Read Ntcham Siracide 30 Bible Online

Siracide 30 - Ntcham bible

Siracide 30

¹Mbiyaamu dàkal Unil un néeń u-jipɔɔnee kaa tàantí-u dinaalabil. Boonee u-jipɔɔn gbanti di làá dāá sɔ̀ŋkì u-pɔbil[171].

²Un yaa dàkā u-jipɔɔn tiŋanee pɔbil làá dāá nīn sɔ̀m̀ u-pu ní. U yaa láa bí bin u nyée kansikinee, u dāa kíǹ ki mɔ̀ɔǹ u-pu ní.

³Un yaa dàkā u-jipɔɔn tiŋanee làá kɔ́ǹ u-nannanliibi ipoompoon, ní u làá nīn fàal̀ u-bɔɔbi nimbiin[172].

⁴Ubaati gbanti yaa kpíìyee, án làá nīn bí kii waa kpíìyee ní. Di sá yii u síiǹ unil un náań nì uee u-boon.

⁵U nín bí dimaŋfalinee, an nìn mɔ̄ǹ-u ú wāl̀ u-jipɔɔn. Ŋyunti nín bàn̄ ú kpúee, an kaa wùn̄-u báà fiii.

⁶Di sá yii u cáá un làá dāá tɔ̀ u-nannanliibi ipɔntoonee, nì un làá dāá téeǹ u-bɔɔbi tiŋan tin bi ŋá-uee[173].

⁷Ubaati un di bíiĺ u-jipɔɔnee làá dāá nyīī u-buuŋyi. Ŋyunti ŋun kamaa u yaa láa pée fáá mbiilee, án làá kɔ́ ubaatee ní fíŋfiŋfiŋ.

⁸Utaamu un baa yāntì u mántì dikpàldee kpántí utaŋwaati ní, míǹ ní kibiki kin baa dàkā tiŋanee dāa kpántí dikpiisi.

⁹A yaa sɔ̀kɔl̄ a-bikee, kì làá dāá ŋá tin làá kɔ́ǹ-si atulimee ní. Si nì kì yaa kpáfí ki gbíiĺee, kì làá dāá yàntī á sɔ̄.

¹⁰A yaa kaa là si nì kì ń kpāfì kí jī falaayee, si nì kì ń taa kpāfì kí lā. Yaa sá fám a làá dāá ŋmɔ́ a-ŋambiyaamu.

¹¹Taa tīī-kì dibatɔl ŋyunti ŋun kì dáá pɔ̀ɔǹee.

¹²Yàntī mbambaan ń bà-kì tiŋan ŋyunti ŋun kì dáá sá kibikee. Yaa sá fám, kì làá dāá kpántí dikpiisi ní kaa ti làá nīn tɔ́-si.

¹³An puee pɔ́ɔǹ a-ba kí dàkà a-jipɔɔn tiŋan. Mimmee, u-bimbikpitim kaa dāa kɔ̄ntí-si icoo. Ŋgbampɔn bɔti

¹⁴An sɔ́ á nīn sá usoodaan ama ki cáá ŋgbampɔn ki pɔ̄ɔ̄, ki jítiǹ á nīn sá ugaaja kaa cáá ŋgbampɔn.

¹⁵An sɔ́ á nīn cáá ŋgbampɔn ki pɔ̄ɔ̄ ki jítiǹ á nīn cáá duulinya sindaariyau kɔkɔ. Ŋgbampɔn sɔ́ǹ tigaajakpaandi.

¹⁶Tigaajati tiba kpá bí dūú ŋmàntī nì ŋgbampɔn, ní nnaam miba kpá bí dūú ŋmàntī nì dipɔɔpindi.

¹⁷Ŋkúm sɔ́ǹ falaa maŋfal, ní talku ŋuŋfil sɔ́ǹ iween in kaa dóotée[174].

¹⁸Tijimmɔntiil tin bi cáań ki yóoǹ ubunli un nyiŋŋi sáĺee, bí kii tijin tin bi ŋá ki tɔ́kɔǹ dikaakul puee ní.

¹⁹Saraa jinti tin bi ŋáań ki tìì diwaalee kèetī ba? Di sá yii diwaal kaa jīǹ tijinaaa, kaa gbìl̀ nnunnu mun. Míǹ ní an sá ki tīī ubunli un ti-Dindaan yāntì u dɔ̄ ki sàantée.

²⁰U kpèé tijin gbanti cɔ̀ɔɔ ki fátí diniindi kii ufaal nín kpàl̄ usapɔɔn ki fátí diniindi puee ní. Jà kunimbaau kí wàatī a-ba

²¹Taa yàntī kunimbaau ń jī a-pu dinyandi, kí taa yàntī ilandɔkɔkpiti ń jī a-ni mpaan.

²²Dipɔɔpindi di yì unil maŋfal, mmɔn di fɔ̀kɔntí unil maŋfal.

²³Yàntī án nīn mɔ̄ǹ-si, kí tīī a-ba dipɔɔsɔŋkil. Jà kunimbaau kí wàatī a-ba. Di sá yii kunimbaau nāaǹ binib tikpil, kuaa cáá ipaati.

²⁴Nnimbitaataam nì diŋuul bàtī unil maŋfal wiiŋyi pu, ní ilandɔkɔ yàntī unil ń púĺ malaa.

²⁵Unil yaa bí dipɔɔpindinee, tijin mɔ̄ dijil ní. U gbìl̀ tijin tin u jīǹee mɔŋŋu ní.