Read Ntcham Siracide 22 Bible Online

Siracide 22 - Ntcham bible

Siracide 22

¹Uwutijoodaan bɔti Uwutijoodaan náań nì ditaŋkpal din táká tibinee ní. Báà ŋma sáń-u ní binib bèel̄-u.

²Uwutijoodaan náań nì mbincun ní. Un kamaa yaa gbēē-ŋuee fíntí u-ŋal ní. Mbiyaamu mun sá pɔɔgaatibee

³An sá icoo ní ki tīī ubaati un cáá dikpacantibilee. Kì yaa tin sá kibinimpubikee, an pée nín púntìi nāaǹ dee[125].

⁴Usapɔɔn un cáá iciinee kāntí cal ní, ama un bíil̀ee kɔ̄ntí u-baa kunimbaaun ní.

⁵Unimpu un kaa tɔ́ binibee kɔ̄ntí u-baa nì u-cal icoo ní. Bi-liitil kpèé-u fám ní[126].

⁶Á sāŋkì unil ŋyunti ŋun kaa kítèe bí kii binib nín kā dikpool ní ubɔ bí ki gà ilanee ní. Ama mbambaan nì ditafadaaldi di sá iciin tikɔkɔ poon. Digbaandi kaa cáá nnyɔkɔ

⁹Á dàkà ugbaanee sá kii á ŋáĺ dibool din wīīyee ní, àá kii á fìntī unil un di gèen̄ ki kɔ́ ndanee ní.

¹⁰Á sòoǹ nì ugbaanee sá kii á sòoǹ nì un gèeǹee ní. A pée sòoǹ kí dóóyee ní ú bàlifì-si yii: «Ba kpá ní?»

¹¹Sɔ̄ unil un kpíìyee pu, di sá yii udaan gíti kpá kí wāl̀ ŋwalifi. Sɔ̄ ugbaan mun pu, di sá yii u lóò dinyil. Taa sɔ̄ unil un kpíìyee pu tikpil, kun puee úǹ ká diŋuŋfil ní. Ama ugbaan úŋ̀wuee u-bɔti gbí isaa ki jítiǹ ŋkúm.

¹²Bi kàal̀ unil un kpíìyee kpool iwiin iluli ní, án yaa kíǹ kii ugbaan àá unil un kpèé Unimbɔti fámee, bi kàal̀ udaan kpool u-maŋfal wiiŋyi kɔkɔ poon ní.

¹³Taa sòoǹ nì ugbaan kunyɔɔbumpaau, kí taa còom̀ nì un lóò iciinee[127]. Á nīn nyíǹ a-ba nì u kí taa kɔ́ tibɔtin, kí taa gbēē-u mun kí kɔ́ǹ a-ba tijɔkɔndin. A yaa là kí nīn cáá ŋgbansɔŋfee, á nīn gɔ́ntí-u. Mimmee u-gbaandi kaa làá kɔ́ǹ-si agìńni.

¹⁴Ba di gíti nyìm̀ kii tikúbɔn? An yaa kaa sá ugbaan, an gíti sá ba?

¹⁵An sá sɔkɔmii unil ń túń dibul àá ŋyaam kutuku àá dikújabil ki jítiǹ á nīn kā ugbaan cee u ŋáań u-gbaandi[128].

¹⁶Bi yaa páaǹ idɔ kudii yilpu ní ki bóob́ an pɔ̄ɔ̄ tiŋanee, báà kitiŋ ń cìŋkì min kamaa pu, idɔ gbanti kpá kí kpàtī. Míǹ mbaantiim ní unil yaa dākafì tiŋan ki lēē u-pɔbil poon kí ŋá tibee, báà u yaa ká agìń, waa yɔ̀tī tiwun[129].

¹⁷Unil yaa dākafì tiŋan pu ní ki lēē u-pɔbil poon kí ŋá tibee, an bí kii kudii kun bi póoń ki ŋmàn̄ee ní.

¹⁸Itaŋkpabiiti in pá digundi yilpuee kaa ŋūǹ kí yūĺ kubuŋu nimbiin. Míǹ mbaantiim ní ugbaan un pɔbil bíil̀ u-gbaanlandɔkɔi puee kaa làá ŋmā kí yūĺ tin pée fàantí-uee nimbiin. Yūĺ deedee nì a-bɔɔbi

¹⁹Bi yaa fáá unil nimbilee, nnyinnyim di nyēē. Ama bi yaa fáá unil pɔbilee, tin kā udaan nee di nyēē.

²⁰Un yaa tɔ́ nnɔmbiyaamu ditaŋkpalee jì-mu ní. Un yaa sìí u-bɔɔyee bíiĺ kubɔɔtiiu ní.

²¹A yaa fúutì kitàataajiki kujitooun a-bɔɔ puee, dimákal dáá bí, u ŋūǹ kí fàtīí gítiń.

²²Sii nì a-bɔɔ yaa kpákáǹ tɔbee, taa fàŋkì, ni dāa ŋūǹ kí fàtīí mɔ̄ɔkì. Ama a yaa sīī-u, àá ki kpēē-u fám, àá ki bīitì u-bɔɔŋŋi pu àá ki nyáń u-boonee, á béé yii a-bɔɔ gbanti làá sāǹ-si dee.

²³A-juti yaa sá usoodaanee, á yàntī ú nīn máká a-pu. Niinee, u yaa láa kpántì ugaajee, a dāa jīǹ u-pu. U yaa kɔ́ dinimbinaamandinee, nín̄ yú nì u deedee. Niinee, u yaa láa fōō difakalee, a mun làá dāá ká a-laŋki.

²⁴Nnyim tuntuŋku nì nnyiim di dàkà laakin ŋŋmi bée. Míǹ ní a yaa tin bíi gbìl̀ asiibil puee, á béé yii fatiku làá yàaǹ dee[130].

²⁵Icoo kpá kí cúú-mi ḿ mɔ̄tì m-bɔɔ pu. U yaa nyàab̀-mi, maa làá fàtī m-boon kí tīī-u.

²⁶Ama agìń aba yaa tin bāań-mi u-puee, bin kɔkɔ làá gbìl̄-tèe làá nīn kíǹ ki nyíǹ bi-ba nì u ní. Ŋwimmeem

²⁷M kāntí la uciitil ú nīn cí m-nyɔkɔ, kí pìin̄ m-nyunculiŋ nì saafii! Niinee m-nyɔɔbuŋŋi kaa dāa yàntī ḿ lítí, ní m-limbil mun kaa dāa yàntī ḿ wāŋkì!