Read Ntcham Siracide 20 Bible Online

Siracide 20 - Ntcham bible

Siracide 20

¹Béé ŋyunti ŋun a máaǹ kí sòoǹ àá kí nīn ŋmée Iwoon iba bí kaa kítì. Iyunti ibee, diŋmiŋŋmil dàkà yii a sá ulandɔkɔdaan ní.

²Ama an sɔ́ á wòoǹ unil ki jítiǹ á díkí u-pu diŋuul.

³Unil yaa béè u-yìntitamee, u nyáń tibɔtin dee.

⁴Unil un là kí dī mpɔn kí dàkà yii u cáá mbaamɔnee, udaan bí kii ufaal un di là kí dòon̄ nì usapɔɔn mpɔnee ní.

⁵Biba ŋmí ní kí dàkà yii bi sá biciŋfitiibi[111]. Ama bi ná biba, kun puee bi sòoǹ tikpil.

⁶Biba ŋmí kun puee baa nyí tin bi làá kííyee, ní biba mun ŋmí kí sòoǹ tibɔti ŋyunti ŋun an máaǹee.

⁷Uciŋfiti cīití ŋyunti ŋun an máaǹee ní kí sòoǹ, ama ulambidaan un lóò iciinee kaa nyí ŋyunti ŋun sá ú sòoǹee.

⁸Unil un sòoǹ tikpilee, binib kaa là u-bɔti. Míǹ ní un mun kaa là kí sòoǹee, binib kaa néeń u-bɔti[112]. Tibɔtuuŋkaal

⁹Ŋyunti ŋubɔee, kuyikpiiu cāabìń ku-dindaan tiŋan ní, ní ŋyunti ŋubɔee, diyimɔɔl ń cáań di-dindaan tikpitil.

¹⁰Ŋyunti ŋubɔ a pūǹ tiwanee, aa làá páatí báà tiba an pu, ní ŋyunti ŋubɔee á páatí tin a púee mili pu.

¹¹Ŋyunti ŋubɔee, tinyool tiba ŋūǹ kí sìntī unil taapu. Ama biba mun gántí bi-yil ŋyunti ŋun bi sīntì-bi taapuee.

¹²Biba ŋūǹ kí dàkafì yii bi dū animbil fiii ki dá tiwan tikpil, ama ní kí pà tin u dée miluli pu.

¹³Uciŋfiti nyí u nín làá sòoǹ fiii pu binib ń nīn néeń u-bɔtee. Ama báà ugbaan ń sòoǹ nì kinyɔɔmɔɔi min kamaa, u ŋáań fám ní.

¹⁴Tiwan tin ugbaan pú-see kaa cāabìń-si ipaati iba. Di sá yii úǹ làá nīn kā ki cí yii á téeǹ-u án jītíǹ tin u pú-see pu.

¹⁵U pūǹ tiwan fiii ní ki wòoǹ tikpil, kii uwannyafil di tátí kinyɔŋinee. U yaa pīnnì-si tiba díǹ, u làá fu bàlifì-si ti-pu fool. An niliuee, baa ŋūǹ kí nīn là u-bɔti.

¹⁶Ugbaan lì yii: «Maa cáá bɔɔ, ubɔ kaa nyí tiŋan tin m ŋáańee. Bin jīǹ m-jintee sá maanyiŋambi ní.»

¹⁷Ama an niliuee, báà ŋma bèel̄-u ní. Á taa sòoǹ tibɔti tin kaa máaǹee

¹⁸An sɔ́ á ŋàtī kí lítí didandi pu ki jítiǹ á sòoǹ tibɔti kí yìntī. Míǹ ní binikpitib làá dāá lítí dicilpu dicilpu.

¹⁹Unil un sá dikpacantibilee bí kii tibɔfan tin bigbaambi sòoǹ ki bùsēe ní.

²⁰Binib kaa fòol̄ ugbaan laŋkpandi. Di sá yii waa gà u-laŋkpandi ŋyunti ŋun an máaǹee[113].

²¹Biba bée, bi-sool pu ní baa ŋáań ikpiti. An nibee ŋūǹ kí gèeǹ bi-landɔkɔjaatiŋu kaa kɔ́kɔĺ-bi tiba.

²²Biba mun bée, ubɔ pu ní u wáŋkí, u nín tɔ́ ugbaan puee pu ní ú wāŋkì.

²³Biba mun bée, bi pòontí bi-bɔɔ ipoon kun puee baa kíikí kí yíí udaan, ní udaan ń dāá kpántí bi-pulincɔnti fám.

²⁴Nnyimɔn sá kii icoo daaŋkuee ní unil wunti pu. Binib bin kaa nyí tibee nyɔkɔn ní bi kāntí-ŋu.

²⁵Unaayuu sɔ́ǹ unil un mɔ́ntí kaa gbèentée, ama bi-liitil làá wāŋkì[114].

²⁶Inyimɔn yàntī unil féeń u-jilmau, ní u-cooyee pée bí u-pu kaa dóotí. Iciin paati nì i-tuuŋŋi

²⁷Uciŋfiti pée sòoǹ fiii yéè ní binib tìì-u disíndi. Unil un wálifèe bɔti mɔ̄ǹ binikpaambi.

²⁸Ukpaamɔnti cēē tikpaajin tiŋan ní. Míǹ mbaantiim ní un bɔti fáatiǹ binikpaambee ŋūǹ kí yàntī bí dū unil yìntitam kí pɔ̄-u.

²⁹Tiwampɔkaal nì dinyɔɔŋeebil jim yàntī biciŋfitiibi kaa ti wāĺ tiŋan, ní ki ŋēeb̀ bi-nyɔmmu baa ti ŋūǹ kí wòoǹ unil[115].

³⁰Iciin in bi dūu bál̀ee, nì tigaajati tin bi dūu gbìn̄ ki síb́ee kèetī ba[116]?

³¹Unil un bāal̀ u-gbaandee sɔ́ǹ un cáá u-ciiŋyi ki bāal̀ee[117].