Read Ntcham Siracide 27 Bible Online

Siracide 27 - Ntcham bible

Siracide 27

¹Binib tikpil ŋá ikpiti bi nín là kí ká ipaati tikpilee pu. Unil un là kí kpántí ugaajee kaa cáá disaasɔl[151].

²Kii dikpakpaal nín kóò ataŋkpee ali ŋin nákáǹ tɔbee kansikin puee, míǹ ní ikpiti sākantí uwannyafil nì uwandal kansikin.

³Unil un di kaa fàŋkí ti-Dindaan nì u-pɔbil kɔkɔee, u-dicaŋku kaa làá sūŋkì ní kí nàan̄. Tin unil sòoǹee di dàkà dinicil din u sée

⁴A yaa jáká tiwan kidicaayinee, tin kaa ŋān̄ee di kīntí. Míǹ ní unil yaa kíĺ ki bíi sòoǹee ní a kāntí u-yìntitam.

⁵Kii bi nín pūul̀ ditansambil kí nín béé di-nyaaŋkuee, míǹ ní unil bɔsooŋyi poon ní bi béetí dinicil din u sée[152].

⁶Disubil di dàkà min ní bi cóoǹ busubu ki ŋáŋkì-buee, míǹ ní unil bɔsooŋyi di dàkà tin kā u-pɔbilin u dàkafēe[153].

⁷Unil yaa kaa láá sòon̄, á taa pàkà-u, di sá yii isoon poon ní a làá béé dinicil din u sée. Ipaati in iciin bimbim cááyee

⁸A yaa nyàab̀ kí ŋá tin bí deedeeyee, a làá ŋmā kí ŋá míǹ, a làá dūú pèen̄ kii dibɔkutinyaandee ní[154].

⁹Inoon in pēēyee di kpáfí ki kóò dicilpu. Míǹ mbaantiim ibaamɔn nì ibaamɔndaan di kpáfí.

¹⁰Kii gbikinti nín nyàab̀ upeel ki cúú kí ŋmɔ́ puee, míǹ ní ikpiti cɔ́ŋkí ki nyàab̀ bikpitiŋaliibi[155].

¹¹Unil un nóó Unimbɔtee sòoǹ iciin bɔti ní, ama ugbaan úǹ pée kpántí kii uŋmalee ní.

¹²Á taa nín kàal̀ bigbaambi cee ki yúntí, ama a ŋūǹ kí kàl̄ biciŋfitiibi cee kí yúntí.

¹³Bigbaambi sooŋyi gbítí diŋuul ní, ama ikpiti bɔti di mɔ̄ǹ-bi disoondi ní bi lāā.

¹⁴Binib bin néeń ki pùtī múlmulee nyɔɔbuŋŋi sá ntimbiil ní. An nibee yaa tin bíi kpákèe, see á ŋéeb́ a-tafaliŋ.

¹⁵Bilambidambi yaa jáàyee, fatiku nyēē ní, bi yaa bíi sìí tɔbee, an kaa mɔ̄ dipilifil. Á taa nín̄ bìitī a-juti bɔɔŋŋi pu

¹⁶Unil un bìitī abɔɔn puee bíiĺ dimákal din bi cáá u-puee ní, u pée gíti kpá kí ká bɔɔ[156].

¹⁷Nín̄ néeń a-bɔɔ kí nīn cáá u-pu dimákal. Ama a yaa bīitì u-bɔɔŋŋi puee, á taa nín gíti bìǹ ki nyàab̀ u-bɔɔtiiku.

¹⁸Tiŋman, u-bɔɔtiiku wáŋkì a-cee kii unil nabiki di yaa kpíì kì wáŋkì u-cee puee ní.

¹⁹Kii kinɔmbiki yaa ŋmátì ki nyáń a-ŋaan, kì nín yíkí kí ŋàaǹ puee, míǹ ní a yaa yāntì a-bɔɔ ŋmátì ki nyáń a-ŋaanee, aa ti pée kāntí-u.

²⁰Taa ti nyàab̀ yii a làá jà kí cúú-u, kun puee úǹ pée sáǹ ki kɔ́ ndan. U sáǹ kii kipeewuŋ nín ŋmátí kí nyā kutaliŋŋun puee ní.

²¹Bi ŋūǹ kí cáaǹ tiweendi, ki ŋūǹ kí sìì tɔb kí fàtīí mɔ̄ɔkì. Ama un yaa bīitì abɔɔn puee kaa ti cáá dimákal diba. Mpɔnnyoon

²²Un di dàab̀ binibee bíi bɔ́ntí kí ŋá tin kaa ŋān̄ee dee. A yaa tú-u nsannee, á kàkatī a-ba kí wàatī-u[157].

²³U yaa bí a-ceeyee ní u-nyɔkɔ mɔ́ málmal, ní a yaa sòon̄ tibee ní u pàkà-si. Ama a-boonee ní ú kpántí isoon, ní kí dū sisi a-ba nyɔɔbuŋŋi pu kí kɔ́ǹ-si agìńni.

²⁴Tiwan tikpil bí duulinyan m ná-tì, cilinjee unil un bí kii mimmee. Ti-Dindaan mun nimbil kaa là kí wāl̀ an niliu.

²⁵A yaa tɔ́ ditaŋkpal kutaayee, sisi a-ba yil ní dì làá gítiń kí yā. A yaa mɔ́ntì ki tīiǹ a-juti kunantaŋŋuee, bi làá tìin̄ si mun kunantaŋŋu ní.

²⁶A yaa gbìn̄ dibɔbilee, sisi a-ba di làá lítí poon. A yaa píĺ kutaliŋŋuee, sisi a-ba ní ku làá sàl̄[158].

²⁷Unil yaa ŋá ikpitee, i làá fàtīí gítiń u-pu ní, waa làá béé an nín làá dīń pu kí bàń-uee.

²⁸Bilambidambi di néeń ki bèel̄ binib ki sìí-bi. Ama ipɔntoon náká ki cí-bi kii gbikinti nín nākantí pu ki cīití upeel puee ní.

²⁹Kutaliŋŋu làá sàl̄ binib bin fàal̀ bin yú nì ti-Dindaan deedee naabuŋu puee. Falaa di làá bà-bi kí wàatī bí nín kpú. Nín cáá tin a-juti yīntiǹ-see ki pūǹ-u

³⁰Kudɔ̀ŋu nì diŋuul sá tiwan tin kaa ŋān̄ee ní. Unikpiti nyí tiwan gbanti tiŋan.