Read Ntcham Siracide 24 Bible Online

Siracide 24 - Ntcham bible

Siracide 24

¹Iciin nyɔŋkii Iciin bí ki nyɔ́ŋkí i-ba, i bí i-nibul kansikin ki dàkà i-ba.

²I wāaǹ kinyɔkɔ ki sòon̄ Yilpu Fɔ́ŋŋŋ Nimbɔtiu samaau poon, ki bí ki gà i-bindi u-pɔŋŋu nimbiin.

³I bí ki lì yii: «M nyáń Yilpu Fɔ́ŋŋŋ Nimbɔtiu nyɔkɔn, ní ki bīiǹ kitiŋ kɔkɔ pu kii dipɔ̀ńdee.

⁴M-kɔŋkooŋŋu nìn bíń yilpu fɔ́ŋŋŋ, ní m-beejal nìn tɔ́kɔ́ ditagbancancaal pu.

⁵M-baba ní m cōom̀ ki māntìi tú kutagbɔŋu kɔkɔ, ní ki cōom̀ ki sīntì doooo tiŋku taapu taapu.

⁶M jíń dibeel tiŋku nyiŋgbanti nì kitiŋ kɔkɔ pu, ki jíń dibeel anibul nì atimbun kɔkɔ pu.

⁷Bi-kɔ ceeyee, m nyàab̄ laakin ní m làá kàl̄ee, m nyàab̄ ditinjandi din pu ní m làá nīn kóòyee.

⁸Niinee ní duulinya kɔkɔ náanliu tīī-mi mara, úǹ un náań-mee dàkā-mi laakin m làá nīn kóòyee. U tùkū-mi yii: <Nín̄ kóò Jaakɔb naantiibi kansikin, fōō a-fakal Isirayeel tiŋkin.>

⁹Kí wàatī duulinya ń nīn bée, kí wàatī tiwan kɔkɔ ń kíĺee, u nìn náań-mi ní m làá nīn bí, m làá nīn bí kí nīn cá jaanjaan.

¹⁰M nìn bí circir kɔŋkooŋŋun ní ki nìn tūǹ u-tundi u-nimbiin. Míǹ ní m dāa kāl̀ Siiyɔn jool pu.

¹¹Úǹ di kāaǹ-mi kitinneeŋkaai poon, ní ki yāntì m jíń dibeel Jeerusaleem tiŋki pu.

¹²M báaǹ inyaan dinibul din cáá tinyoolee kansikin, ti-Dindaan tiŋki di kíǹ ki sá m-fakal.

¹³Niin ní m wíiǹ kii Leebanɔn tiŋkin subu bun bi yíì seediree, kii siipreesi subu bun yú Eermɔn jool yilpuee.

¹⁴M wíiǹ kii ibafi in yú Eeni-Geedii buŋŋu caŋinee, kii looriyee subiyaamu mun bí Jeeriikoo tiŋkinee, kii ɔliifi sunyaambu bun sí kitiŋ kin tèen̄ee puee, kii plataani subuee.

¹⁵M nìn yāntì m-sɔnsɔfiŋu gbītì kii kiinamɔn nì talaalub bin kíǹeeyee, kii miiri un sá talaalumɔmmɔntee, kii galbanum nì ooniikisi nì siitakiti talaalubee, àá kii talaalutuukaa nyiim nín yíkí circir kɔŋkooŋŋun puee.

¹⁶M tāntì m-paŋŋi kii teereebinti subuee, m-paŋŋi ŋin di cáá kunyaaŋŋu nì tinyoolee.

¹⁷M tɔ́ mpambiyaamu nnyaammu kii fiinyi subuee, ní m-pumpukum lòon̄ tinyool nì tigaajati subiliŋ.

¹⁹«Dāam̄maan m-cee, nimbi bin fáatì m-bɔtee, ní dāan̄ kí ŋmɔ́ m-subiliŋ ŋin m tīī-nee kí díkí.

²⁰Di sá yii kí nīn dàkafī m-puee mɔ̄ ki jítiǹ tisiil, ní kí nīn cáá-mee mɔ̄ ki jítiǹ disigbandi.

²¹Bin di yaa ŋmɔ́-mee, ŋkùm làá gíti cúú-bi, ní bin yaa nyùn̄-mee, nnyinnyoo làá gíti cúú-bi.

²²Un di yaa pílifíǹ-mee, icoo kaa làá cúú-u, ní bin tūǹ ditundi nì mee kpá ki làá yìntī.» Iciin nì Unimbɔti marau

²³Tin bí nee kɔkɔ kā Yilpu Fɔ́ŋŋŋ Nimbɔtiu poondi gbɔŋkun ní. An sá Mara un ní Mooyiisi nìn tīī-ti tí nīn nóóyee. U nìn tīī án nīn sá Jaakɔb naantiibi fakal ní.

²⁵Mara gbanti di yàntī ní Iciin ń gbí kii Piisɔn mɔɔlee, àá kii Tiigiri mɔɔl nín gbéè pu kuseeu yuntiŋuee.

²⁶Úǹ di yàntī ní dinyil ń gbí kii Eefiraati mɔɔkpaandee, àá kii Jɔɔdan buŋŋu ŋyunti ŋun bi cēē tikpaajinee.

²⁷Úǹ di kpáatí didàkal ki sìtī an kɔkɔ pu kii Niil mɔɔnyimee, àá kii Giiwɔn buŋŋu ŋyunti ŋun bi kìtī fiinyi subiliŋee.

²⁸Unipeekaa kaa láá ŋúń ki béè-i, míǹ ní unijoolkaa mun kpá kí gbìl̄ i-taapu.

²⁹Di sá yii Iciin landɔkɔi wāā ki jítiǹ tiŋkukpaan, ní i-saŋkii nyóò ki jítiǹ tiŋkukpaan taapu taapu.

³⁰Mamee, m nìn sá kii dimɔɔl buntaalee ní, kii kunyiŋfuŋu kun pùub̀ ki kóò bukpaa bubɔnee ní.

³¹M nìn lī m-ban yii: «M làá yàaǹ m-kpaabiliiki nnyim, m làá yàaǹ adan ŋin ní m kùn̄ ki cóoǹ tiwanee nnyim.» Ama ní m-nyinsaŋŋuee dūu kpántì dimɔɔl, ní m-mɔɔlee mun dūu kpántì tiŋku.

³²M làá yàntī m-dàkal ń ŋmíntí kii kutaawuntuŋuee, ní kí yàntī di-walifiŋu ń ŋmíntí kí bà ndandati.

³³M làá tí dū m-dàkal kí yàaǹ kii Unimbɔti bɔnaatiliu bɔtee, ní kí dū-dì kí tīī anaantitɔntɔkɔ ŋin bí ki dòoń boonee.

³⁴Ni káaa, an kaa sá man baba pu ní m bìǹ, ama an sá bin kɔkɔ nyàab̀ Iciinee pu.