Read Ntcham Siracide 3 Bible Online

Siracide 3 - Ntcham bible

Siracide 3

¹Bibaatiibi nì bi-biyaamu M-biyaamu, pīlifìmaan ni-baa saŋkii[13]. Nín nóómaan-i ní kí ká difiil.

²Di sá yii ti-Dindaan di tīī ubaati mpɔn u-biyaamu pu, ní ki pú unaati nsan u-jipɔmbi pu.

³A yaa tīī a-baa jilmee, a kāntí a-kpitii pɔ̄tam ní.

⁴A yaa tìì a-na tinyoolee, a bíi kōontí tigaajati ki yōontí a-ba ní.

⁵Un tìì u-baa tinyoolee dāa kāntí úǹ u-ba biyaamu pu dipɔɔpindi. Daliŋkin u làá dāá mèèyee, ti-Dindaan làá dāá pīlifiǹ-u.

⁶Un yaa tìì u-baa tinyoolee làá kàl̄ kitiŋ pu kí yúntí. Un yaa tɔ́ ti-Dindaanee tìì u-na dipɔɔsɔŋkil.

⁷U tūǹ ditundi ki tìì u-baabi kii u-dindambee ní.

⁸Tīī a-baa jilma atuun nì anyɔɔbun poon. Mimmee u-biindi làá jēetí a-pu.

⁹Di sá yii ubaati nín tìì dibiindi diŋyee tìì u-biyaamu dicaŋku pu mpɔn ní, ama unaati yaa tɔ́ u-biyaamu mbusuee, an bíiĺ kudicaŋuee nyeel ní.

¹⁰A-baa yaa fá u-jilmauee, á taa nín̄ gúntí a-ba. U yaa fá u-jilmauee, an kaa ŋūǹ kí tīī-si tinyool.

¹¹Di sá yii bi yaa tīī a-baa jilmee, an sá sii a-ba jilmau ní. Bi yaa kpēē ubinaati fámee, an sá icoo ní ki tīī u-biyaamu.

¹²M-biki, kpèè a-baa u-puti poon, kí taa kɔ́ǹ-u digìńdin u-maŋfal wiiŋyi poon.

¹³Báà u-yil yaa lábitì, á jī u-pu kimɔtii. Sii un dáá pɔ̄ɔ̄yee, á taa kpèè-u fám[14].

¹⁴Di sá yii Unimbɔti kaa làá súntí tiŋan tin ní a ŋá a-baayee pu. Tì làá dāá ŋāŋkì a-kpitii kupaau.

¹⁵A yaa láa kɔ́ dinimbinaamandinee, ti-Dindaan làá dāá téetí a-pu. A-kpitii làá dāá wāŋkì kii ntaayim nín dùntī pu ŋwìiń puee.

¹⁶Unil un dū u-baa ki fée náań nì un bíi sìí Unimbɔtee ní. Unil un kɔ̄ntí u-na digìńdee, ti-Dindaan làá tɔ̄ udaan mbusu[15]. Dibasintil paatii

¹⁷M-jipɔɔn, sìntī a-ba taapu tin kɔkɔ ní a ŋáańee poon. Niinee binib làá nīn néeń a-bɔti ki jítiǹ un pūǹ binib tiwanee.

¹⁸A yaa kpántì unikpaanee, míǹ ní a máaǹ kí mɔ̀tīí sìntī a-ba taapu. Niinee ti-Dindaan làá fōō-si nì kulaŋŋaŋfitiiu[16].

²⁰Di sá yii ti-Dindaan pɔŋŋu sá ŋkpaan, ama bin sīntiǹ bi-ba taapuee di tìì-u tinyool.

²¹Taa nín̄ nyàab̀ tin pɔ̄ɔ̄ ki jítiǹ-si tikpilee, kí taa fíkití kí nyàab̀ kí béé tin jítiǹ a-pɔŋŋu puee.

²²Nín̄ pée dàkafī marab bin bi tīī-see pu, taa nín̄ nyàab̀ kí béé tin di bí dibalinee[17].

²³Taa dū atuun ŋin jítiǹ-see bɔti kí dūú páb́ a-ba. Tin a gíti dáá ká duulinyanee jítiǹ tin unil ŋūǹ kí gbìl̄ taapuee.

²⁴Di sá yii binib tikpil nín nyàab̀ kí gbìl̄ tikɔkɔ taapuee yāntì bi wáŋkì, ní bi-gbaandi landɔkɔi yāntì bi gáatì. Dibayoondi

²⁶Upɔɔgbifindaan dāa kúntíǹ tikpitil ní, un néeń dinimbinaamandee dāa kúù di-poon ní.

²⁷Upɔɔgbifindaan làá dāá ká agìń tikpil. U ŋáań tin kaa ŋān̄ee ní ki cáá ikpiti ki kútí ikpiti pu.

²⁸Ulambidaan nimbinaamandi kaa cáá dicáaǹdi, di sá yii ikpiti báaǹ u-ni inyaan.

²⁹Unil un cáá dinyilee dàkafī biciŋfitiibi laŋkpaŋŋi pu ní, uciŋfiti nín là puee di sá ú ŋátí u-tafal tiŋan kí pīlifì. Tí nīn tútúǹ tɔb

³⁰Kii nnyim nín gbíntí ŋŋmi ŋun fòol̄ee puee, míǹ ní a yaa pú uwɔfi tiwanee, an pítí ikpiti.

³¹Unil un ŋáań tiŋanee bɔ́ntí foolboon pu ní. Ŋwiin ŋun u làá dāá lítée, u làá dāá ká utikinli[18].