Read Ntcham Siracide 29 Bible Online

Siracide 29 - Ntcham bible

Siracide 29

¹Á pìnnì unil tiwanee kaa sá tikpitil Un pīnnì u-nabiki tiwanee ŋá-u tiniti ní. Un tútúǹ u-nabikee nóó Unimbɔti marab ní[165].

²Pìnnì a-nabiki tin u nyàab̀ee. Si muee, bi yaa pīnnì-si tiwanee, á téeǹ ŋyunti ŋun ní a síiǹ yii a làá téeǹee[166].

³A yaa sòon̄ yii a làá ŋá puee, ŋá min ní binib làá nīn máká a-puee. Mimmee, ŋyunti ŋun kamaa a yaa láa nyàab̀ tibee, a làá ká kudɔŋu.

⁴Binib tikpil dàkafī yii tiwampinnikaal sá tiwampiikaal ní ní ki yàntī agìń kóò bin pīnnì-bi an wantee.

⁵Kí wàatī ú pìnnì u-juti cee animbilee, u sɔ̀kɔl̄-u ní ki sòoǹ nì u kinyɔɔmɔɔi u-gaajati pu. Ama ŋyunti yaa bàn̄ ú téeǹee, ní u cáa nákà. U sòoǹ ní ki yáliŋkí ŋma, ní ki cáa tūntí tibɔti tin jítì jítì u-puee pu.

⁶Báà u yaa làá pà animbil ŋin bi pīnnì-uee, un pīnnì-uee yaa ká dijandee, mimmee u ká diyimɔɔl dee. Yaa sá fám, bi fúkúl̀ u-gaajati, ní ki gíti ká unannanli ki kútì kaa ŋá tiba. Mbusu nì asiibil ní bi làá dūú téeǹ-u. An nín bàà sá ú tīī-u tinyoolee, ní u kíǹ ki kpèé-u fám.

⁷An pu ní binib tikpil yíití kaa pìntí binib tiwan. An kaa sá yii bidambi ŋáań ntoom, ama bidambi fàŋkí yii bí taa fūkul̀-bi fám ní. Á pɔ̄ bisoodambee cáá ipaati ní

⁸Ama á nīn cáá kimɔtii biwɔfib pu. Taa yàntī bí cīití tikpil kí wàatī ní á nín pɔ̄-bi tiba.

⁹Kí nīn tɔ́ Unimbɔti marauee, á tūtuǹ bisoodambi. An páb́-bi ní, an puee á taa yàntī bí gítí iŋaŋkulim[167].

¹⁰Kíí kí fá animbil kinabiki àá ubɔɔti pu. Míǹ sɔ́ǹ á yàntī ŋí dòon̄ ditaŋkpal diba taapu kí dāmintì.

¹¹Dū a-gaajati kí ŋá kii Yilpu Fɔ́ŋŋŋ Nimbɔtiu nín tīī-si mara á ŋá puee. Niinee tì làá kèetī-si kí jītíǹ sindaariya[168].

¹²Tiŋan tin a làá ŋá biwɔfibee ń nīn sá-si tigaajawan á dūú kpāafì. Fool boonee, tíǹ di làá dāá fīī-si dinimbinaamandin[169].

¹³Tì làá dāá jáǹ a-nannanliu kí tīī-si, kí jītíǹ digbampɔɔl din pɔ̄ɔ̄yee, àá kikpaŋ kin nyìm̀ee. Bin yūlifí bi-jutiibi boonee

¹⁴Unimɔnti kíikí kí yūĺ u-juti boon kí pà u-pɔndi, ama un di kaa cáá icooyee làá fá-u.

¹⁵Unil yaa yúl̀ a-boon a jíń dipɔndee, á taa súntí tiŋan tin u ŋá-see pu. Di sá yii sii puee waa mɔ́tì u-ba pu.

¹⁶Ukpitiŋal di bíiĺ un yúl̀ u-boon ki pàn̄ u-pɔndee gaajawanti.

¹⁷Unil un kaa nyí tiŋanee fàtī u-boon kí tīī un fīī-uee ní.

¹⁸Kí yūĺ unil boon yii a làá pà u-pɔndee nāaǹ bibulcinnib tikpil. An cīŋkì-bi kii tiŋku nyiŋgbantee. An yāntì bipɔɔbi yíkì bi-timmu, ki tú ki yìiǹ ki póotí nnicantimu.

¹⁹Ukpitiŋal un an júkufí ú yūĺ u-juti boon kí pà u-pɔndee nyàab̀ kí ká ipaati poon ní, ní bi làá sòoǹ kí kpɔ̀ u-bɔti.

²⁰Tūtuǹ a-juti kí nóó nì a-pɔŋŋu nyɔkɔm, ama á nīn nyí nì a-ba kí taa lítí. Unil máaǹ kí nīn bí u-ba pu ní

²¹Kí nīn bí dimaŋfalinee, tin unil máaǹ kí nīn cááyee di sá nnyim nì tijin nì tiwampeeŋkaal, nì kudii kí nīn kóò.

²²An sɔ́ á nīn bí falaa poon ki kóò sii a-ba diiŋŋin ki jítiǹ á nīn jīǹ tijimmɔntiil ubɔ dumpu.

²³A yaa cáá tiwan fiiiyaaa, a yaa cáá tikpilaaa, án nīn mɔ̄ǹ-si tin a cááyee pu. Mimmee ubɔ kaa ti yíì-si uniyaŋyan[170].

²⁴Tiba kaa gbí inimɔɔn ki bàn̄ á nīn yìiǹ ki póotí acin. Aa ŋūǹ kí wàan̄ kinyɔkɔ ní kaa nín sòon̄, kun puee a sá unicaan.

²⁵A làá yàkatī tijikaal nì tinyɔkaal kí tīī binib, ama báà ubɔ kaa làá jāam̀-si yii si nì ditundi. Kí kūtèe, a làá gbìl̄ bi bí ki sòoǹ-si kpeefam bɔti.

²⁶«Unicaanee, dāá síiń tijin! A yaa cáá tiba, á tīī-mi ḿ jī.

²⁷Unicaan, nyā kí pɔ̄ unikpaan ubɔ mpaan! M-nabiki kiba làá dāan̄, an puee m nyàab̀ kudii kun poon a bée.»

²⁸A yaa sá ulandɔkɔdaanee, tiba kaa wù ki bàn̄ bí yíiń-si unicaan àá a-pɔnliu ń sìì-si.