Read Ntcham Siracide 28 Bible Online

Siracide 28 - Ntcham bible

Siracide 28

¹Unil un yaa tɔ̀n̄ u-ba ipɔntoonee, ti-Dindaan làá tɔ̀ udaan ipɔntoon. U làá téeǹ-u ikpiti in kɔkɔ u ŋá-uee[159].

²Dū a-juti kpitii in ní u yīntiǹ-see kí pɔ̄-u. Niinee, a yaa mēē ti-Dindaanee, u làá dāá dū si mun kpitii kí pɔ̄-si[160].

³A yaa dū a-juti ki ŋá a-poonee, mana ní a làá ŋmā kí mèè ti-Dindaan ú cáaǹ-si?

⁴A yaa kaa súń bin kíǹee saai, bin sá binib kii siiyee, mana ní a làá mèè ti-Dindaan ú dū sisi a-ba kpitii kí pɔ̄-si[161]?

⁵Sii un sá unil ki kúùyee yaa dū a-juti ki ŋá a-poonee, ŋma úǹ di làá kíí kí dū a-kpitii kí pɔ̄-si?

⁶Dàkafì a-kúntitam pu ní kí fá kináŋ. Dàkafì ŋkúm nì a-wunti nín làá sūū miŋyee pu kí ŋúb́ ti-Dindaan marab.

⁷Téetí ti-Dindaan marab pu, ní kí taa ti dū a-juti kí ŋá a-poon. Téetí Yilpu Fɔ́ŋŋŋ Nimbɔtiu poondi pu, ní kí dū ikpiti in bi yīntiǹ-see kí pɔ̄. Kujaau bɔti

⁸Kàkatī a-ba kí wàatī kujaau, niinee a-kpitii kaa làá nīn wīikí tikpil. Di sá yii bin fatikuu tùm̀ee di nyàatī kujaau.

⁹Ukpitiŋal jāantí bibɔɔtiibi ní ki cāabìń diyakatil laakin ŋgbansɔŋfi bée.

¹⁰Bi yaa kútí idɔ ŋŋminee, ŋu mɔ̀tīi fòol̄ ní tikpil. Kujaau yaa yúntèe, ku mɔ̀tīi pɔ́ɔkí ní. Unil yaa cáá mpɔn tikpilee, u mɔ̀tīi ŋáań tipɔmbɔti ní. Unil yaa cáá tigaajati tikpilee, u-ŋuul mɔ̀tīi pɔ́ɔkí ní[162].

¹¹Kunikpɔŋkpɔkɔu kun bàń dicilpuee fòol̄ ŋŋmi ní. Kujaau kun pu ní baa túkúee yàntī fatiku ń nyā ní.

¹²A yaa púfì ŋŋmi fiiiyee, aŋmilimbil di nyēē, ama a yaa tíil̀ timɔtan ki sītì ŋu-puee, ŋu kúù ní. Tiwan gbanti liitil nyēeń a-nyɔkɔn ní. Tikpitil tin mbɔmbɔtuku cāabìńee

¹³Mbusu dɔ̄ ki cí ubɔmbɔtukul nì milimilidaan, an dàkà yii unil un cáá nnyɔmu muli mulee. Di sá yii bi bíil̀ binib bin nìn gbìliǹ tɔbee tikpil kansikin[163].

¹⁴Mbɔmbɔtuku bíil̀ binib tikpil. Mbɔmbɔtuku yāntì binib sáń ki yìiǹ ki póotí ntimu. Ŋu nāaǹ ntimu mun bi máń agun ki túee, ki lábitì akpambal dicaŋŋi ki cìb̄.

¹⁵Mbɔmbɔtuku yāntì bininjab biba jìn̄ bi-nimpoobi bimɔntiibi, ki yāntì bíǹ lóò bi-gìńdi paatii.

¹⁶Unil un pílifíǹ mbɔmbɔtukuee kaa kāntí diŋuŋfil, kaa tí ŋūǹ kí nīn bí dipɔɔsɔŋkilin.

¹⁷Bi yaa fáá-si mbambaanee, a fòol̄ tiweendi ní, ama bi yaa sòon̄ ki bíil̀-see, an wìil̄ a-kpabiŋ ní.

¹⁸Binib tikpil kpíì kujaaun, ama baa wīikí ki bàn̄ bin dilimbil kūūyee[164].

¹⁹Unil un ní dilimbil kaa sòon̄ ki bíil̀ee, un di ŋmátìi nyáń di-ŋuulinee, un di kaa léeǹ di-kpancikiliuee, un ní di-kusakai kaa láá bóob́ ki kée, udaan bí mmɔnneeee!

²⁰Di sá yii dilimbil kpancikiliu sá tikúti ní, ní di-kusakai sá tasa kúti.

²¹Dilimbil kúm sá ŋkúŋkpitim ní. Á nīn kóò ditaŋkpiilin sɔ́ǹ di-kúm.

²²Dilimbil kaa ŋūǹ kí ŋá bin fàŋkí Unimbɔtee tiba, di-ŋmilimbil kpá ki làá wà-bi dalba dalba.

²³Bin di fàtī bi-boon ki tìì ti-Dindaanee di kóò dilimbil ŋaan. Dì làá fōō bi-kansikin ní kaa làá ti kpú jaanjaan. Dì làá yùkū kí léeń bi-pu kii gbikintee, ní kí dáaĺ kí cātikì-bi kii ugbiiyee.

²⁴Kpèè, a gà ikuŋkum ní kí bàkā a-kpaabu,

²⁵nyàab̀ punuu nì tikpàlkaal kí pìin̄ a-nyɔkɔ mun.

²⁶A kpèé a-nimbiliŋ nì a-sindaariyau tiŋan,

²⁷nyàab̀ saniya nì ditaŋkpaŋmantikaal kí ŋmàntī a-nyɔɔbuŋŋi mun.

²⁸Á nīn nyí nì a-ba a-limbil ń taa yàntī á gbéetí. Yaa sá fám, a làá lítí kí kɔ́ bin bíi cɔ́ŋkí-see ŋaan.