Read Ntcham Siracide 23 Bible Online

Siracide 23 - Ntcham bible

Siracide 23

¹Ti-Dindaan, m-maŋfal Baa nì di-Dindaan[131] taa dū-mi kí líiǹ m-nyɔɔbuŋŋi pɔŋŋu. Taa pɔ̄ nsan ŋí yàntī ḿ lítí.

²Kpòotī m-landɔkɔi kí dàkà m-pɔbil iciin saŋŋu. Niinee maa làá súntí m-yìntitam pu, àá ikpiti in m ŋá kaa lèe.

³Mimmee m-yìntitam kaa làá bùtī, ní m-kpitii mun kaa làá dòon̄ kí kpúkuń. Maa làá lítí m-nannanliibi nimbiin ní bíǹ kaa nín bēel̀-mi.

⁴Ti-Dindaan, m-maŋfal Baa nì di-Nimbɔtiu, taa yàntī ḿ nīn kpèé ki sìŋkīǹ bin kíǹee.

⁵Kàkatī nnimbitaataam kí wàatī-mi.

⁶Taa yàntī njinjim nì ŋwuŋgban kɔdeebi ń jī m-pu dinyandi. Taa dū-mi kí líiǹ ajɔkɔntuun. Dipùtil

⁷M-biyaamu, ní bīfìmaan ni-nyɔɔbuŋŋi ń taa nín̄ kpòotī-ni. Un di nóó m-dàkatam neeyee, icoo kpá kí cúú udaan.

⁸Unikpiti u-ba nyɔɔbuŋŋi di sàtī-u, ŋíǹ di lúkufí usambiidaan nì ulambidaan[132].

⁹Taa yàntī án mántíǹ-si á nīn pùtī, kí taa nín̄ yíì Circir Nimbɔtiu yindi múlmul[133].

¹⁰Uyumbu un kpiliu kpèé u-tundi nyíki nyikee kaa lóotí tigbati buŋwati u-wunti pu. Míǹ ní unil un di pùtī múlmul ní ki yíì Unimbɔti yindi fám fámee kpitii kpá kí pítí.

¹¹Unil un pùtī múlmulee yìntīǹ mara ní ní u-dicaŋkun yab làá nīn pée fòol̄ ditafadaaldi. An yaa yīntiǹ-u ní u pūtèe, u fōō dibɔkpil dee. U yaa kaa dākafì ní ki pūtèe, u yīntì mili pu dee. Udaan yaa pūtì fámee, baa làá sòoǹ kí pɔ̀-u, ní nnaabu kaa làá lóó u-dicaŋkun[134].

¹²Nsòontam miba bée ki náań nì ŋkúm. Bí taa pée ká an sòontam pu Jaakɔb naantiibi kansikin! Di sá yii bin yú nì Unimbɔti deedeeyee kaa máaǹ kí nīn sòoǹ míǹ, kaa máaǹ kí dū bi-ba kí cèeǹ an kpitiin.

¹³Taa yàntī a-nyɔkɔ ń mántíǹ tibɔfan disoondi, di sá yii an di yàntī unil ń dāá yìntī.

¹⁴A yaa kā binikpaambi kansikinee, á dàkafì a-baa nì a-na pu. Án nín làá ŋá pu á taa súntí yii a bí bi-nimbiin a-nyɔkɔ ń ŋmátí-si á sòoǹ tigbaambɔtee. Niinee a dāa lì yii bi yaa kaa bàà màl̄-si an sɔ́, ní kí dāá tɔ̄ ŋwiin ŋun bi màl̄-see mbusu.

¹⁵Unil un mántiǹ tibɔɔfan disoondee, baa ti ŋūǹ kí kpòotī udaan u-maŋfal wiiŋyi poon. Uninja un ŋáań ajɔkɔntuunee

¹⁶Anicil ali aba bí ki ŋáań ikpiti ki kútí ikpiti pu, ní dinicitataatiil bí ki dátí Unimbɔti ŋuul ki tòó di-ba pu. Mpeepeekaaminee, bin kpɔkɔsib fòol̄ lìblib kii ŋŋmee. Ŋu yaa kaa tin pée wùn̄ ki kúntì, ŋu kpá kí kpú. Bi yaa kaa ŋá bi-kpɔkɔsib nín bālifì puee, an kaa kúù. Míǹ boonee, uninja un dɔ̀ nì un u yaa pée kée bɔti. U làá nīn gbíntìi nìkì ki ŋáań míǹ ní áli u-kpɔkɔsib ń dāá nàan̄-u kii ŋŋmee.

¹⁷Ujɔkɔŋfu ceeyee, unimpu kamaa ŋān̄ bí mɔ̀nnì-u ní, úǹ kaa mɔ̀nnì binimpoobi kí gīī, see u-kúm dal[135].

¹⁸Uninja un mun nyēē u-nimpuu boon, ní ki lì u-ban yii: «Ŋma di wāĺ-mi? Dibɔmbɔndi māntìi tú-mi ní agun mun lìkī-mi. Báà ubɔ kaa wāĺ-mi. Ba pu ní ḿ nīn fàŋkí? Yilpu fɔ́ŋŋŋ Nimbɔtiu kaa làá téetí m-kpitii pu[136].»

¹⁹Tin an niliuee fàŋkée di sá binib ń taa ká-u, ama u súntì yii ti-Dindaan nimbiliŋ wāĺ ki jítiǹ ŋwìiń ŋfunyɔm kutukub saalaa pu. Ti-Dindaan wāĺ tin kɔkɔ binib ŋáańee ní ki wāĺ kí bà laakin bí dibalin kábuee[137].

²⁰Ti-Dindaan nìn nyí tiwan kɔkɔ ki wāatì ní ki nín náań-tì, ní ki làá nīn gbíntìi nyí-tì ti-kpátam boon.

²¹Bi làá dāá cúú an niliuee ŋyunti ŋun waa pée gíti cɔ́tí yii bi làá cúú-uee ní, ní bí dáaĺ u-tafal mmɔŋkijaa pu[138]. Unimpu un nyēē u-cal boonee

²²Tibɔbaantiil di dɔ̄ ki cí unimpu un di nyáń u-cal boon, ki màl̄ u-cal kibiki kin waa yèe kí jī u-fakalee.

²³Mpeekaamee, u yīntiǹ Yilpu Fɔ́ŋŋŋ Nimbɔtiu marau. Nliliitiimee, u yīntiǹ u-cal. Ntataatiimee, u ŋá tilaakpaal ki kɔ́ǹ u-ba tijɔkɔndi ki cáá ubɔ pool ki màl̄ kibiki.

²⁴Bí cáá-u kí cùnnì samaa nimbiin, ní kí cɔ̄ŋkì kí béé u-biyaamu bɔti.

²⁵U-biyaamu gbanti kaa làá báań inyaan, ní u-paŋŋi mun kaa làá lòoǹ abil[139].

²⁶Unimpu gbanti cooi pée kpá kí pítí. U-kúm boonee, binib yaa láa pée téetì u-puee, bi làá dāá nīn tòó-u mbusu ní.

²⁷Bin làá dāá páań u-boonee làá dāá béé yii baa ŋūǹ kí dū tiba kí ŋmàntīǹ ti-Dindaan faaŋku, àá tiba kaa mɔ̄ ki bàn̄ á dū a-ba kí yā kí nákáǹ ti-Dindaan marab.