Read Ntcham Siracide 21 Bible Online

Siracide 21 - Ntcham bible

Siracide 21

¹Sāǹ ikpiti M-biki, a yaa ŋá ikpitee á taa ti kūtì míǹ[118], ní kí mèè bí dū ikpiti in a ŋá an jítèe kí pɔ̄-si.

²Sāǹ ikpiti kii bi nín sáń ukoobu puee. A yaa sútì ki pìl̄-iee, i làá jú-si ní. Ikpiti nyiŋŋi bí kii gbikinti yaŋee, ní i cáa júntí ki kù binib.

³Unil un yìntī Dindaan marauee bí kii kitàataajiki kin jītí ajan liitilee ní. Udaan fòol̄ tiweendi tin kaa cáá dicáaǹdee ní.

⁴Tipɔmbɔti nì dilambil kúntí unil gaajati ní. Míǹ ní ulambidaan dicaŋku làá nàan̄.

⁵Ufalaadaan wimmeem kóò ti-Dindaan tafaliŋin ní u pɔ̀ udaan kaa tàantí[119].

⁶Unil un kaa néeń bí wòoǹ-uee, udaan nóó binikpitib saŋŋu dee. Ama un di fàŋkí ti-Dindaanee kpántí u-ba u-pɔbil poon ní.

⁷Bi pée nyí ubɔlinnyaan báà la ní. Ama unil un dàkafī kí nín sòoǹee béetí u-yìntitam ní.

⁸Unil yaa dū ubɔ nimbiliŋ ki máń u-diikuee, udaan ŋman tōō ataŋkpee ki kpúkuǹ úǹ u-ba kaakul pu dee[120].

⁹Binikpitib nikitil bí kii timɔkulindi feencundee ní, ŋŋmi di làá dāá wà-bi.

¹⁰Binikpitib saŋŋu wāā ní kaa cáá ataŋkpee, ama ŋu cáǹ binib ditaŋkpiilin ní[121]. Uciŋfiti nì ugbaan bɔti

¹¹Unil un di nóó ti-Dindaan marauee nyí u nín cútí u-ba puee ní. Unil un fàŋkí ti-Dindaanee kāntí iciin ní.

¹²Un ní an kaa púee kaa ŋūǹ kí bīfì kí cíkití tiba, ama apɔl aba tìì binib ntuntun ní[122].

¹³Uciŋfiti nyil wīintí kii nnyiŋgbeenee, ní u-saŋkii bí kii nnyimbul nyimee.

¹⁴Ugbaan pɔbil bí kii dibɔkatilee ní, waa ŋūǹ kí cúú tin ní u bífèe poon tiba.

¹⁵Unil un di ŋá sukulee yaa gbìl̄ iciin nyɔɔbundee, u fòol̄-dì ní kí bīfì tiba kí kūtì. Ama un di ŋáań ajɔkɔntuunee ceeyee, an bɔtee kaa fáatí-u, u dù-dì kí ŋá u-kpaŋkpamboon ní.

¹⁶Ugbaan sooŋyi nyìm̀ kii diwaŋgul din unil un cá nsanee túee ní. Ama unyil nyɔɔbuŋŋi ŋíǹ mɔ̄ dipilifil ní.

¹⁷Dikpafil poonee, binib nyàab̀ kí nīn pílifí tin ulandɔkɔdaan sòoǹee ní, kí nīn dàkafī u-bɔti pu bi-pɔbilin.

¹⁸Ugbaan ceeyee iciin sá kii adigbuŋkatee ní. Ugbaan nyil sá kii anyɔɔbun ŋin kaa cáá taapuee.

¹⁹Ugbaan ceeyee dibifil sá kii abaa ní bi bá u-taaŋee, àá ikusaka ní bi dūu bóob́ u-ŋaliiyee.

²⁰Ugbaan lāā mpɔn ní, ama uciŋfiti úǹ lāā yɔ̀ɔɔ nì diŋmiŋŋmilin ní[123].

²¹Ulandɔkɔdaan ceeyee, dibifil sá kii sindaariya léeŋkaati, àá dibɔmbil ní u fúuń u-ŋaŋgiilee ní.

²²Ugbaan bìl̀ ní kí kɔ́ unil cindin, ama un cíkitì ki nyée kóò soooo ní.

²³Ugbaan di yūlifí kipunyɔkɔpu ní ki gbōontí ki kpèé unil cindin. Ama unil un fōō didàkamɔntiil u-baabi ceeyee yūlifí mmɔŋki ní.

²⁴Unil un yūlifí mpunyɔmu pu ki pílifí tibɔtee sá dikpacantibil ní, ama an sá icoo ní ki tīī un cáá iciinee.

²⁵Unil un càfī tibɔtee sòoǹ ní ki bùsī tin biba sòon̄ee, ama biciŋfitiibi dàkafī ní kí nín sòoǹ.

²⁶Ugbaan sòoǹ kaa dàkafī, uciŋfiti úǹ dàkafī ní kí nín sòoǹ[124].

²⁷Unikpiti yaa tɔ́ Sitaan mbusuee, úǹ u-ba ní u tɔ́ mbusu.

²⁸Un cāab̀ u-jutiibi disambiilee ŋáań úǹ u-ba ní tikpitil. U yàntī bin kɔkɔ māntìi tú-uee ná-u ní.