Read Ntcham Siracide 25 Bible Online

Siracide 25 - Ntcham bible

Siracide 25

¹Tiwammɔntiil tita nì tiwaŋkpitil tita Tiwan tita di bí ní ki baasii fáatì m-pɔbil tikpil, ki ŋān̄ ti-Dindaan nì binib cee. Tíǹ di sá yii nnabiyaamu ń nīn gbìliǹ tɔb tiŋan, kubɔɔtiiu ń nīn bí binib bin kóò ki pìl̄ee kansikin, nnyim ń taa nín̄ jītí unimpu nì u-cal kansikin.

²Anicil ata di bí m-nimbil kaa là kí wāl̀, ní bi-bimbim kɔ̄ntí-mi diŋuul tikpilku. An nibee di sá ufalaadaan un cáá dilambilee, ugaaja un di mɔ́ntí inyimɔnee, nì utikpil un lóò dinyil ki ŋáań tilaakpaalee. Ipaati in ní titikpiti tììyee

³A yaa kaa kpáafì tiba ki síiǹ a-pɔntin, mana ní a làá dāá ká tiba a-tikpitin?

⁴Bin yikpiti píil̀ee di ŋūǹ kí sòoǹ tibɔti ti-pú, ní bitikpilib di baasii ŋūǹ kí tīī isaŋkimɔnti. Ba gíti ŋān̄ kii míǹ!

⁵Bitikpilib cee ní iciin bí, ní ilandɔkɔ nì isaŋki bí binikpaambi cee.

⁶Bitikpilib beefuuliiki di sá dinyil din bi cááyee, ní bi-nyooti sá bi nín fàŋkí ti-Dindaanee. Nnaam min jítiǹ min kíǹee kɔkɔee

⁷Tiwan tiwa di bí ní man dàkafī yii tì tìì nnaam, ní m ŋūǹ kí tùkù-ni kun sá kusaalaatiiuee. Un bí mmɔnnee di sá un pɔbil sɔ̀m̀ u-biyaamu puee, nì un kāl̀ kitiŋ pu ki yúntì ki ká u-nannanliibi lítitamee.

⁸Un bí mmɔnnee di sá un nimpuu cáá dinyilee[140], nì un limbil kaa yāntì u yīntèe, nì un kaa tūǹ ditundi ki tìì un u kpíǹee.

⁹Un bí mmɔnnee di sá un di ká nlandɔkɔmɔntee, nì un di sòoǹ ní binib pílifíǹ-uee.

¹⁰Un di ká Iciinee lafun sá ukpaan, ama ubɔ kaa jítiǹ un di fàŋkí ti-Dindaanee[141].

¹¹Kí fàŋkì ti-Dindaan di jítiǹ tikɔkɔ. Ŋma ní bi ŋūǹ kí dū un fàŋkí ti-Dindaanee kí ŋmàntīǹ[142]? Unimpukpiti bɔti

¹³Tiweendi tiba kaa bí ki bàn̄ dipɔbilin yati, ní ntoom miba kaa bí ki bàn̄ unimpu toom.

¹⁴Nnaabu ŋubɔ kaa bí ki bàn̄ kináŋ nín cāabìń ŋuŋyee. Ipɔntoon iba kaa bí ki bàn̄ unannanli pɔntooŋyi.

¹⁵Tilool tiba kaa bí ki bàn̄ ukoobu yati, ní diŋuul diba mun kaa bí ki bàn̄ unimpu yal.

¹⁶An sɔ́ man nì gbikinti àá kukoobiliŋŋu ń nīn kóò ki jítiǹ man nì unimpukpiti ń nīn kóò[143].

¹⁷Unimpu toom yàntī u-nimbiin ń cúú kpántí mbamin. Ŋyunti gbantee, u-nimbiin dūú bɔ̀ntī ní u kíǹ ki náań nì digbiŋgbil.

¹⁸U-cal cáà u-kɔŋkɔnnaatɔb cee ki jīǹ, ní ki bí ki yáliŋkí, min kamaa waa bàà là mimmee.

¹⁹Digìńdi diba kaa bí bí dūú ŋmàntīǹ din unimpu tììyee. An nimpuuee ń fōō binikpitib tafadaaldi.

²⁰Kii ujaŋkpil yaa bíi dàb̀ kigbantaŋ kin cáá dibulee an bí puee, míǹ ní an sá ki tīī uninja un bí soooo ní ki cáá unimpu un sòoǹ tikpilee.

²¹Taa yàntī unimpu nyaaŋku ń dáaĺ-si, kí taa nín̄ néeń-u u-píjati pu.

²²Unimpu yaa kpèé uninjee, an cāabìń diŋuul nì iwoon nì icoo ní.

²³Unimpukpiti tuuŋŋi di sá diwuŋyɔtil nì nnimbiin dibiildi nì dipɔɔbiildi. Unimpu un kaa tìì u-cal dipɔɔsɔŋkilee tuuŋŋi di sá iŋal in kaa ti cáá mpɔnee nì atabiŋyil ŋin kpíìyee.

²⁴Unimpu di sá ikpiti nyeel, úǹ pu ní ti-kɔkɔ kíǹ ki kúù[144].

²⁵Á taa yàntī nnyim min kā a-lɔŋkunee ń lùntì kí fá, kí taa yàntī unimpu un cáá ntoomee ń nīn tɔ́ u-ba ki sòoǹ.

²⁶U yaa kaa làá kíí kí ŋá a nín lī puee, á jà-u ní yàkatī tɔbin[145].