Read Ntcham Siracide 26 Bible Online

Siracide 26 - Ntcham bible

Siracide 26

¹Uninja un cáá unimpumɔntee naam Uninja un cáá unimpumɔntee bí mmɔnneeee! Udaan maŋfal wiiŋyi làá bùtī mili pu.

²Unimpu un cáá dipɔbilee tìì u-cal dipɔɔpindi ní. U-cal pɔbil làá nīn pée sɔ̀m̀ ní u-maŋfal wiiŋyi kɔkɔ poon.

³Uninja un cáá unimpumɔntee ká diyimɔɔl ní. Udaan fōō tiŋan tin ní ti-Dindaan tìì bin fàŋkí-uee ní.

⁴Udaan yaa sá usoodaanaaa, ugaajaaa, u pée bí dipɔɔpindin ní. Ŋyunti kamaayee an pée mɔ̄ǹ-u ní. Nín̄ nyí nì a-ba nì binimpoobi

⁵Tiwan tita di máfí m-pɔbil, ama kunanaatiiu kúǹ fàantí-mi ní. Tíǹ di sá binib nín máafí tinyimɔmbɔti kitiŋin puee, nì binib nín kōontí kí múkúǹ dicilpu puee, nì binib nín tūntí bi-jutiibi abɔgaan puee. Tíǹ gbanti kɔkɔ pɔ̄ɔ̄ ki jítiǹ ŋkúm pu.

⁶Ama tiba kaa cáá dipɔɔbiildi ki gbí falaa ki bàn̄ unimpu un ŋáań u-juti ipoompoonee. U yìiǹ an kɔkɔ pu ní ki cāab̀ asambii[146].

⁷Unimpukpiti sá kii inaa in baa kpàl̄ tiŋanee ní. Kí kpòotī-uee sá kii á cúú unoomee ní.

⁸Unimpu un yaa nyù ndaam tikpilee gífí diŋuul ŋkpitim pu ní. Waa ŋūǹ ki bāal̀ u-cooi pu.

⁹Kinimpulaakpaai nín kpèé bininjab puee di yàntī bí béé-u[147]. U nín kpèé ki kábití puee di yàntī á béé-u.

¹⁰A-bisal yaa kaa ŋūǹ kí cúú u-bee, á mɔ̀tīí cīití-u tiŋan. Yaa sá fám u yaa pée ká mpaan fiiiyee, u ká nnaakpal dee kí nyā.

¹¹Nín̄ nyí nì a-ba u nín kpèé bininjab an kaa ti cáá-u icoo puee, ní u yaa mɔ́ntì-si, án taa ŋá-si bitii.

¹²Kii usaŋkinli un nnyinnyoo cááyee nín wàantí u-nyɔkɔ kí nyɔ̀ nnyim min u yaa péé ki kée puee, u bɔ́ntì kí kàl̄ dikaakpal kamaa taapu ki cí kí dū u-ba kí tīī unipeepeekaa un làá dāan̄ee. Unimpumɔnti pampakaku

¹³Unimpu nyaaŋku di tìì u-cal mmɔn, ní u-yábitam di yàntī u-cal cáá ŋgbampɔn.

¹⁴Unimpu un kaa sòoǹ tikpilee sá ti-Dindaan wampɔkaati ní. Un di fōō didàkamɔntiilee kaa cáá juti.

¹⁵Unimpu un sīntì u-ba taapuee nyaaŋku kaa cáá juti. Tiba nì tiba kaa bàn̄ un di ŋūǹ ki ŋúb̀ u-bee[148].

¹⁶Unimpunyaan un di bɔ́ntí u-diikuee bí kii ŋwìiń nín nyēeń pu ki jɔ́ḿee ní.

¹⁷Kii fitila un tɔ́kɔ́ circir tɔ́kɔŋkaati[149] puee nín ŋmíntí puee, míǹ ní nnimbiin ŋun ŋān̄ee bí tiwunnyaandi pu.

¹⁸Kii sindaariya jaantalkub bin tɔ́kɔ́ animbil kúti tílkaati puee nín bí miŋyee, míǹ ní ataa ŋin ŋān̄ee tɔ́kɔ́ atagbin ŋin pɔ̄ɔ̄yee pu[150]. Tiwan tita tin bɔti páb̀ unilee

²⁸Tiwan tili di bí ki páb̀ m-pɔbil, ama kutataatiiu kúǹ gbítí m-ŋuul ní. Tíǹ di sá ubaatandaan un kpántì unandaanee, nì binyiliibi bin bi dūu fá ki kpèé fámee, nì unil un fá deedee saŋŋu ki kíǹ ki ŋáań ikpitee. Ti-Dindaan làá yàntī kitàataajiki nín kpɔ̀-u. Ikpiti in unyampu kaa ŋūǹ kí lóotée

²⁹An pɔ̄ɔ̄ uwannyafil ń taa mùul̀ kí ŋá ikpiti, ní ki pɔ̄ɔ̄ unyampu mun ń taa kɔ́ ikpitin.