Nín̄ cáá dimákal Unimbɔti pu ní ú tūtuǹ-si, nín̄ nóó deedee saŋŋu kí nīn pée máká u-pu.

⁷Nimbi bin fàŋkí ti-Dindaanee, nín̄ cɔ́tímaan u-ŋanti pu. Ní taa pée fàtī ni-boon kí tīī-tì, mimmee naa làá lítí.

⁸Nimbi bin fàŋkí ti-Dindaanee, nín̄ mákámaan u-pu, ni kpá ki làá lóó ni-paati.

⁹Nimbi bin fàŋkí ti-Dindaanee, nín̄ cɔ́tímaan u-ŋanti nì mmɔn ŋun kaa cáá dikúntilee nì u-laŋŋaŋfitiiku pu.

¹⁰Dáań kí kpèèmaan amaatɔntɔkɔ ŋin jítèe. Ŋma di dū u-mákal ki páaǹ ti-Dindaan pu ní u kɔ́ǹ-u icoo? Ŋma di pɔ́ɔǹ ki fàŋkí ti-Dindaan ní u dū-u ki fá? Ŋma di gbāam̀ ti-Dindaan ní u yíì kaa pílifiǹ-u[9]?

¹¹Di sá yii ti-Dindaan sūǹ isaa ní u-poon mɔ̄. U pūǹ ikpiti ní ki fìil̄ dinimbinaamandi yuntiŋu.

¹²Mbusu dɔ̄ ki cí bin kaa cáá dipɔbil, ki ŋáań tikɔkɔ nì bugbambu, ní ki bí mili milee[10].

¹³Mbusu dɔ̄ ki cí unil un kaa cáá dipɔbil, ní kaa cáá ti-Dindaan pu dimákalee. Waa làá wúń u-pu.

¹⁴Mbusu dɔ̄ ki cí un kaa pɔ́ɔǹ ki tin kátì-kuee! Ti-Dindaan yaa láa bālifì-ni ni-nyɔkɔpu yayee, ni làá dāá ŋá mana dee?

¹⁵Binib bin fàŋkí ti-Dindaanee kaa fàtī bi-boon kí tīī tin u lèe. Bin néeń-uee nóó u-saŋyi ní[11].

¹⁶Bin fàŋkí ti-Dindaanee nyàab̀ kí ŋá tin di fáatiǹ-uee ní, bin néeń-uee jīǹ u-marau ní.

¹⁷Binib bin fàŋkí ti-Dindaanee pɔbil pée bɔ́ntì ní ki cí. Bi nyí kí sìntī bi-ba kí tīī-u.

¹⁸Bi lì yii: «An sɔ́ á kɔ́ ti-Dindaan ŋaan ki jítiǹ á kɔ́ binib ŋaan. Di sá yii u yaa sá ukpaanee, u-poon mun mɔ̄ míǹ ní[12].»